Paibangat ed Salita na Dios

Akin a Nepeg ya Manpabautismo Iray Kristiano?

Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Maliket ya ipaliwawa ed sika na Saray Tasi nen Jehova irayan ebat.

1. Antoy labay ya ibaga na pampabautismo?

Say bautismo et kakaukolanen parad maabig a relasyon ed Dios. Kanian nepeg a nabautismoan so sakey a Kristiano, aliwan sano kapangiyanak, noagta no sarag to lan aralen so nipaakar ed Dios tan magmaliw a disipulo nen Jesus. (Gawa 8:12; 1 Pedro 3:21) Magmaliw itayon disipulo nen Jesus no aralen tan unoren tayo ray bengatlan ingganggan to.​—Basaen so Mateo 28:19, 20.

Diad panaon na saray apostol nen Jesus, dakel so kinmiwas a tampol ya aralen so nipaakar ed Dios tan si Jesus. Singa bilang, nen naamtaan na sakey a laki ya lapud impatey nen Jesus et posible lay kilalaban, sikatoy tampol ya nagmaliw a disipulo. Natan et dakel met so mauyamon totoo ya nandesidin magmaliw ya patumbok nen Jesus.​—Basaen so Gawa 8:26-31, 35-38.

2. Akin a nampabautismo si Jesus?

Manga 30 años nen Jesus sanen impalseb nen Juan a Managbautismo diad Ilog Jordan. Say bautismo nen Jesus et mangirerepresenta ed desisyon ton gawaen so linawa na Dios parad sikato. (Hebreos 10:7) Kaibad satan so pangiter tod bilay to bilang bagat parad saray kasalanan na totoo. Anggan nen antis ya linmeksab manlapud tawen pian manayam ed dalin, aaroen tan uunoren la nen Jesus so Ama to, si Jehova.​—Basaen so Marcos 1:9-11; Juan 8:29; 17:5.

 3. Akin a nepeg ya nabautismoan so sakey a Kristiano?

Duma so situasyon tayo ed si Jesus​—nianak tayon makasalanan. Balet lapud insakripisyo nen Jesus so bilay to, posible lan nawalaan tayoy maabig a relasyon ed Dios. (Roma 5:10, 12; 12:1, 2) Diad tua et nayari tayon magmaliw ya kayarian to, a singa membro na pamilya to. (2 Corinto 6:18) Panon tayon nawalaan na ontan ya pribilehyo? Diad pampikasin bukor, idedika tayoy sarili tayod si Jehova, ya isipan a gawaen so linawa to ed interon bilay tayo. Kayarin idedikay sarili, ipatnag tayo itan ed publiko panamegley na pampabautismo.​—Basaen so Mateo 16:24; 1 Pedro 4:2.

4. Panon kan manparaan parad bautismo?

Saray Tasi nen Jehova et mangiyaaral na Biblia ed siopaman a malabay ya onapit ed Dios. Say panaral moy Biblia tan iyatendid saray Kristianon pantitipon so mamaelet na panangarom ed Dios tan mamabiskeg na pananisiam ed sikato. Ontulong met pian nawalaan kay maong iran ugali. Say pakawalaan na aro, pananisia, tan arum nin kualidad ya makapaliket ed Dios et ontulong pian natoor moy sipan mon manlingkor ed si Jehova ya andi-angga.​—Basaen so Juan 17:3; Hebreos 10:24, 25.

Parad kaaruman ya impormasyon, nengnengen so kapitulo 18 na sayan libro, Anto so Peteg ya Ibabangat na Biblia?, ya im-publish na Saray Tasi nen Jehova.