Paibangat ed Salita na Dios

Panon Itayon Naapektoan na Saray Anghel tan Saray Demonyo?

Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Maliket ya ipaliwawa ed sika na saray Tasi nen Jehova irayan ebat.

1. Siopa iray anghel?

Saray anghel et espiritun pinalsa ya manbibilay ed tawen. Say klase na bilay da et mas atagey nen say too. Say tuan Dios, ya espiritu met, so amalsa ed saray anghel antis ton pinalsa so dalin. (Job 38:4, 7; Mateo 18:10) Apaliberan si Jehova na minilyon iran matoor ya anghel.​—Basaen so Salmo 103:20, 21; Daniel 7:9, 10.

2. Kasin tutulongan na saray anghel iray totoo?

Tinulongan na saray anghel so sakey a matunong a lakin say ngaran to et Lot. Sikatoy nanayam ed syudad ya talagan deralen la na Dios lapud inkauges na saray totoo diman. Pinasakbayan na duaran anghel si Lot tan say pamilya to ya ombatik. Inisip na arum ya lurey labat itan kanian imbaliwala da. Balet akaliktar si Lot tan saray anak ton bibii lapud inunor day impasakbay na Dios panamegley na saray anghel.​—Basaen so Genesis 19:1, 13-17, 26.

Unong ed Biblia, tutulongan na saray anghel iray totoo natan diad pangigigiya rad saramay matoor ya mangipupulong ed maong a balita na Panarian na Dios. (Mateo 24:14) Satan a maong a balita et walay katekep ton pasakbay. Singa samay pasakbay ed si Lot, aliwa itan ya lurey. Iiter itan na Dios panamegley na saray anghel.​—Basaen so Apocalipsis 1:1; 14:6, 7.

Nayarin usaren na Dios iray anghel pian pabiskegen da itayo no nasusubok tayo. Sikatoy angusar na anghel pian pabiskegen si Jesus.​—Basaen so Lucas 22:41-43.

Asingger lan usaren na Dios iray anghel ed sananey ya paraan​—pian deralen iray mauges a totoo ya pansesengegay paniirap. Lapud satan et nainawaan iray totoo.​—Basaen so 2 Tesalonica 1:6-8.

  3. Panon itayon naapektoan na saray demonyo?

Singa met diad dalin ya dakel so totoon nanggaway mauges diad agda impangunor ed Dios, diad tawen et dakel met iray anghel ya nanrebelde ed Dios. (2 Pedro 2:4) Tinawag ya demonyo iray rebelden anghel. Say manunaan ed sarayan rebelde et si Satanas, say Diablo. Ibabalang nen Satanas tan saray demonyo to iray totoo.​—Basaen so Apocalipsis 12:9.

Uusaren nen Satanas iray masaol a negosyo, saray gobierno, tan palson relihyon pian impluensyaan iray totoo tan iyarawi rad Dios. Kanian, si Satanas so sengegan na ag-inkahustisya, kaugsan, tan kairapan ya mangaapekta ed saray totoo.​—Basaen so 1 Juan 5:19.

4. Panon ya papalikdoen na saray demonyo iray totoo?

Dakel a totoo so naibabalang nen Satanas diad pangibabangat ya saray inatey et magmamaliw ya espiritu tan makapitongtong ed sikara. Ibabaga balet na Biblia ya anggapon balot so nagawaan na saray inaatey. (Eclesiastes 9:5) Balet mabetbet ya papalikdoen na saray demonyo iray totoo diad pangaalig dad boses na saray inatey ya inad-aro tayo. (Isaias 8:19) Ibabalang na saray demonyo so arum panamegley na saray espiritista, managparles tan panamegley na astrolohiya. Papasakbayan itayo na Salita na Dios a paliisan iratan a kagagawa. Kanian nepeg tayon ibantak so antokaman a walad sikatayo ya walay koneksion to ed saray demonyo odino magic.​—Basaen so Deuteronomio 18:10, 11; Gawa 19:19.

No inaro tayo si Jehova, agtayo nepeg a takotan iray demonyo. No aralen tayoy Salita na Dios tan gawaey ibabaga na satan, susumpaen tayoy Diablo tan onaapit itayod Dios. Mas makapanyari si Jehova nen saray demonyo. Sarag itayon pabiskegen na saray matoor ya anghel to diad panaon ya kaukolan tayo itan.​—Basaen so Salmo 34:7; Santiago 4:7, 8.

Parad kaaruman ya impormasyon, nengnengen so kapitulo 10 na sayan libro, Anto so Peteg ya Ibabangat na Biblia?, ya im-publish na saray Tasi nen Jehova.