Unong ed Biblia, “say pananisia et panagmatalek a seguradon nagawa iray bengatlan iilaloan, a walaay makakombinsin ebidensya a tua iratan anggano agnanenengneng.” (Hebreos 11:1) Say walaan na pananisia ed Dios et manmamatalek a sumpalen To so amin ya insipan To.

Impatnag nen Moises so pananisia tod Dios diad saray desisyon a ginawa to. (Genesis 22:15-18) Sikatoy walaan na komportablen bilay diad maaligwas a baley na Ehipto, balet ta tinaynan to itan. “Mas pinili toy napairap a kaiba na totoo na Dios nen say temporaryon panliket ed kasalanan.” (Hebreos 11:25) Kasin biglaan labat itan a desisyon a pagbabawian to met lanlamang? Andi, ta ibabaga na Biblia ya si Moises et “nansiansian malet a singa sankanengneng to imay Sakey ya agnanengneng.” (Hebreos 11:27) Agbalot nagbabawian nen Moises so ginawa ton desisyon a resultay pananisia to.

Pinabiskeg met nen Moises so pananisia na arum ed Dios. Singa bilang, nonot yo pay agawa nen nauusilan la na saray sundalo na Faraon iray Israelita diad Ambalangan Dayat. Lapud natatakot irad seguradon kaderal da, saray Israelita et kinmerew na tulong ed si Jehova tan Moises. Antoy ginawa nen Moises?

Nayarin agnaisip nen Moises ya palduaen na Dios so Ambalangan Dayat pian walay nabatikan na saray Israelita. Balet, sikatoy matalek a walay gawaen na Dios pian protektaan so totoo To. Tan labay nen Moises ya ontan met so panagmatalek na saray kapara ton Israelita. Oniay nabasa tayo: “Inkuan nen Moises ed saray totoo: ‘Agkayo ontatakot, mandeen kayo labat, et nengneng yo so panangiliktar nen Jehova a gawaen to naani ed sikayo ed sayan agew.’” (Exodo 14:13) Kasin apabiskeg toy pananisia na saray kapara ton Israelita? On, lapud oniay ibabaga na Biblia nipaakar ed si Moises tan amin ya Israelita: “Lapu ed pananisia linmabas ira ed pegley na Dayat ya Ambalanga a singa ed dalin ya amaga.” (Hebreos 11:29) Aliwa labat ya si Moises so agunggonaan lapud pananisia to, noagta amin met ya nanmatalek ed si Jehova.

Naalig tayo si Moises no ipatnag tayoy pananisiad Dios diad saray desisyon tayo. Singa bilang, insipan na Dios ya asikasoen to ray materyal ya pankaukolan tayo no iyuna tayoy pandayew ed sikato. (Mateo 6:33) Tua, ompan nairapan tayon nalabanan so pagmaliw a materyalistiko ta ontan so karaklan. Balet makaseguro itayo ya no pansagpotan tayon pansiansiaen so simplin kabibilay pian makapanpokus ed panagdayew ed si Jehova, iter toy amin a kaukolan tayo. Ipapaseguro to: “Agta kan balot taynanan tan agta kan balot paulyanan.”—Hebreos 13:5.

Maanos tayo met a tutulongay arum a nawalaay pananisia. Singa bilang, amta na saray atateng a baleg ya responsabilidad so panulong ed saray ananak dan nawalaan na pananisia. Legan na ibabaleg da, kaukolan ya naamtaan na saray ugugaw a wala so Dios tan sikatoy angiter ed sikatayo na totontonen parad maong tan mauges. Kaukolan met iran nakombinse a say pangunor ed saratan a totontonen et sankaabigan. (Isaias 48:17, 18) Iiter na atateng ed ananak da so sankablian a regalo no tutulongan da ran manisia a say Dios et “wala tan tumangan to iramay masimoon a manaanap ed sikato.”—Hebreos 11:6.