TONGTONGAN NIPAAKAR ED SARAY TOPIC DIAD BIBLIA
Kapigan Ginmapon Nan-uley so Panarian na Dios? (Part 1)
Nabasam dia so alimbawa no panon ya itotongtong na Saray Tasi nen Jehova iray topic ed Biblia. Imadyin mon walay Tasi a say ngaran to et Cameron a linmad abung nen Jon.
“PANSEETAN MON ANAPEN” SO PAKATALOS
Cameron: Antam Jon, nai-enjoy ko yay regular ya pantotongtong ta tungkol ed Biblia. * Nen imbeneg, tinepet mo no akin ya panisiaan na Saray Tasi nen Jehova ya ginmapon nan-uley so Panarian na Dios nen 1914.
Jon: On, abasak ‘tan ed sakey ya publikasyon yo. Kanian mankelaw ak ta say antak ibabase yod Biblia so amin a papanisiaan yo.
Cameron: Duga ka.
Jon: Pero, abasak lay interon Biblia. Balet anggapoy abasak ya 1914, kanian in-search kod Internet. Et anggapoy anggan sakey ya nalmok.
Cameron: Marakep tay ginawam, Jon. Unona, binasam so interon Biblia. Labay ton ibaga, rerespetoen moy Salita na Dios.
Jon: On, ta anggapoy kapara to.
Cameron: Sakey ni, maong ta kinonsultam so Biblia pian anapey ebat ed tepet mo. Inunor moy ibabaga to ya “Panseetan mon anapen” so pakatalos. * Duga ‘tan.
Jon: Salamat. Labalabay koy makaaral. Nan-research ak ni ingen tungkol ed 1914 tan akanengneng ak na impormasyon ed sayan libron aaralen ta. Walay abitla dian kugip na sakey ya ari tungkol ed balbaleg a kiew ya binatang insan sinmimit lamet, singa onman.
Cameron: Ay, amay propesiyan walad Daniel kapitulo 4. Amay kugip na Ari na Babilonia a si Nabucodonosor.
Jon: On, aman. Aminpigak ya binasa man. Pero say tua, singa agko nanengneng no antoy koneksion tod Panarian na Dios odino ed 1914.
Cameron: Diad tua Jon, anggan si propetan Daniel et agto met atalosan so insulat to!
Jon: Talaga?
Cameron: On. Oniay inkuan tod Daniel 12:8: “Nadngel ko balet agko atalosan.”
Jon: Agko sirin bukbukor. Mairap ya talaga iya manaya.
Cameron: Ag-iya atalosan a tampol nen Daniel ta aliwa nin saman so panaon na Dios pian ipaamtay labay ya ibaga na propesiya ed libron Daniel. Balet diad panaon tayo, natatalosan tayo la.
Jon: Akin ey?
Cameron: Basaen ta yay onsublay ya bersikulo. Diad Daniel 12:9: “Saray salita nakapotan ira tan natatakan ira angga ed panaon na kasumpalan.” Kanian natalosan labat irayan propesiya diad bandad sampot odino diad panaon na anggaan. Andi bale diad ontumbok, naaralan ta lanlamang so amin ya ebidensyan manbibilay tayo lad satan a panaon. *
Jon: Ipaliwawam pa sirin ed siak so propesiya nen Daniel.
Cameron: Sige.
KUGIP NEN NABUCODONOSOR
Cameron: Nengnengen ta pa nin magano no anto may kugip nen Arin Nabucodonosor. Insan ta pantongtongay labay ton ibaga.
Jon: OK.
Cameron: Diad kugip nen Nabucodonosor, anengneng toy balbaleg ya kiew ya akasabid tawen. Insan to nadngel ya ingganggan na mensahero na Dios ya batangen so kiew. Balet imbaga na Dios ya agbabagotey lamot to. Kayari na “pitoran panaon,” onsimit lamet so kiew. * Sayan propesiya et inmunan agawa ed si Arin Nabucodonosor. Anggaman sikatoy kabkabat ya ari—singa samay kiew ya akasabid tawen—sikatoy abatang diad “pitoran panaon.” Natandaan mo ni no anto may agawa?
Jon: Andi, agko la natandaan.
Cameron: Ibabaga na Biblia ya naandi kalakal to ed manga pitoy taon, kanian diad saman et ag-akapan-ari. Balet kayari pitoran panaon, pinmawil so kalakal to tan akapan-uley lamet. *
Jon: Ay onman. Pero antoy koneksion tod Panarian na Dios tan 1914 ey?
Cameron: Ipaliwawak ed sika so duaran impakasumpal na sayan propesiya. Agawa so inmuna nen apatunday panu-uley nen Arin Nabucodonosor. Say komadua et nen apatunday pan-uuley na Dios. Sayay komadua so mikonektaan ed Panarian na Dios.
Jon: Panon mon amta ey?
Cameron: Unona, natalosan ta itan ed samay mismon propesiya. Based Daniel 4:17, say propesiya et niiter “pian naamtaan na saray mabilay a say Sankatagyan manuley ed panarian na saray totoo, tan sikato so iter to ed anggan siopa a labay to.” Apansin mo may salitan “panarian na saray totoo”?
Jon: On, say kuan to “say Sankatagyan manuley ed panarian na saray totoo.”
Cameron: Duga. Siopa kasi may “Sankatagyan” ey?
Jon: Dios seguro.
Cameron: On. Ipapanengneng sirin na satan a propesiya ya aliwa labat yan tungkol ed si Nabucodonosor. Kaiba met ed saya so “panarian na saray totoo,” say pan-uley na Dios ed totoo. Tan napaneknekan itan no nengnengen tay arum nin karga na propesiya ed Daniel.
Jon: Antoy labay mon ibaga?
SAY MANUNAN TEMA NA LIBRO
Cameron: Aminpigan naulit ed libron Daniel itan ya topic. Lanang ya bibitlaen na libro so igapon pan-uley na Panarian na Dios ya say ari et say Anak to, si Jesus. Singa bilang, pawilen ta’n magano may ibabaga na Daniel 2:44. Pibasam pa.
Jon: OK. Say kuan to: “Dia ed saray agew naani na saratan ya arari, say Dios na tawen mamaalagey naani na sakey a panarian ya anggan kapigan agnaani naderal tan say pananguley to agnaani niiter ed sananey a baley. Balet buybuyaken to naani tan upoten to naani so saraya ya amin a panarian, et sikato so mansiansia lawas.”
Cameron: Salamat. Parad sika, Panarian na Dios kasi so tutukoyen na sayan bersikulo?
Jon: Hmm. Agak segurado.
Cameron: Imanom ya imbaga ton sayan Panarian et “mansiansia lawas.” Kanian Panarian na Dios sirin so tutukoyen to ta ag-itan balot nasarag na anggan anton gobierno na too.
Jon: Ay on awa.
Cameron: Nia ni sakey ya propesiya ed Daniel 7:13, 14 tungkol ed Panarian na Dios tan say onsabin man-uley: “Sikato so naikdan na panuley, tan gayaga, tan sakey a panarian, ya amin so saray baley, saray nasyon, tan pansasalita manlingkor ira komon ed sikato. Say panuley to sikato so lawas a panuley, a sikato so agnaani onlalabas, tan say panarian to ed satan sikato so agnabagbag.” Wala kasi piparaan na sayan propesiya ed saramay apantongtongan ta nen niman?
Jon: Abitlay panarian.
Cameron: Duga. Tan aliwa labat iyan ordinaryon panarian. Imbaga ton naikdan iyan Panarian na autoridad ed “saray baley, saray nasyon, tan pansasalita.” Labay ton ibaga, sayan Panarian et manuley ed interon mundo.
Jon: Agko naisip ‘tan a, pero duga ka. Atan so walad Biblia.
Cameron: Sakey ni, nengneng moy arum nin ibabaga na propesiya: “Say panuley to sikato so lawas a panuley, a sikato so agnaani onlalabas, tan say panarian to ed satan sikato so agnabagbag.” Agta kapara iya na samay binasa ta’d Daniel 2:44?
Jon: On.
Cameron: Rebyuen ta pan magano imay apantongtongan ta. Impropesiya so Daniel kapitulo 4 pian naamtaan na totoo a say ‘Sankatagyan so man-uley ed panarian na totoo.’ Ipapanengneng a mismo na saya a walay mas baleg ya kasumpalan na propesiya, tan aglabat ontutukoy ed si Nabucodonosor. Tan diad libron Daniel, wala ray propesiyan tungkol ed igapon pan-uley na Panarian na Dios ya say ari et say Anak to. Parad sika, makatunongan kasin ibaga ya sayan propesiya ed Daniel kapitulo 4 et walay koneksion tod Panarian na Dios?
Jon: Singa wala. Balet agko nin siansia nanengneng so koneksion tod 1914.
PALABASEN SO “PITORAN PANAON”
Cameron: Pawilen ta may tungkol ed si Arin Nabucodonosor. Diad unonan impakasumpal na propesiya, inrepresenta nen Nabucodonosor imay kiew. Apatunda so pan-uley to nen abatang so kiew tan pinaulyan ed pitoran panaon. Aya may nen naandi kalakal to ed manga pitoy taon. Anampot itan a panaon nen pinmawil so kalakal to tan nan-ari lamet. Diad komaduan impakasumpal na propesiya, walay panaon ya apatunday uley na Dios, balet aliwan lapud kinmapuy so Dios.
Jon: Antoy labay mon ibaga?
Cameron: Nensaman, saray ari na Israel ed Jerusalem et ipapasen ya yinmurong ed “trono nen Jehova.” * Inrepresenta day uley na Dios. Kanian say impan-ari da et nibagan uley na Dios. Balet asabi panaon, nagmaliw ya agmaunor ed Dios iraman ya arari pati saray uuleyan da. Kanian, inabuloyan na Dios ya naaripen ira na Babilonia nen 607 B.C.E. Manlapud saman, anggapo lay ari ed Jerusalem ya angirepresentad si Jehova. Kanian diad saman et nibagan apatunda so uley na Dios. Natutumbok mo ni?
Jon: Medyo.
Cameron: Kanian nen 607 B.C.E., ginmapo so pitoran panaon tan apatunday uley na Dios. Kayari pitoran panaon, manuro so Dios na balon ari ya mangirepresentad Sikato. Balet, manlapu lad tawen. Diad satan la onggapon nagawa iramay arum ya propesiyan abasa tad Daniel. Kanian say tepet et: Kapigan anampot so pitoran panaon? No naamtaan tay ebat ed satan, naamtaan ta met no kapigan ginmapon nan-uley so Panarian na Dios.
Jon: A, amtak la. Anampot so pitoran panaon nen 1914?
Cameron: Duga ka!
Jon: Balet panon tayon amta ey?
Cameron: Nen wadiad dalin si Jesus, natalosan ed imbaga to ya agni anampot so pitoran panaon. * Kanian andukey itan. Ginmapo so pitoran panaon pigaran lasus a taon antis ya linma diad dalin si Jesus, tan nantultuloy itan ed dakel nin taon anggad impawil tod tawen. Tandaan met ya saray propesiya ed Daniel et nalinewan labat diad “panaon na kasumpalan” odino anggaan. * Maong labat ta diad bandad sampot na 1800’s, inaral a maong na saray sinseron estudyante na Biblia iya tan saray arum nin propesiya. Atalosan da ya say pitoran panaon et manampot ed taon 1914. Tan pruebaan na saray agawa ya say Panarian na Dios et ginmapon nan-uley ed tawen diad satan a taon. Ginmapod satan ya taon so kaunoran iran agew, odino panaon na anggaan. Dakel lay apantongtongan ta amo . . .
Jon: On. Pawilen ko ‘ya pian lalok ya natalosan.
Cameron: Agka mapaga. Anggan siak met et agkon tampol atalosan iray amin ya impormasyon. Pero diad sayay impantongtong ta, apansin mo anganko ya say papanisiaan na Saray Tasi nen Jehova tungkol ed Panarian et talagan ibabase dad Biblia.
Jon: On, apansin ko.
Cameron: Tan naimanok ya ontan ka met. Singa imbagak la, agta maminpinsan a natalosan iyan amin. Nayarin wala ni ray tepet mo. Singa bilang, naamtaan ta ya say pitoran panaon et mikonektaan ed Panarian na Dios tan ginmapo nen 607 B.C.E., balet panon tayon amta ya anampot so pitoran panaon nen 1914? *
Jon: Talanti, naisip ko met itan.
Cameron: Tulongan itayo na Biblia ya nakuenta so eksakton karukey na pitoran panaon. Labay mon atan so pantongtongan ta diad onsublay ya iyakar ko dia? *
Jon: On, sige.
Wala ta ray tepet mo tungkol ed Biblia? Kasin walay labay mon naamtaan ed saray papanisiaan odino paraan na panagdayew na Saray Tasi nen Jehova? No wala, itepet mo labat ed sikara. Maliket iran mangipaliwawad satan.
^ par. 5 Diad panamegley na programa dan libren panangiyaral na Biblia, sistematikon ibabangat na Saray Tasi nen Jehova so Biblia ed arum.
^ par. 11 Uliran 2:3-5, Maung a Balita.
^ par. 21 Nengnengen so kapitulo 9 na libron Anto so Peteg ya Ibabangat na Biblia? ya im-publish na Saray Tasi nen Jehova. Available met ed www.ps8318.com/pag.
^ par. 63 Diad propesiya nen Jesus tungkol ed kaunoran iran agew, inkuan to: “Say Jerusalem [mangirerepresentad uley na Dios] et igatin-gatin na saray nasyon, anggad nasumpal iray aturon panaon na saray nasyon.” (Luc. 21:24) Kanian say intunda na uley na Dios et nantultuloy ed panaon nen Jesus anggad kaunoran iran agew.
^ par. 67 Nengnengen so pahina 215-218 “1914—Makatantandan Taon ed Propesiya na Biblia” na libron Anto so Peteg ya Ibabangat na Biblia?
^ par. 69 Diad onsublay ya artikulo ed sayan serye, pantongtongan iray tekston mangipalinew ed dukey na pitoran panaon.
Ompan Nagustoan Mo Met
SAY PANAG-BANTAYAN
Kapigan Ginmapon Nan-uley so Panarian na Dios? (Part 2)
Ipapaamta na propesiyad Biblia so eksakton taon no kapigan itan agawa.
NIPAAKAR ED SIKAMI
Mabetbet ya Itetepet Nipaakar ed Saray Tasi nen Jehova
Amtaen iray ebat ed saray tepet mo nipaakar ed sikami.
BALON MUNDO A PATALOS NA MASANTON KASULATAN
Saray Makapanyari ed Mundo ya Impasakbay nen Daniel
Nengnengen so imaden ya walad kugip diad Daniel kapitulo 2 tan no panon iyan tinmua.
