Andi. Aliwan kontra iray Tasi nen Jehova ed pampabakuna. Personal itan ya desisyon na kada Kristiano. Dakel ed saray Tasi nen Jehova so nandesisyon ya manpabakuna.

 Labay mi sankaabigan ya panagpatambal tan naaapresya mi so iyaaligwas na medisina ed panggagawa day paraan pian nabawasan so peligro ed saray seryoson sakit. Pisalamatan mi pansasagpot tan kuli na saray health-care professional lalo la diad saray mairap ya panaon.

 Mikokoopera met iray Tasi nen Jehova ed saray opisyal na gobierno. Singa bilang, manlapu lad inggapo na COVID-19 pandemic, tuloytuloy ya manpa-publish ed sayan website iray Tasi nen Jehova na saray panonot diad nilasus iran lenguahe. Papasesegen mi iray totoo ya ontulok ed saray ganggan na gobierno parad safety. Kaibad saratan ya panonot so kaimportantian na physical distancing tan itumbok ed saray totontonen nipaakar ed saray pantitipon diad publiko, pan-quarantine, panuras na lima, pansulong na face mask o face shield tan itumbok ed arum ni ran praktikal ya paraan ya igaganggan o irerekomenda na saray autoridad.—Roma 13:1, 2.

 Pigaran dekada la ya idadanet na saray publikasyon na saray Tasi nen Jehova irayan prinsipyo:

•   Say pampatambal et personal ya desisyon.—Galacia 6:5.

   “Agmangirerekomenda [iyan magasin] no dinan so mas marakep ya tambal o therapy tan agmet mangiiter na advice nipaakar ed panagpatambal. Say gagala na saya et mangiter na impormasyon balet akauley lay manbabasa ya manpili tan manggawa na sarili ton desisyon.”—Awake!, Pebrero 8, 1987.

   “Sikan mismo so mandesisyon no kasin manpabakuna ka tan saray ananak mo.”—Awake!, Agosto 22, 1965.

•   Manpapadoktor kami ta importante ed sikami so bilay.—Gawa 17:28.

   “Oonla ed doktor iray Tasi pian manpatambal. Papablien day bilay da tan labay dan naparukey itan diad paraan ya makatunongan tan ag-onkontra ed saray prinsipyo na Biblia.”—The Watchtower, Hulyo 1, 1975.

   “Oniinum na tambal iray Tasi nen Jehova tan manpapadoktor met ira. Labay dan maksil so laman da tan mandukey so bilay da. Diad tua, wala ray Tasi nen Jehova ya doktor a singa si Lucas, sakey ya Kristiano nen inmunan siglo. . . . Aapresyaen na saray Tasi nen Jehova so kuli tan dedikasyon na saray health-care professional. Misasalamat met ira no makakainawa irad sakit da lapud tulong ya naaawat da.”—The Watchtower, Pebrero 1, 2011.