1. Kico ta e yabi pa haya un bida di famia felis?

YEHOVA DIOS kier pa bo bida di famia ta felis. Su Palabra, Bijbel, ta duna guia y instruccion pa cada miembro di famia, y ta describi e papel cu Dios a asigna na cada un di nan. Ora cu miembronan di famia ta cumpli cu nan papel na harmonia cu e conseho di Dios, e resultadonan ta duna gran satisfaccion. Hesus a bisa: “Bendiciona ta esnan cu ta tende e palabra di Dios, y ta ward’e.”—Lucas 11:28.

2. Kico nos mester reconoce pa nos por tin felicidad den famia?

² Felicidad den famia ta depende principalmente di si nos ta reconoce cu e areglo di famia ta origina di Yehova, esun cu Hesus a yama “Nos Tata.” (Mateo 6:9) Tur famia na mundo ta existi debi na nos Tata celestial, y e sigur sa kico ta haci famianan felis. (Efesionan 3:14, 15) Pues anto, kico Bijbel ta siña tocante e papel di cada miembro di famia?

3. Con Bijbel ta describi e comienso di e famia humano, y dicon nos sa cu loke e ta bisa ta berdad?

³ Yehova a crea e prome hendenan, Adam cu Eva, y a trece nan hunto como esposo y esposa. El a pone nan den un cas  bunita, un paradijs riba tera—e hofi di Eden—y a bisa nan pa haya yiu. Yehova a bisa: “Sea fructifero y multiplica, y yena e tera.” (Genesis 1:26-28; 2:18, 21-24) Esaki no ta djis un cuenta of fantasia, pasobra Hesus a mustra cu loke Genesis ta bisa tocante e comienso di bida di famia ta berdad. (Mateo 19:4, 5) Aunke nos ta confronta hopi problema y e bida djawe no ta segun Dios su proposito, laga nos wak dicon felicidad den famia toch ta posibel.

4. (a) Con cada miembro di famia por contribui na felicidad di e famia? (b) Dicon studia e bida di Hesus ta asina importante pa felicidad di famia?

⁴ Cada miembro di famia por yuda haci e bida di famia felis door di imita Dios den mustra amor. (Efesionan 5:1, 2) Pero con nos por imita Dios si ni sikiera nos por mir’e? Nos por sa con Yehova ta actua pasobra el a manda su Yiu unigenito for di shelo bin na tera. (Huan 1:14, 18) Ora cu e Yiu aki, Hesucristo, tawata riba tera, el a imita su Tata celestial asina bon, cu mira y tende Hesus tawata mescos cu ser den compania di Yehova y tend’e. (Huan 14:9) Pesei, door di siña tocante e amor cu Hesus a demostra y sigui su ehempel, cada un di nos por yuda haci e bida di famia mas felis.

5, 6. (a) Con e manera cu Hesus ta trata e congregacion ta un ehempel pa esposonan? (b) Kico nos mester haci pa haya pordon di pica?

⁵ Bijbel ta bisa cu esposonan mester trata nan esposa den e mesun manera cu Hesus ta trata su disipelnan. Considera e siguiente instruccion di Bijbel: “Esposonan, stima boso esposa, mescos cu Cristo tambe a stima e iglesia y a entrega su mes p’e . . . Asina esposonan tambe mester stima nan esposa manera nan mes curpa. Esun cu ta stima su esposa ta stima su mes; pasobra nunca ni un hende no a odia su mes carni, ma ta aliment’e y ta cuid’e, mescos cu Cristo tambe ta haci cu e iglesia.”—Efesionan 5:23, 25-29.

⁶ Hesus su amor pa su iglesia of congregacion di  disipelnan ta un ehempel perfecto pa esposonan. Hesus “a stima nan te na fin”, sacrificando su bida pa nan, apesar cu nan tawata imperfecto. (Huan 13:1; 15:13) Asina tambe Bijbel ta urgi esposonan: “Stima boso esposanan, y no sea amarga contra nan.” (Colosensenan 3:19) Kico lo yuda un esposo aplica e conseho ei, specialmente si su casa de bes en cuando no ta actua prudente? E esposo mester corda cu e tambe ta comete eror y alabes corda riba loke e mester haci pa haya pordon di Dios. Kico e mester haci? E mester pordona hende cu peca contra dje, y esei ta inclui su esposa. Claro cu e esposa lo tin cu haci mescos. (Mateo 6:12, 14, 15) Bo ta mira dicon algun hende a yega di bisa cu un matrimonio exitoso ta e union di dos persona cu ta bon den pordona?

7. Kico Hesus a tene cuenta cu ne, poniendo ki ehempel pa esposonan?

⁷ Ta bon tambe pa esposonan tuma nota cu Hesus semper a mustra consideracion na su disipelnan. El a tene cuenta cu nan limitacionnan y necesidadnan fisico. Por ehempel, ora nan tawata cansa el a bisa nan: “Ban cu mi, boso so, na un luga solitario y sosega un rato.” (Marco 6:30-32) Esposanan tambe ta merece pa consideracion wordo mustra na nan. Bijbel ta describi esposa como “un vaso mas delicado”, y ta manda esposonan pa duna nan “honor.” Dicon? Pasobra tanto esposo como esposa ta participa den e fabor inmereci of “gracia di bida.” (1 Pedro 3:7) Esposonan mester corda cu loke ta haci un hende precioso den bista di Dios ta fieldad, y no e echo cu un persona ta homber of mohe.—Salmo 101:6.

8. (a) Den ki sentido un esposo “cu ta stima su esposa ta stima su mes”? (b) Kico ser “un carni” ta nifica pa un esposo y su casa?

⁸ Bijbel ta bisa cu un esposo “cu ta stima su esposa ta stima su mes.” Esei ta asina pasobra manera Hesus a indica, un homber cu su casa “no ta dos mas, sino un carni.” (Mateo 19:6) Pues nan interes sexual mester keda limita entre  nan dos so. (Proverbionan 5:15-21; Hebreonan 13:4) Nan por haci esaki si nan pone como nan meta pa satisface e necesidad di otro en bes di solamente nan propio necesidad. (1 Corintionan 7:3-5) Ta bon pa tuma nota di e recordatorio: “Nunca ni un hende no a odia su mes carni, ma ta aliment’e y ta cuid’e.” Esposonan tin cu stima nan esposa mescos cu nan ta stima nan mes, cordando cu nan tin cu duna cuenta na nan propio cabes, Hesucristo.—Efesionan 5:29; 1 Corintionan 11:3.

9. Filipensenan 1:8 (NW) ta menciona ki cualidad di Hesus, y dicon esposonan mester desplega e cualidad aki pa cu nan casa?

⁹ Apostel Pablo a papia di e ‘tierno cariño cu Cristo Hesus tin.’ (Filipensenan 1:8, NW) Hesus su ternura tawata un cualidad refrescante, un cualidad atractivo pa hende mohe cu a bira su disipel. (Huan 20:1, 11-13, 16) Y esposanan ta anhela di haya tierno cariño for di nan esposo.

10. Con Hesus ta un ehempel pa esposanan?

¹⁰ Un famia ta un organisacion, y pa e funciona bon, e mester tin un cabes. Asta Hesus tin un Persona cu e ta somete su mes na dje como su Cabes. “Dios ta e cabes di Cristo”, mescos cu “e homber ta e cabes di e mohe.” (1 Corintionan 11:3) Hesus su sumision na Dios su autoridad como cabes ta un ehempel excelente, ya cu nos tur tin un cabes cu nos mester somete nos mes na dje.

11. Ki actitud un esposa mester tin pa cu su esposo, y ki efecto e esposa su conducta lo por tin?

¹¹ Hombernan imperfecto ta comete eror y hopi bes nan no ta e cabes ideal di un famia. Pues kico un esposa mester haci? E no mester expresa menosprecio pa loke su esposo ta haci ni purba tuma e esposo su autoridad como cabes. Ta bon pa un esposa corda cu den bista di Dios, un actitud of spirito suave y keto ta di gran balor. (1 Pedro 3:4) Door di desplega tal actitud, lo e ripara cu ta bira mas  facil pa e demostra sumision cu ta agrada Dios, asta bou di circunstancianan dificil. Ademas, Bijbel ta bisa: “E esposa percura pa e respeta su esposo.” (Efesionan 5:33) Pero kico si e esposo no ta acepta Cristo como su Cabes? Bijbel ta urgi esposanan: “Sea sumiso na boso mes esposonan, pa si algun di nan ta desobedecido na e palabra, nan por wordo gana sin palabra pa medio di e conducta di nan esposanan, ora nan observa boso conducta puro y respetuoso.”—1 Pedro 3:1, 2.

12. Dicon no ta malo pa un esposa expresa su opinion cu respet?

¹² Sea cu un esposa su casa ta un creyente of no, e esposa no ta mustrando falta di respet si e expresa cu tacto un opinion cu ta distinto for di esun di e esposo. E esposa su punto di bista podise ta corecto, y henter e famia lo por beneficia si e esposo scuch’e. Aunke Abraham no tawata di acuerdo ora cu su casa, Sara, a recomenda un solucion practico pa un cierto problema familiar, Dios a bisa Abraham: “Scuch’e.” (Genesis 21:9-12) Claro cu ora un esposo tuma un decision final riba un asunto cu no ta na conflicto cu e lei di Dios, e esposa ta mustra su sumision door di apoya e decision.—Echonan 5:29; Efesionan 5:24.

13. (a) Kico Tito 2:4 y 5 ta urgi mohenan casa pa haci? (b) Kico Bijbel ta bisa tocante separacion y divorcio?

¹³ Un esposa por cumpli den hopi manera cu su papel di cuida e famia. Por ehempel, Bijbel ta mustra cu mohenan casa mester ‘stima nan esposo, stima nan yiunan, ta huicioso, puro, bon ama di cas, cariñoso, siendo sumiso na nan mes esposo.’ (Tito 2:4, 5) Un esposa y mama cu ta actua den e manera aki lo gana e amor y respet duradero di su famia. (Proverbionan 31:10, 28) Sinembargo, como cu matrimonio ta un union di dos persona imperfecto, tin algun circunstancia extremo cu por resulta den separacion of divorcio. Bijbel ta permiti separacion bou di cierto circunstancia. Sinembargo, separacion ta un asunto serio, pasobra Bijbel ta conseha: “E esposa no mester bai laga su esposo . . . [y] e esposo no  mester manda su esposa bai.” (1 Corintionan 7:10, 11) Anto e unico base biblico pa divorcio ta si un di e casanan comete inmoralidad sexual.—Mateo 19:9.

14. Con Hesus a trata mucha, y kico mucha tin mester di nan mayornan?

¹⁴ Hesus a pone un ehempel perfecto pa mayornan den e manera cu el a trata mucha. Ora cu otro hende a purba stroba mucha chikito di acerca Hesus, el a bisa: “Laga e muchanan bin serca mi; no stroba nan.” Bijbel ta bisa cu e ora ei el “a tuma nan den su brasa y a bendiciona nan, poniendo su mannan riba nan.” (Marco 10:13-16) Siendo cu Hesus a dedica tempo na mucha chikito, abo lo no tin cu haci mescos cu bo mes yiunan? Yiunan tin mester di hopi di bo tempo, no djis un poco so de bes en cuando. Bo tin cu tuma tempo pa siña nan, pasobra esei ta loke Yehova ta manda mayornan haci.—Deuteronomio 6:4-9.

15. Kico mayornan por haci pa proteha nan yiunan?

¹⁵ Segun cu e mundo aki ta bira mas y mas malbado, muchanan tin mester di mayornan cu lo proteha nan di  hende cu ta trata di perhudica nan, manera esnan cu ta busca mucha pa abusa di nan sexualmente. Considera con Hesus a proteha su disipelnan, cu el a yama cariñosamente “mucha chikitonan.” Hesus a haci un manera pa nan scapa ora cu hende a bin pa arest’e y mirando cu pronto nan lo a mat’e. (Huan 13:33; 18:7-9) Como mayor, bo mester ta alerta pa e intentonan di Diabel pa perhudica bo yiunan chikito. Bo tin cu spierta bo yiunan di antemano. * (1 Pedro 5:8) Nunca prome nan siguridad fisico, spiritual y moral a core tanto peliger.

16. Kico mayornan por siña for di e manera cu Hesus a trata cu e imperfeccionnan di su disipelnan?

 ¹⁶ E anochi prome cu Hesus a muri, su disipelnan tawata discuti tocante cua di nan a ser considera esun di mas grandi. En bes di rabia cu nan, Hesus amorosamente a sigui haci un yamada riba nan mediante su palabranan y ehempel. (Lucas 22:24-27; Huan 13:3-8) Si bo ta un mayor, bo por mira con lo bo por imita Hesus su ehempel den e manera cu bo ta corigi bo yiunan? Ta berdad cu mucha tin mester di disiplina, pero mester duna nan esei “na e midi apropiado” y nunca cu rabia. Lo bo no kier papia sin pensa “manera hinca di spada.” (Yeremias 30:11, NW; Proverbionan 12:18) Bo mester duna disiplina di tal manera cu bo yiu despues lo mira con apropiado e disiplina tawata.—Efesionan 6:4; Hebreonan 12:9-11.

17. Den ki maneranan Hesus a pone un ehempel perfecto pa yiunan?

¹⁷ Yiunan por siña for di Hesus? Si, nan por! Hesus a demostra pa medio di su propio ehempel con yiunan mester obedece nan mayornan. El a bisa: “Mi ta papia . . . manera e Tata a siña mi.” Anto el a agrega: “Semper mi ta haci e cosnan cu ta agrad’e.” (Huan 8:28, 29) Hesus tawata obediente na su Tata celestial, y Bijbel ta bisa yiunan pa obedece nan mayornan. (Efesionan 6:1-3) Aunke Hesus tawata un mucha perfecto, el a obedece su mayornan humano, Hose y Maria, kendenan tawata imperfecto. Esei sigur a contribui na e felicidad di tur miembro di Hesus su famia!—Lucas 2:4, 5, 51, 52.

18. Dicon Hesus semper a obedece su Tata celestial, y ken ta felis ora cu awe yiunan ta obedece nan mayornan?

¹⁸ Acaso yiunan por mira cosnan cu nan por haci pa nan ta mas manera Hesus y asina haci nan mayornan felis? Ta berdad cu tin biaha hobennan ta haya cu ta dificil pa nan obedece nan mayornan, pero esei ta loke Dios kier pa yiu  haci. (Proverbionan 1:8; 6:20) Hesus semper a obedece su Tata celestial, asta bou di circunstancia dificil. Un biaha, ora cu Dios su boluntad tawata pa Hesus haci un cos hopi dificil, Hesus a bisa: “Kita e copa aki [un cierto rekisito] for di mi.” Pero toch, Hesus a haci loke Dios a pidie pasobra el a realisa cu su Tata tawata sa kico ta mihor p’e den e situacion ei. (Lucas 22:42) Door di siña ta obediente, yiunan lo haci nan mayornan y nan Tata celestial hopi felis. *—Proverbionan 23:22-25.

19. (a) Con Satanas ta pone tentacion pa yiunan? (b) Ki efecto mal comportacion di yiu por tin riba mayornan?

¹⁹ Diabel a tenta Hesus, y nos por ta sigur cu lo e tenta hobennan tambe pa haci loke ta malo. (Mateo 4:1-10) Satanas e Diabel ta uza presion di otro hoben, locual por ta un cos duro pa resisti. Ta masha importante anto pa yiunan no anda cu hende cu ta haci malo! (1 Corintionan 15:33) Yacob su yiu mohe Dina a anda cu hende cu no tawata adora Yehova, y esaki a hiba na hopi problema. (Genesis 34:1, 2) Pensa con un famia lo sufri si un di su miembronan lo mester hay’e envolvi den inmoralidad sexual!—Proverbionan 17:21, 25.

20. Pa gosa di un bida di famia felis, kico cada miembro tin cu haci?

²⁰ Ta mas facil pa enfrenta problemanan di famia cu exito ora cu ta aplica conseho di Bijbel. De echo, aplicacion di tal conseho ta e yabi pa felicidad den famia. Pues esposonan, stima boso esposa, y trat’e manera Hesus ta trata su congregacion. Esposanan, somete na e autoridad di boso esposo como e cabes, y sigui e ehempel di e esposa capas describi na Proverbionan 31:10-31. Mayornan, instrui boso yiunan. (Proverbionan 22:6) Tatanan, ‘maneha boso mes cas bon.’ (1 Timoteo 3:4, 5; 5:8) Y yiunan, obedece boso mayornan. (Colosensenan 3:20) Ningun hende den e famia no ta perfecto, pasobra tur ta comete eror. Pesei sea humilde y pidi otro pordon.

21. Ki perspectiva maraviyoso tin nos dilanti, y con nos por gosa for di awor di un bida di famia felis?

²¹ Bijbel en berdad ta contene un abundancia di conseho y instruccion balioso relaciona cu bida di famia. Ademas, e ta siña nos tocante Dios su mundo nobo y un paradijs riba tera cu lo ta yen di hende felis cu ta adora Yehova. (Revelacion 21:3, 4) Ki un perspectiva maraviyoso tin nos dilanti! Pero for di awor, nos por gosa di un bida di famia felis door di aplica e instruccionnan di Dios cu tin den su Palabra, Bijbel.