LES 11
Nan A Skirbi Tocante Hesus
Bo ta mira e hendenan riba e plachi?— Nan nomber ta Mateo, Marco, Lucas, Juan, Pedro, Santiago, Judas y Pablo. Nan tur a biba na e mesun tempo cu Hesus y nan a skirbi di Hesus. Ban lesa mas di nan.
Kico bo sa di e hendenan aki?
Tres di nan tabata apostel cu a predica cu Hesus. Bo sa ken nan ta?— Mateo, Juan y Pedro. Apostel Mateo y apostel Juan tabata conoce Hesus hopi bon y tur dos a skirbi un buki tocante e bida di Hesus den Bijbel. Apostel Juan a skirbi un buki tambe cu yama Revelacion, y tres carta cu yama Prome Juan, Di Dos Juan y Di Tres Juan. Apostel Pedro a skirbi dos di e cartanan cu tin den Bijbel. Nan yama Prome Pedro y Di Dos Pedro. Den su di dos carta, Pedro a conta con un biaha Jehova a papia for di cielo y bisa asin’aki, papiando di Hesus: ‘Esaki ta mi yiu. Mi ta stim’e y mi ta orguyoso di dje.’
E otro hendenan riba e plachi tambe ta siña nos tocante Hesus den e bukinan cu nan a skirbi. Un di nan yama Marco. Ora e hendenan a bin aresta Hesus, casi sigur Marco tabat’ey y a mira tur loke a pasa. Un otro yama Lucas. E tabata dokter y parce cu ta despues cu Hesus a muri el a bira cristian, esta, un hende cu ta obedece Hesus.
Dos otro hende cu a skirbi Bijbel cu tin riba e plachi ta ruman chikito di Hesus. Bo sa nan nomber?— Nan yama Santiago y Judas. Prome, nan no tabata kere den Hesus. Nan a hasta kere cu el a bira un tiki loco. Pero despues si nan a kere den Hesus y a bira cristian.
E ultimo hende cu a skirbi Bijbel cu nos falta riba e plachi yama Pablo. Prome cu el a bira cristian, su nomber tabata Saulo. E tabatin rabia riba cristian y e tabata haci hopi cos di abuso cu nan. Bo sa ta kico a pone cu Pablo kier a bira cristian?— Un dia, Pablo tabata canando pa bay un stad cu yama Damasco, anto diripiente el a tende un stem ta papia cu ne for di cielo. Ta Hesus tabata papiando! El a puntra Pablo: ‘Pakico bo ta haci tanto cos malo cu e hendenan cu ta kere den mi?’ Despues di esey, Pablo a cambia y a bira cristian. Pablo a skirbi 14 buki di Bijbel, di Romanonan te cu Hebreonan.
Nos ta lesa Bijbel tur dia, no?— Asina nos ta siña hopi cos di Hesus. Abo kier siña mas tocante Hesus?—
