Astrologia ta un forma di adivinacion basa riba e creencia cu e streanan, luna y e planetanan tin hopi influencia riba bida di hende aki riba Tera. Astrologonan ta bisa cu e posicion di e cuerponan celestial na momento cu un hende nace ta determina su personalidad y futuro.

Aunke astrologia a origina di Babilonia di antiguedad, e ta popular te awe. Segun un encuesta cu nan a haci na Merca na aña 2012, mas o menos 33 porciento di esnan cu a participa na e encuesta tabata pensa cu astrologia ta “parce algo cientifico”, y 10 porciento a bisa cu e “ta cientifico.” Pero e ta algo cientifico? No. Ban wak dicon.

• E planeta- y streanan no tin poder pa influencia hende manera e astrologonan ta bisa.

• Hopi biaha loke nan ta predeci ta asina general cu esaki por aplica na cualkier persona.

• E calculacionnan astrologico cu nan ta haci ta basa riba e creencia di antes cu e planetanan ta draai rond di Tera. Pero eigenlijk, e planetanan ta draai rond di solo.

• Loke diferente astrologo ta predeci pa e mesun hende no ta cuadra.

• Astrologia ta clasifica hende den 12 categoria, of signo di zodiak, segun nan fecha di nacemento; cada fecha ta basa riba posicion di solo. Como cu e inclinacion di planeta Tera a cambia den espacio a traves di siglonan, e fechanan cu nan a duna cada signo di zodiak ya no ta cuadra mas cu e nomber cu nan a haya segun e posicion di solo den e constelacionnan.

Ta ser bisa cu e signonan di zodiak por yuda un hende haya sa e caracter di un persona. Pero eigenlijk, hende cu a nace riba e mesun dia no tin e mesun cualidadnan; e fecha di nacemento di un hende no ta bisa nada di su personalidad. En bes di mira hende manera nan ta realmente, astrologonan ta husga un persona su comportacion y caracter a base di suposicion. Acaso esey no ta un forma di prehuicio?

For di hopi tempo caba hende tabata acudi na mirado di destino. Algun di nan ta busca nificacion den, entre otro, shirishiri di bestia y di hende of den e manera cu gay ta come maishi. Otronan ta predeci a base di patronchi di cachicachi di te of di cofi cu a keda den un copi. Awe nan ta uza carta di tarot, bola di cristal, dou y otro medionan pa wak futuro di un hende. Pero esaki ta un manera confiabel pa haya sa futuro? Claro cu no. Laga nos rasona riba e asunto aki.

Laga nos wak si miradonan di destino ta consistente. Hopi biaha ora miradonan di destino uza diferente metodo pa predeci futuro, nan ta contradeci otro. Y hasta ora nan uza e mesun metodo, loke nan ta predeci no ta mescos. Por ehempel, si un hende haci e mesun pregunta na dos mirado di destino cu ta uza e mesun tipo di carta, logicamente e contesta mester ta mescos. Pero mayoria di biaha esey no ta e caso.

Tanto e metodonan cu miradonan di destino ta uza como nan intencionnan ta cuestionabel. Tin critico ta bisa cu miradonan di destino ta “lesa” reaccion di hende y cu e cartanan of bolanan di cristal cu nan ta uza ta sirbi djis pa pronk. Por ehempel, un mirado di destino profesional lo haci preguntanan general y ta observa cuidadosamente kico e cliente ta bisa of haci. Despues e mirado di destino ta uza e mesun informacion ey cu e cliente mes a caba di revela na dje, sin cu el a ripara, pa pronostica su futuro. Unabes cu e mirado di destino a gana confianza di su cliente, e por logra ranca masha hopi placa for di dje.

E practica di astrologia y wakmento di destino ta basa riba e creencia cu nos futuro ta predestina. Pero esey ta berdad? Bijbel ta bisa cu nos por scoge kico nos kier haci y kere, y cu nos decisionnan tin efecto riba nos futuro.—Josue 24:15.

Adoradornan di Dios tin un otro motibo pa no kere den astrologia y wakmento di destino. E motibo ta cu Dios ta condena tur forma di adivinacion. Wak kico Bijbel ta bisa: “Entre boso no mag wordo haya ningun hende ... cu ta practica adivinacion of cu ta practica bruheria, of cu ta pronostica, of cu ta practica magia, ni ningun hende cu ta plega hende, of cu ta montado of spiritista, of cu ta consulta cu e mortonan. Pasobra ken cu haci e cosnan aki ta un abominacion na SEÑOR.” a—Deuteronomio 18:10-12.