Den Bijbel tin texto cu ta consola nos y cu por duna nos e forsa cu nos tin mester pa trata cu pensamentonan negativo. Ademas, Bijbel ta sigura nos cu pronto nos lo no tin cu lucha cu dolor emocional mas.

Nos tur por sinti nos tristo of ansha de bes en cuando, pero hende cu ta sufri di depresion of ansiedad por ta luchando tur dia cu dolor emocional persistente. Con Bijbel por yuda?

• Bijbel por yuda nos cambia nos pensamentonan negativo pa pensamentonan positivo. (Filipensenan 4:8) E por yena nos mente cu pensamento cu ta consola nos y trankilisa nos, loke por yuda nos domina nos emocionnan.—Salmo 94:18, 19.

• Bijbel por yuda nos stop di pensa cu nos no ta bal nada.—Lucas 12:6, 7.

• Tin hopi relato den Bijbel cu ta sigura nos cu nos no ta nos so y cu Dios, nos Creador, ta compronde nos sintimentonan completamente.—Salmo 34:18; 1 Juan 3:19, 20.

• Bijbel ta priminti cu Dios lo kita tur recuerdo doloroso. (Isaias 65:17; Revelacion 21:4) Na momentonan cu nos ta haya pensamento- y emocionnan angustioso, e promesa aki por duna nos e forsa cu nos tin mester pa persevera.