1. (a) Resumi brevemente e ilustracion di e trigo y mal yerba. (b) Con Hesus a splica e ilustracion?

 UN DI Hesus su ilustracionnan tocante e Reino di cielo ta papia di un homber cu a sembra bon simia den su cunucu y di un enemigo cu a sembra mal yerba den e mesun cunucu ey despues. E mal yerba ta crece y bira asina hopi cu casi bo no por mira e trigo, pero e cunukero ta bisa su esclavonan pa “laga tur dos crece hunto te na e cosecha.” Durante e tempo di cosecha, e ta laga destrui e mal yerba y recoge e trigo. Anto Hesus mes a splica e ilustracion. (Lesa Mateo 13:24-30, 37-43.) Kico e ilustracion aki ta siña nos? (Wak e cuadro “Trigo y Mal Yerba.”)

2. (a) Ki sucesonan relaciona cu e Reino di Dios e ilustracion di e trigo y mal yerba ta yuda nos compronde? (b) Cua parti di e ilustracion e articulo aki lo analisa?

² Loke ta sosode den e cunucu ey ta ilustra con y na ki tempo Hesus lo recoge e trigo—tur e cristiannan ungi cu lo goberna hunto cu ne den su Reino—for di humanidad. Hesus a cuminsa sembra e bon simia aki na Pentecoste di aña 33 di nos era. Y e cosecha, of recogemento di e trigo, lo yega su final ora cu tur ruman ungi cu ta riba tera na fin di e era aki ricibi nan seyo final y ser tuma den cielo. (Mat. 24:31; Rev. 7:1-4) E ilustracion aki ta mescos cu un sero halto. Con asina? Wel, ora un hende ta para riba un sero halto, e ta haya un bon bista riba tur loke tin rond di dje. Di mes manera, e ilustracion aki ta yuda nos haya un mihor comprondemento di sucesonan cu mester tuma luga durante un periodo di mas o menos 2.000 aña. Awor, ki sucesonan relaciona cu e Reino di Dios e ta yuda nos discerni y compronde? Wel, e ilustracion ta papia di un tempo di sembramento, un tempo di crecemento y di un tempo di cosecha. E articulo aki lo enfoca principalmente riba e tempo di cosecha. *

3. (a) Kico a pasa despues di prome siglo? (b) Ki pregunta nos ta haya na Mateo 13:28, y ken a haci e pregunta ey? (Wak nota 2 tambe.)

³ Na comienso di siglo 2 di nos era, “mal yerba”, esta cristiannan falso, a cuminsa aparece. (Mat. 13:26) Pa siglo 4, ya caba tabatin hopi mas “mal yerba” cu cristian  ungi. Den e ilustracion, e esclavonan a pidi nan doño permiso pa nan ranca e mal yerba. * (Mat. 13:28) Con e doño a reacciona?

4. (a) Kico e mandato di e Doño, esta Hesus, ta laga nos compronde? (b) For di ki tempo a bira posibel atrobe pa identifica e cristiannan cu ta forma parti di e trigo?

⁴ Relaciona cu e trigo y mal yerba, Hesus a bisa: “Laga tur dos crece hunto te na e cosecha.” E mandato aki ta mustra cu for di prome siglo te cu awor semper tabatin trigo, of cristian ungi, riba tera. Y Hesus a confirma esaki ora el a bisa su discipelnan: “Mi ta cu boso tur e dianan, te na conclusion di e era aki.” (Mat. 28:20) Pues, Hesus lo a sigui proteha e cristiannan ungi te na final. Pero como cu mal yerba, esta cristiannan falso, a abunda asina hopi, nos no sa sigur ken tabata forma parti di e grupo di cristian ungi durante e periodo largo ey. Pero un 40 aña prome cu e tempo di cosecha a cuminsa, a bira posibel atrobe pa identifica e cristiannan cu ta forma parti di e trigo. Con bin?

5. Con e profecia di Malakias a cumpli den prome siglo?

⁵ Hopi siglo prome cu Hesus a conta e ilustracion di e trigo y mal yerba, Jehova a inspira Malakias pa profetisa un serie di suceso cu e profecia di Hesus tambe ta referi na dje. (Lesa Malakias 3:1-4.) Juan Bautista tabata e ‘mensahero cu a prepara e caminda.’ (Mat. 11:10, 11) Y ora Juan Bautista a yega na aña 29 di nos era, e tempo pa e nacion di Israel ser husga tabata cerca. E di dos mensahero cu e profecia di Malakias a papia di dje tabata Hesus. Hesus a haci e tempel na Jerusalem limpi na dos ocasion: Prome, na comienso di su sirbishi, y despues, na final di su sirbishi aki riba tera. (Mat. 21:12, 13;  Juan 2:14-17) Pues, Hesus a tuma un lapso di tempo, di aña 29 di nos era pa aña 33, pa inspecciona y haci e tempel na Jerusalem limpi.

6. (a) Con e profecia di Malakias a haya su mayor cumplimento? (b) Durante cua periodo Hesus a inspecciona e tempel spiritual? (Wak nota 3 tambe.)

⁶ Awor, con e profecia di Malakias a haya su mayor cumplimento? Pa hopi aña prome cu 1914, C. T. Russell y su coleganan, kendenan tabata conoci como Studiantenan di Bijbel, a haci un trabou parecido na esun di Juan Bautista. Nan tabata studia Bijbel pa nan por haya sa e berdad y siña esaki na otronan. Por ehempel, nan tabata siña hende e berdadero nificacion di Cristo su sacrificio di rescate, cu fierno di candela no ta existi y cu e tempo stipula di e nacionnan tabata yegando su final. Pero tabatin hopi grupo religioso mas cu tabata bisa cu nan ta siguidor di Cristo. Pesey a surgi un pregunta masha importante cu mester a haya contesta: Cua di e gruponan aki tabata e trigo cu Bijbel ta papia di dje? Pa contesta e pregunta ey, Hesus a cuminsa inspecciona e tempel spiritual na 1914. Y el a termina su inspeccion y e trabou di limpieza, of purificacion spiritual, ey na comienso di aña 1919. Pues, su trabou a dura di 1914 pa 1919. *

7. Kico Hesus a tuma nota di dje ora el a cuminsa su inspeccion na 1914?

⁷ Awor kico Hesus a tuma nota di dje ora el a cuminsa haci su inspeccion? Wel, cu tabatin un grupo chikito di Studiante di Bijbel cu tabatin mas cu 30 aña ta uza nan energia y placa pa promove e trabou di predica y cu tabata proclama e bon noticia celosamente. * Sin duda, Hesus y su angelnan lo a keda masha contento ora nan a mira con e  grupo masha chikito aki—cu tabata manera stengelnan stabiel di trigo—a keda firme y no a permiti mal yerba di Satanas stik nan! Pero ainda mester a “purifica e yiu hombernan di Levi”, esta, e cristiannan ungi. (Mal. 3:2, 3; 1 Ped. 4:17) Dicon?

8. Kico a sosode despues di 1914?

⁸ Na final di 1914, algun Studiante di Bijbel tabata masha desanima pasobra nan no a bay cielo. Ademas, oposicion di hende pafo di e congregacion a pone cu e trabou di predica a bira menos durante aña 1915 y 1916. Pio ainda, despues di e morto di Ruman Russell na october 1916, rumannan den e organisacion mes a cuminsa opone otro. Cuater di e shete personanan cu tabata den e directiva di Watch Tower Bible and Tract Society a rebela ora a scoge Ruman Rutherford pa dirigi e organisacion. Nan a purba di causa desunion entre e rumannan, pero na augustus 1917, nan a bandona Betel. Esaki sigur tabata un manera cu e organisacion a ser purifica, of haci limpi. Y algun otro Studiante di Bijbel a stop di sirbi Jehova pa motibo di miedo di hende. No obstante, hopi Studiante di Bijbel a reacciona bon na Hesus su trabou di limpieza y a haci e cambionan necesario pa nan por tabata limpi den bista di Jehova. Pesey, Hesus, na su turno, a determina cu nan ta e trigo, esta e cristiannan berdadero, y a rechasa tur cristian falso, tanto esnan cu tabata den e congregacion cristian como esnan cu tabata forma parti di cristiandad. (Mal. 3:5; 2 Tim. 2:19) Kico a sosode despues? Pa nos por haya sa esey, laga nos bay bek na e ilustracion di e trigo y mal yerba.

9, 10. (a) Cua rasgo di e tempo di cosecha nos lo analisa awor? (b) Kico ta e prome cos cu a tuma luga durante e tempo di cosecha?

⁹ Hesus a bisa: “E cosecha ta conclusion di un era.” (Mat. 13:39) Y e tempo di cosecha ey a cuminsa na 1914. Pa nos por sa kico tin cu tuma luga durante e tempo di cosecha, laga nos analisa cinco rasgo di e tempo di cosecha cu Hesus a profetisa di dje.

¹⁰ Prome, e trabou di ranca e mal yerba. Hesus a bisa: “Den tempo di cosecha, lo mi bisa e cosechadonan: Ranca e mal yerba prome y mara nan na bulto.” Despues di 1914, Hesus su angelnan a cuminsa “ranca” e mal yerba, esta, cristiannan falso, separando nan asina for di “e yiunan di Reino”, cu ta e cristiannan ungi.—Mat. 13:30, 38, 41.

11. Te awe, kico ta distingui cristiannan berdadero for di esnan falso?

¹¹ Segun cu e trabou di ranca mal yerba a sigui, a bira mas facil pa distingui e trigo for di mal yerba. (Rev. 18:1, 4) Pa 1919, tabata bisto cu Babilonia e Grandi a cay, den e sentido cu cristiannan berdadero a sali for di su gara. Awor, kico specialmente a distingui cristiannan berdadero for di tur otro hende cu tabata yama nan mes cristian? E trabou di predica. E Studiantenan di Bijbel cu tabata dirigi e organisacion e tempo ey a cuminsa mustra cu ta masha importante pa tur miembro di congregacion participa den e trabou di predica e Reino. Por ehempel na 1919, nan a publica un pamfleta (na Ingles), titula Pa Esnan Cu A Ser Encarga cu e Trabou di Predica, cu a urgi tur cristian ungi pa predica di cas pa cas. E pamfleta a bisa: ‘Aunke e trabou nos dilanti por parce algo imposibel pa cumpli cu ne, cu yudansa di Señor nos lo hacie pasobra ta Señor su trabou. Boso tambe tin e privilegio di participa den e trabou aki.’ Con e Studiantenan di Bijbel a reacciona? Un Toren di Vigilancia di 1922 a bisa cu desde e tempo ey padilanti e studiantenan di Bijbel a cuminsa haci mas den e trabou di predica. Y no a dura mucho cu e cristiannan fiel ey a bira conoci pa e trabou di predica di cas pa cas, y te awe cristiannan berdadero ta conoci pa e trabou ey.

12. For di ki tempo e trigo ta ser recogi?

¹² Di dos, e trabou di recoge y warda e  trigo. Hesus a bisa su angelnan: “Bay y recoge e trigo y ward’e den mi mangashina.” (Mat. 13:30) For di 1919, Hesus su angelnan ta recoge e trigo, e unginan, y trece, of warda, nan den e congregacion cristian cu a ser haci limpi. E cristiannan ungi cu lo ta na bida ora e mundo malbado aki yega na su fin lo ser recogi definitivamente na momento cu nan ser tuma den cielo.—Dan. 7:18, 22, 27.

13. Segun Revelacion 18:7, ki actitud e prostituta, of Babilonia e Grandi, incluso cristiandad, tin actualmente?

¹³ Di tres, yoramento y mordemento riba djente. Kico lo sosode despues cu e angelnan caba di mara e mal yerba na bulto? Ora Hesus tabata papiando di e mal yerba, el a bisa: “Ey ta caminda nan lo yora y morde riba djente.” (Mat. 13:42) Esey ta tumando luga actualmente? No, pasobra e prostituta cu e buki di Revelacion ta papia di dje ta simbolisa cristiandad tambe. Y te awe, cristiandad ta bisa di su mes: “Mi ta sinta manera un reina riba un trono, y mi no ta viuda y hamas lo mi mira tristeza.” (Rev. 18:7) Si, te ainda cristiandad ta sinti cu e tin poder y ta hasta pretende cu e ta “sinta manera un reina” cu tin poder riba lidernan politico. Pues, actualmente, esnan cu ta representa e mal yerba ta gabando keto bay; nan no ta yorando. Pero nan situacion lo cambia pronto.

14. (a) Na ki tempo y dicon supuesto cristiannan lo ‘morde riba nan djente’? (b) Dicon nos por bisa cu e splicacion nobo aki di Mateo 13:42 ta na harmonia cu Salmo 112:10? (Wak nota 5.)

¹⁴ Durante e tribulacion grandi, despues cu tur religion falso ser destrui, nan miembronan lo core busca caminda pa sconde, pero nan lo no ta safe niun caminda. (Luc. 23:30; Rev. 6:15-17) Anto ta e ora ey, ora nan realisa cu nan lo no por scapa e destruccion, nan lo yora di desesperacion y ‘morde riba nan djente’ di rabia. Ta manera Hesus a bisa den su profecia tocante e tribulacion grandi: Na e momento scur ey, nan “lo bati nan pecho di tristeza.” *—Mat. 24:30; Rev. 1:7.

15. Kico lo pasa cu e mal yerba, y na ki tempo esey lo sosode?

¹⁵ Di cuater, tiramento di mal yerba den forno di candela. Kico lo pasa cu e bultonan di mal yerba? E angelnan “lo tira nan den e forno di candela.” (Mat. 13:42) Esey ta nifica cu nan lo ser destrui completamente. Pues, tur esnan cu tabata forma parti di religion falso lo ser destrui durante e parti final di e tribulacion grandi, esta, na Armagedon.—Mal. 4:1.

16, 17. (a) Cua ta e ultimo suceso cu Hesus a menciona den su ilustracion? (b) Con bin nos a yega na e conclusion cu esey lo cumpli den futuro?

¹⁶ Di cinco, e hustonan lo briya. Hesus a termina su profecia bisando: “Na e tempo  ey, e hustonan lo briya manera solo den e Reino di nan Tata.” (Mat. 13:43) Unda y na ki tempo esaki lo sosode? E parti aki di e profecia di Hesus lo cumpli den futuro y den cielo, y no riba tera! * Tin dos motibo pakico nos a yega na e conclusion aki.

¹⁷ Prome, laga nos wak “na ki tempo” e palabranan ey di Hesus lo cumpli. Hesus a bisa: “Na e tempo ey, e hustonan lo briya.” E expresion “na e tempo ey” indudablemente ta referi na e suceso cu Hesus a caba di menciona, esta, e ‘tiramento di e mal yerba den forno di candela.’ Y esaki lo sosode durante e parti final di e tribulacion grandi. Pues, ta na e mesun tempo ey den futuro e rumannan ungi “lo briya.” Awor, na unda nan lo briya? Hesus a bisa cu e hustonan lo ‘briya den e Reino.’ Kico esey ta nifica? Tur e fiel unginan cu ainda lo ta riba tera despues di e prome parti di e tribulacion grandi, kendenan ya caba a ricibi nan seyo final, lo ser tuma den cielo, manera Hesus a indica den su profecia tocante e tribulacion grandi. (Mat. 24:31) Eynan, esta den cielo, nan lo briya “den e Reino di nan Tata.” Anto, ta eynan tambe ta caminda cu poco despues di e guera di Armagedon, nan lo forma parti di e bruid gososo di Hesus na “e casamento di e Lamchi.”—Rev. 19:6-9.

18, 19. Den ki manera e splicacion tocante Hesus su ilustracion di e trigo y mal yerba ta beneficia nos?

¹⁸ Awor, con e ilustracion aki por beneficia cada un di nos? Tin por lo menos tres manera. Di prome, e ta yuda nos compronde pakico Jehova no a destrui e malbadonan ainda. Jehova ta soporta e “pochinan di rabia” aki pa e por recoge e “pochinan di misericordia”—e cristiannan ungi cu e trigo ta simbolisa. * (Rom. 9:22-24) Di dos, e ilustracion ta haci nos fe mas fuerte. Segun cu e fin ta yega cerca, nos enemigonan lo intensifica nan atakenan contra nos, pero “nan lo no vence” nos. (Lesa Jeremias 1:19.) Dicon no? Pasobra nos tin e confianza cu mescos cu nos Tata celestial, Jehova, a proteha e cristiannan ungi—e trigo—a traves di añanan, lo e proteha nos tambe pa medio di Hesus y e angelnan “tur e dianan” te na e fin.—Mat. 28:20.

¹⁹ Di tres, e ilustracion aki ta yuda nos identifica e trigo. Dicon ta masha importante pa sa ken e trigo ta representa? Pasobra ora nos sa esey, nos por contesta un otro pregunta cu Hesus a haci den su profecia tocante e ultimo dianan. Hesus a puntra: “Ken realmente ta e esclavo fiel y prudente?” (Mat. 24:45) E siguiente dos articulonan lo contesta e pregunta ey.