TA PARCE cu tur dia tin noticia tocante desaster natural. Compara cu antes, awendia hopi mas hende ta bira victima di un of otro calamidad. E Centro di Investigacion di Desaster na Belgica a raporta cu na aña 2010 so tabatin 373 desaster y cu por lo menos 296.000 hende a muri den esakinan.

Si, e cantidad di desaster natural cu a ser raporta e ultimo decadanan a aumenta drasticamente. Por ehempel, entre 1975 y 1999, nan a raporta por lo menos 300 desaster. Sinembargo, entre 2000 y 2010, e promedio tabata casi 400 pa aña. Kisas bo tambe ta un di e personanan cu a yega di puntra, ‘Dicon tin asina tanto desaster awe?’

Hopi biaha hende ta culpa Dios pa e desasternan natural cu ta asota mundo; nan ta bisa cu esakinan ta “obra di Dios.” Pero esey no ta berdad. No ta Dios ta causa e calamidadnan cu ta afecta asina tanto hende awe. Ta cierto si cu Bijbel a profetisa cu lo tin desaster den nos tempo. Por ehempel, na Mateo 24:7 y 8 Hesus a bisa cu “lo tin scarsedad di cuminda y temblor den un luga tras di otro. Tur e cosnan aki ta cuminsamento di calamidad, manera dolor di parto.” Dicon Hesus a profetisa e sucesonan aki, y kico esaki ta nifica pa nos?

E profecianan aki ta parti di e contesta cu Hesus, e Yiu di Dios, a duna su discipelnan riba e pregunta: “Kico lo ta e señal di bo presencia y di conclusion di e era aki?” (Mateo 24:3) El a menciona varios cos cu lo mester a sosode, incluso e calamidadnan cu nos a papia di dje. Despues, el a expresa algun palabra cu tin gran nificacion pa nos. El a bisa: “Ora boso mira e cosnan aki sosode, boso por ta sigur cu e Reino di Dios ta cerca.” (Lucas 21:31) Si, desasternan natural ta señala na e tempo cu cambionan historico lo tuma luga, y esey lo ta pronto.

No obstante, hopi hende ta keda puntra nan mes, ‘Si no ta Dios ta responsabel pa e desasternan aki, ta ken of kico ta causa nan anto?’ Nos por compronde e contesta di e pregunta ey solamente ora nos acepta un berdad di Bijbel  masha importante, esta, cu “henter mundo ta den poder di e Malbado.” (1 Juan 5:19) E palabranan ey ta laga nos compronde cu no ta Dios ta responsabel pa e situacionnan cu ta causa angustia den mundo; mas bien, hopi biaha esun responsabel ta su enemigo, “e Malbado”, kende Bijbel ta yama tambe “Diabel.”​—Revelacion 12:9, 12.

Como cu e enemigo aki ta masha egoista, bida di hende no tin ningun balor p’e. Y debi cu henter mundo ta bou di su control, e ta fomenta e mesun actitud ey den hende. Bijbel a indica cu hende lo tin e actitud ey den “e ultimo dianan”, bisando cu hende lo ‘stima nan mes, stima placa, y cu nan lo ta bromado y arogante.’ (2 Timoteo 3:1, 2) Pues no ta nada straño cu Diabel a crea un mundo cu ta domina pa e caracteristicanan aki y otro mal cualidadnan. E ta instiga hende pa uza e recursonan di tera na un manera egoista, y como resultado, hopi bes hende ta haya nan obliga di biba den zona di peliger.

Awor, den ki manera e mundo golos djawe ta contribui na desaster? Wel, un raport di Nacionnan Uni tocante desaster mundial ta bisa: ‘Hopi hende ta bibando den zona di peliger, por ehempel den areanan vulnerabel pa inundacion. Ademas, hende ta rosa mondi y destrui areanan di moeras, loke ta haci daño na e medioambiente y pone cu e areanan aki ta bira vulnerabel pa calamidad. Laga nos no papia mes di e gasnan dañino cu hende ta contamina e medioambiente cu ne y cu ta cambia clima di mundo, pone nivel di lama sigui subi y atmosfera bira mas y mas cayente.’ Y maske hende ta bisa cu hopi di e cosnan cu nan ta haci ta na beneficio di economia, en realidad, loke ta motiva nan ta egoismo y golosidad, caracteristicanan cu ta masha comun den mundo.

Pesey, hopi experto ta admiti awor cu pa motibo di e actividadnan descabeya di hende, desasternan ta bira mas destructivo. En realidad, hende ta apoya Diabel den su intento pa aumenta e sufrimento cu desaster ta causa.

Ta bisto anto cu hopi desaster ta tuma luga pa motibo di hende su echonan iresponsabel. Por ehempel, algun desaster lo no tabata asina destructivo si no tabata pa e sitio caminda nan a tuma luga. Ademas, hopi hende ta haya nan obliga di biba den areanan peligroso debi na nan situacion economico y social. Si, na hopi parti di mundo, ta hende sin escrupulo a pone cu desaster natural ta causa mas destruccion y sufrimento. Mester bisa si cu no ta tur biaha hende ta sufri den desaster debi na falta of negligencia di un cierto persona; tin biaha hende ta sufri pa motibo cu “suceso imprevisto ta cay riba [nos] tur.”​—Eclesiastes 9:11, NW.

Pero lo yega un dia cu lo no tin desaster mas? Laga nos ban wak kico Bijbel tin di bisa di e asunto aki.