MAINTA trempan ora cu solo a sali, Debora tabata para riba Sero Tabor y tabata wak e soldaatnan y nan lider Barak. Nan fe y curashi a impresiona Debora. Aunke nan tabata 10.000 soldaat, e dia ey algo lo a bay pasa cu lo a test nan fe y curashi. Nan lo mester a bringa contra un enemigo cruel cu tabatin hopi mas soldaat y arma cu nan. Pero danki na e animacion cu Debora a duna nan, nan tabata cla pa bringa.

Imagina Debora y Barak para riba Sero Tabor ta wak e bunita panorama, mientras cu biento ta supla y waya Debora su bisti. E sero ey ta mas o menos 400 meter halto y su top ta plat. For di eyriba bo por mira e vaye di Esdrelon cu ta extende te na e parti zuidwest. Bo ta mira tambe Rooi Kison cu ta core door di e sabana ey bay te na Lama Grandi banda di Sero Carmelo. Nan por a mira algo ta blink den e rooi pero no tabata awa pasobra e mainta ey e rooi tabata seco. Pero ta kico tabata blink anto? Wel, tabata e cuchiunan di hero na e as di e wielnan di e 900 garoshinan di guera di Sisara su ehercito cu tabata acercando. Sisara su intencion tabata pa caba cu e Israelitanan na un manera cruel y lihe.

Debora tabata sa cu Barak y su soldaatnan tabata wardando riba dje pa e bisa nan kico pa haci. Acaso e tabata e unico hende muher eynan? Con lo el a sinti cu e mester a carga un responsabilidad asina grandi bou di e circunstancia ey? Of kisas e tabata puntra su mes ta pakico e ta eynan? Claro cu no, pasobra ta Jehova Dios mes a bis’e pa cuminsa cu e guera ey. Ademas, el a bisa tambe cu lo e uza un hende muher pa pone un fin na e guera. (Huesnan 4:9) Kico Debora y e soldaatnan yen di curashi ey por siña nos tocante fe?

Ora cu Bijbel ta menciona Debora pa prome biaha, Bijbel ta referi na dje como “un profeta.” Esaki ta haci Debora special pasobra no tabata comun pa hende muher ta profeta. * Pero Debora tabatin un otro responsabilidad mas. Si un problema a presenta, e tabata soluciona e diferencia di opinion cu yudansa di Jehova.—Huesnan 4:4, 5.

Debora tabata biba den e region di Efraim cu ta yen di sero. E region aki ta keda entre dos stad, esta, Bet-el y Rama. Eynan e tabata sinta bou di un mata di palma, y e tabata yuda e hendenan cu Jehova su yudansa. Ta berdad cu su asignacion no tabata facil, pero Debora no a laga esey intimid’e. Su trabou tabata hopi importante. Dado momento, bou di inspiracion di Dios, el a compone un cantica cu tabatin e siguiente comentario tocante e Israelitanan infiel: “Ki ora ku nan a skohe diosnan nobo, tabatin guera den e siudatnan.” (Huesnan 5:8, BPK) Como cu nan a sirbi otro diosnan, Jehova a permiti nan cay den man di nan enemigonan. E Rey Cananeo Jabin a uza e general poderoso Sisara pa oprimi nan.

Asina cu e Israelitanan a tende e nomber di Sisara, nan tabata drenta panico. E religion y cultura di e Cananeonan tabata cruel ya cu nan tabata  sacrifica mucha y tambe nan tabata comete prostitucion den tempel. Con bida bou di dominio di un general Cananeo y su ehercito tabata? E cantica di Debora ta mustra nos cu tabata casi imposibel pa biaha den e region ey y casi no tabatin hende ta biba den e cunucunan mas. (Huesnan 5:6, 7) Nos por imagina con hende tabata sconde den mondi y seronan, y tabatin miedo di traha den cunucu of biba den pueblitonan cu no tabata completamente cera cu muraya. Tambe nos por imagina cu nan no kier a biaha riba e camindanan grandi pa e Cananeonan no ataca nan, secuestra nan yiunan ni viola nan esposanan. *

E Israelitanan a biba den teror, pa 20 aña largo, te ora cu Jehova a mira cu su pueblo cabesura tabata cla pa cambia of, manera e cantica di Debora y Barak ta bisa: “Mi a lanta; ami, Debora, un mama pa Israel.” Nos no sa si Debora, e esposa di un homber cu yama Lapidot, tabata un mama den sentido literal. Loke si nos sa ta cu e expresion aki ta figurativo, ya cu Jehova a duna Debora e responsabilidad pa proteha e nacion manera un mama ta proteha su yiunan. El a encarga Debora pa busca un homber fuerte yen di fe y bis’e pa bay bringa contra Sisara. Ken e homber ey tabata? Hues Barak.—Huesnan 4:3, 6, 7; 5:7, BPK.

Jehova a bisa Barak mediante Debora: “Marcha bay Sero Tabor.” Barak mester a scoge 10.000 homber for di dos di e tribunan di Israel. Debora a bis’e cu Dios a priminti cu nan lo gana e bataya contra e ehercito poderoso di Sisara cu su 900 garoshinan di guera. Sin duda e promesa ey a sorprende Barak pasobra di baina nan tabatin soldaat y arma. Toch Barak a bay di acuerdo pa bringa, basta Debora bay Sero Tabor cu nan.—Huesnan 4:6-8; 5:6-8.

Tin hende ta pensa cu e echo cu Barak tabata kier pa Debora bay cu ne ta mustra cu e no tabatin fe, pero esey no ta berdad pasobra e no a pidi Dios pa mas arma. Mas bien, como un homber di fe, Barak a mira e balor di tin un representante di Jehova eynan pa fortalece tanto e mes como su soldaatnan. (Hebreonan 11:32, 33) Jehova a bay di acuerdo y a laga Debora bay cu Barak. Sinembargo, Jehova a laga Debora profetisa cu no ta un homber sino un hende muher lo haya e honor pa mata Sisara.—Huesnan 4:9.

Den e mundo aki hende muher ta experencia masha hopi inhusticia, maltrato y abuso. Masha poco  nan ta haya e respet cu Dios kier pa hende duna nan. Pero Dios si ta duna tanto hende muher como hende homber e mesun balor, y tur dos por haya Dios su aprobacion. (Romanonan 2:11; Galationan 3:28) E ehempel di Debora ta corda nos cu Dios ta bendiciona hende muher cu privilegio, e ta confia nan y nan por haya su aprobacion. Ta hopi importante pa nunca nos sigui e actitud di e mundo aki cu ta discrimina hende muher.

Barak a bay busca 10.000 homber cu tabatin curashi pa bringa contra Sisara su ehercito. Ora cu Barak y su ehercito tabata subiendo Sero Tabor, e tabata contento cu “Debora tambe a bay” cu nan. (Huesnan 4:10) Djis imagina con anima e soldaatnan ey a sinti ora nan a mira cu un hende muher yen di curashi tabata dispuesto pa risca su bida hunto cu nan debi na su fe den Jehova Dios.

Ora cu Sisara a haya sa cu Israel a tribi di forma un ehercito pa bringa contra dje, el a actua di biaha. Varios rey Cananeo a uni forsa cu Rey Jabin, kende kisas tabata esun di mas poderoso entre nan. Y mientras e batayon di garoshi di guera di Sisara tabata pasando den e vaye, tera tabata sacudi. E ehercito Cananeo tabata sigur cu nan lo derota e ehercito Israelita facilmente.—Huesnan 4:12, 13; 5:19.

Kico Barak y Debora lo a haci ora nan mira nan enemigonan ta acerca? Si nan a keda riba e bariga di Sero Tabor, nan lo tabatin un bentaha pasobra e Cananeonan tabatin mester di un superficie plat pa nan por uza nan garoshinan pa bringa na un manera efectivo. Pero Barak kier a sigui Jehova su direccion, pesey el a warda riba Debora su instruccion. Porfin e momento a yega. Debora a bisa: “Lanta! Pasobra esaki ta e dia cu SEÑOR a entrega Sisara den bo man; mira, SEÑOR a bay bo dilanti.” Na e momento ey “Barak a baha for di Sero Tabor cu dies mil homber su tras.”—Huesnan 4:14. *

E ehercito di Israel a baha full speed for di e sero pa bay topa cu e ehercito poderoso di Sisara y su batayon di garoshi di guera cu tabata den e vaye. Acaso Jehova tabata cu nan manera Debora a priminti? No a dura hopi pa nan haya contesta. Bijbel ta bisa “tera a sakudí, awa a kai for di shelu.” Jehova a confundi Sisara y su ehercito halsa, y awa a cuminsa basha. Como consecuencia, e rooi a yena masha lihe cu awa. Y nan garoshinan pisa a chok den lodo. Pues en bes di yuda nan, e garoshinan a perhudica nan.—Huesnan 4:14, 15; 5:4, BPK.

Barak y su soldaatnan tabata sa dicon awa ta yobe, pesey nan no tabata preocupa. Nan a bay stret den direccion di e ehercito Cananeo, y Dios a uza nan pa caba cu henter e ehercito di Sisara. Rooi Kison a yena cu asina hopi awa, cu e awa a lastra e cadavernan hiba Lama Grandi.—Huesnan 4:16; 5:21.

Awe Jehova no ta manda su sirbidornan bay guera. Pero loke si e ta pidi su sirbidornan ta pa nan participa den un guera spiritual. (Mateo 26:52; 2 Corintionan 10:4) Si nos haci nos best pa obedece Dios, nos ta mustra na ken su banda nos ta den e guera ey. Nos mester di curashi pa obedece Dios pasobra nos lo por enfrenta oposicion severo. Pero Jehova no a cambia. Te awe Dios ta defende esnan cu ta manera Debora, Barak y e soldaatnan yen di curashi di Israel cu tin fe y confianza den dje.

Sisara, kende tabata e enemigo Cananeo di mas grandi di e pueblo di Dios, a huy bay for di e campo di bataya na pia. Figura bo! El a gewoon bay laga su soldaatnan pega den lodo. El a logra pasa meymey di e soldaatnan di Israel y a bay busca refugio cerca un di su aliadonan den cercania. Como cu e tera tabata plat, e tabatin hopi miedo cu e soldaatnan Israelita lo wak e, pesey el a core duro den direccion di e tent di Heber. Heber tabata un Keneo kende a separa su mes for di e resto di su tribu cu tabata biaha di un luga pa otro, y el a bay direccion zuid y a cera un tipo di acuerdo cu Rey Jabin.— Huesnan 4:11, 17.

 El a yega e tent di Heber morto cansa. Heber no tabata na cas, pero su esposa Jael si tabat’ey. Probablemente Sisara a pensa cu Jael lo a respeta e acuerdo cu su esposo a cera cu Rey Jabin y cu lo ta imposibel pa un hende muher actua of pensa full diferente for di su esposo. Pero Sisara no tabata conoce Jael. Jael tabata sa cu e Cananeonan tabata oprimi e Israelitanan. Probablemente Jael a mira cu e por a scoge sea pa yuda e homber malbado aki of apoya Jehova door di mata e enemigo di Dios su pueblo. Pero kico Jael por a haci? Con un hende muher por a mata un general cu tin asina hopi experencia?

Jael mester a actua lihe. El a ofrece Sisara posada. Sisara a bisa Jael cu si un hende puntra p’e, e no tin mag di laga nan sa cu e ta eynan. Ora Sisara a cay drumi abou, Jael a tap’e cu un deken. Y ora el a pidi Jael awa pa bebe, Jael a dun’e lechi. Despues di un rato Sisara tabata morto na soño. E ora ey Jael a coy un staca di tent y un martiu di palo, dos herment cu hende muher cu tabata biba den tent tabata uza frecuentemente y habilmente. Y el a bay bek caminda Sisara tabata drumi y a sak abou banda di su cabes, y na e momento ey e mester a cumpli cu e mision dificil di actua como Jehova su ehecutor. Si el a duda djis un tiki, esey lo por tabata desastroso. Acaso el a pensa riba Dios su pueblo y con e homber aki a oprimi nan pa decadanan largo? Of el a pensa riba e privilegio cu e tabatin pa demostra cu e ta na banda di Jehova? Nos no sa. Loke si nos sa ta cu Sisara tabata morto.—Huesnan 4:18-21; 5:24-27.

Despues, ora Barak a bin busca su enemigo Sisara, Jael a mustra Barak e curpa di Sisara cu e staca di tent pasa door di su weso di sinti. E ora ey, Barak tabata sa cu e profecia di Debora a cumpli, esta, cu un hende muher lo a mata e guerero poderoso Sisara. Algun comentarista biblico ta papia hopi malo di Jael. Pero Barak y Debora si a elogia Jael den nan cantica bisando cu e ta “esun di mas bendiciona di e muhernan” pa motibo di e curashi cu el a demostra. (Huesnan 4:22; 5:24) Bo por mira cu Debora no tabata egoista pasobra e no a envidia Jael, mas bien, e tabata contento cu Jehova su palabra a cumpli.

Door cu Sisara tabata morto, Rey Jabin no tabata forma un peliger mas pa Israel. Porfin e Cananeonan no tabata oprimi e Israelitanan mas. Pa 40 aña largo tabatin paz. (Huesnan 4:24; 5:31) Debora, Barak y Jael a pone fe den Jehova Dios. Pa e motibo ey, el a bendiciona nan. Si nos imita e fe di Debora door di demostra cu nos ta na Jehova su banda y anima otro hende pa haci mescos, Jehova lo bendiciona nos tambe. Con? Wel, lo e yuda nos gana e bataya spiritual cu nos ta aden y nos lo tin paz no solamente awor, sino pa semper.