Cristiannan ta kere cu Hesus a muri pa e picanan di humanidad. (1 Pedro 3:18) Sinembargo, pa un hende haya salbacion, e tin cu haci mas cu djis kere den Hesus como Salbador. E demoñonan sa cu Hesus ta “Yiu di Dios”, pero nan lo no ser salba, sino destrui.—Lucas 4:41; Judas 6.

•  Kico mi mester haci pa haya salbacion?

•  Mi por haya salbacion si mi resa e “oracion di pecador”?

•  Kico ta origen di e “oracion di pecador”?

•   Kere cu Hesus a sacrifica su bida pa nos picanan. (Echonan 16:30, 31; 1 Juan 2:2) Esaki ta encera kere cu Hesus realmente a existi y cu tur loke Bijbel ta bisa tocante dje ta berdad.

•   Analisa loke Bijbel ta siña realmente. (2 Timoteo 3:15) Bijbel ta menciona cu Apostel Pablo y Silas a bisa e wardador di preso: “Kere den Señor Hesus y ... lo [bo] haya salbacion.” Despues di esey, nan a cuminsa siña e wardador di preso “e palabra di Jehova.” a (Echonan 16:31, 32) Esaki ta mustra cu pa e wardador di preso por a echt kere den Hesus, e mester tabatin conocemento basico di e Palabra di Dios. E mester a haya conocemento exacto di Bijbel.—1 Timoteo 2:3, 4.

•   Arepenti. (Echonan 3:19) Ademas, bo mester arepenti of sinti duele profundo di e cosnan robes cu bo a yega di pensa y haci den pasado. Bo ta mustra cu bo a arepenti di berdad ora otro hende por mira bon cla cu bo a stop di haci loke ta malo den bista di Dios y awor ta haci “obra cu ta mustra ... arepentimento.”—Echonan 26:20.

•   Batisa. (Mateo 28:19) Hesus a bisa cu hende cu kier bira su discipel mester batisa. E wardador di preso menciona anteriormente a batisa. (Echonan 16:33) Di mes manera, despues cu Apostel Pedro a siña e multitud e berdad tocante Hesus, “esnan cu di curason a acepta su palabra a batisa.”—Echonan 2:40, 41.

•   Obedece e mandamentonan di Hesus. (Hebreonan 5:9) Hende cu ta “cumpli cu tur” loke Hesus a manda ta demostra cu nan ta su siguidornan den nan manera di biba. (Mateo 28:20) Nan ta bira “hende cu ta cumpli cu e palabra ey, y no hende cu ta tend’e so.”—Santiago 1:22.

•   Persevera te na fin. (Marco 13:13) Hesus su discipelnan “mester di perseverancia” pa nan por ser salba. (Hebreonan 10:36) Por ehempel, Apostel Pablo a obedece e siñansanan di Hesus cuidadosamente y a keda leal na Dios for di dia cu el a bira siguidor di Cristo te na su morto.—1 Corintionan 9:27.

 Den algun religion, hende sa haci cierto oracion manera e “oracion di pecador” y e “oracion di salbacion.” Por lo general, e hendenan aki ta reconoce cu nan ta pecador y ta kere cu Hesus a muri pa nan picanan. Nan ta pidi Hesus drenta nan curason of nan bida. Pero Bijbel no ta menciona e “oracion di pecador”, ni no ta recomenda pa ripiti oracion bes tras bes.

 Algun hende ta kere cu una bes nan resa e “oracion di pecador”, nan salbacion eterno ta sigura. Pero no tin niun oracion cu por garantisa salbacion. Como hende imperfecto, nos ta sigui comete eror. (1 Juan 1:8) Pesey, Hesus a siña su siguidornan haci oracion regularmente pa nan haya pordon pa nan picanan. (Lucas 11:2, 4) Ademas, algun siguidor di Cristo cu tabatin e speransa di haya salbacion eterno a perde e speransa ey pasobra nan a cay for di fe of a bira lomba pa Dios.—Hebreonan 6:4-6; 2 Pedro 2:20, 21.

 Historiadornan no ta di acuerdo cu otro tocante origen di e “oracion di pecador.” Algun di nan ta bisa cu e tradicion ey a cuminsa durante e Reformacion Protestant. Otro historiador ta kere cu hende a cuminsa resa e “oracion di pecador” durante e movementonan religioso di siglo 18 y 19. Sea cual sea e caso, Scritura no ta apoya e custumber aki; de echo, e ta contrario na e siñansanan di Bijbel.