E palabra “cielo” ta ser uza den Bijbel pa basicamente tres cos: (1) e cielo fisico, (2) caminda e criaturanan spiritual invisibel ta y (3) como simbolo di un posicion halto of eleva. Den cada caso, e contexto ta yuda nos determina e comprondemento corecto di e palabra. a

1.   E cielo fisico. E palabra “cielo” por referi na e atmosfera di Tera caminda biento ta supla, parha ta bula, nubia ta produci awasero y sneeuw y lamper ta corta. (Salmo 78:26; Proverbionan 30:19; Isaias 55:10; Lucas 17:24) Tambe e por referi na espacio, caminda tin “solo, luna y streanan.”—Deuteronomio 4:19, Beibel Santu; Genesis 1:1.

2.   Caminda e criaturanan spiritual invisibel ta. E palabra “cielo” ta referi tambe na e region di spirito, of caminda criaturanan spiritual invisibel ta existi, un forma di existencia mucho mas eleva y cu no ta parti di e universo fisico. (1 Reynan 8:27; Juan 6:38) Ey ta caminda Jehova Dios, kende “ta un Spirito”, ta biba y tambe e angelnan cu el a crea. (Juan 4:24; Mateo 24:36) Tin biaha “e cielonan” ta referi na e angelnan fiel, “e asamblea di e santonan.”—Salmo 89:5-7, Beibel Santu.

    Bijbel ta uza e palabra “cielo” pa referi tambe na e parti di e region di spirito caminda Jehova ta, su “luga di biba.” (1 Reynan 8:43, 49, Beibel Santu; Hebreonan 9:24; Revelacion 13:6) Por ehempel, Bijbel a profetisa cu Satanas y e demoñonan lo a ser saca for di cielo; kiermen nan no ta permiti pa bin den presencia di Jehova mas. Sinembargo, nan ta keda criaturanan spiritual.​—Revelacion 12:7-9, 12.

3.   Simbolo di un posicion halto of eleva. Bijbel ta uza e palabra “cielo” pa referi na un posicion halto, por lo general ora tin di haber cu gobierno of autoridad. Pensa por ehempel riba:

   •   Jehova Dios como e Soberano todopoderoso.​—2 Cronicanan 32:20; Lucas 15:21.

   •   E Reino di Dios, e gobierno cu lo bay reemplasa gobernacion humano. Bijbel ta referi na e Reino ey como e “cielonan nobo.”—Isaias 65:17; 66:22, Beibel Santu; 2 Pedro 3:13. b

   •   Cristiannan cu ta biba riba Tera y cu tin e speransa pa bay cielo.​—Efesionan 2:6.

   •   Gobiernonan humano cu a halsa nan mes riba nan subditonan.​—Isaias 14:12-14; Daniel 4:20-22; 2 Pedro 3:7.

   •   Spiritonan malbado cu tin dominio riba mundo.​—Efesionan 6:12; 1 Juan 5:19.

Con cielo, of e region di spirito, ta?

 Den e region di spirito, tin hopi actividad. Eynan ta biba cientos di miyones di angel “cu ta ehecuta [Jehova] su palabra.”—Salmo 103:20, 21, Beibel Santu; Daniel 7:10.

 Bijbel ta bisa cu cielo ta un luga yen di luz. (1 Timoteo 6:15, 16) Profeta Ezekiel a haya un vision tocante cielo caminda tabatin “splendor” tur caminda, mientras cu e vision cu Daniel a haya a inclui “un riu di candela.” (Ezekiel 1:26-28; Daniel 7:9, 10, Beibel Santu) Cielo ta santo, of limpi, y bunita.​—Salmo 96:6; Isaias 63:15; Revelacion 4:2, 3.

 E descripcion cu Bijbel ta duna di cielo ta hopi impresionante. (Ezekiel 43:2, 3) A pesar di esey, e region di spirito ta algo cu ta imposibel pa hende compronde completamente.