Ruman Barbara Osmyk-Urban ta un mama soltera cu ta biba na Polonia. E tin dos yiu: Jakub di dies aña di edad y Nina di ocho aña di edad. Durante nan Adoracion Como Famia, Ruman Barbara a siña su yiunan con pa mustra hospitalidad y empatia. Despues, e famia a aplica loke nan a siña. For di tempo cu e guera a cuminsa na Ucrania, riba 24 di februari 2022, nan a laga mas cu 20 ruman keda na nan cas.

Nos rumannan na Ucrania a sali for di Ucrania bay otro luga mas safe pa huy di e guera. E Testigonan na Polonia y otro pais a laga nan rumannan di Ucrania keda na nan cas, y nan a yuda nan na varios otro manera. Te na e momentonan aki, por lo menos 11.000 di nos rumannan di Ucrania a bay Polonia. Durante e guera, niun hende homber na Ucrania entre 18 pa 60 aña di edad no tabatin mag di bandona Ucrania. Sinembargo, tabatin excepcion. Por ehempel, si un hende homber tin tres of mas yiu menor di edad, e tin mag di bay.

Ruman Barbara a bisa: “E rumannan refugiado di Ucrania ta parti di nos famia spiritual.” Su yiunan tambe ta sinti asina. Cu mil amor, Jakub y Nina a sali for di nan camber pa laga e rumannan keda den nan camber. Nan no por a papia cu e rumannan pasobra nan no tabata sa otro su idioma. Pero nan a expresa nan mes cu smile, brasa y awa na wowo. Despues cu e rumannan refugiado bay otro luga, Jakub tabata puntra su mama si nan por laga mas ruman keda na cas, pasobra e cas ta mucho keto.

Ruman Łukasz Cholewiński y Rafał Jankowski ta yuda transporta cuminda, awa, remedi y otro producto cu nos rumannan tin mester na Ucrania. Ora Ruman Łukasz y Rafał yega frontera pa drenta Ucrania, nan ta mira masha hopi hende muher y mucha para na frontera wardando pa crusa bay otro luga mas safe. Tin biaha, nan tabata na yoramento. Łukasz a bisa: “A pesar di esey, ora nos topa cu nos rumannan na Ucrania, nos ta keda masha asombra, pasobra nan tur tin goso.”

E biahe ida y buelta pa Ucrania por dura cuater ora. Asina cu e productonan yega Ucrania tin varios ruman homber pa hiba e productonan na otro parti di Ucrania. A pesar cu e biahenan aki pa Ucrania ta peligroso, tin masha hopi ruman cu a pone nan mes disponibel pa haci e biahenan aki. Rafał a bisa: “Ta un privilegio masha grandi pa yuda nos rumannan.

Ruman Elżbieta Ustrzycka ta biba na e stad Rzeszow na Polonia. El a splica con el a sinti di por a laga e rumannan di Ucrania keda na su cas. El a bisa: “Mi a keda masha conmovi ora m’a mira e ancianonan di mi congregacion ta yuda nos rumannan di Ucrania. Mi ta corda con mi a mira e ancianonan cana drenta mi cas marduga cu e famianan; e ancianonan tabatin e yiunan na soño den nan brasanan. E cos ey lo keda graba den mi mente pa hopi tempo.”

Ruman Bartłomiej Figura ta un di e ancianonan cu ta traha nonstop pa yuda e rumannan. E cu su casa, Estera, ta bay na frontera of stacion di trein pa yuda transporta nos rumannan di Ucrania. Tin biaha, Ruman Bartłomiej y Estera ta sali for di nan apartamento pa laga e ruman keda. Ademas, ora nan por, nan ta duna yudansa material tambe.

Ruman Bartłomiej a bisa: “Nos ta un famia spiritual. Nos ta sinti nos hopi cera cu nos rumannan di Ucrania. Nos a ripara cu, cada bes cu nos pone nos mes disponibel, Jehova ta uza nos pa yuda nos rumannan cu un necesidad specifico cu nan tabatin.”

Te cu awe, nos rumannan di Polonia a prepara 23.000 pakete pa yuda nos rumannan di Ucrania. Den e paketenan ey tin, entre otro, cuminda, producto di higiena personal y otro producto.

Nos tin sigur cu Jehova lo sigui cuida e rumannan di Ucrania pa medio di e generosidad di nan rumannan.—Proverbionan 11:24; Romanonan 12:13.