Mito: Testigonan di Jehova no ta celebra Pasco di Resureccion pasobra nan no ta cristian.

 Realidad: Nos ta kere cu Hesucristo ta nos Salbador y nos ta haci esfuerso pa “sigui su pasonan fielmente.”—1 Pedro 2:21; Lucas 2:11.

 Mito: Boso no ta kere cu Hesus a ser resucita.

 Realidad: Nos ta kere den Hesus su resureccion y nos ta convenci cu esaki ta un siñansa fundamental di nos fe cristian. Ademas, esaki ta un parti importante di e mensahe cu nos ta predica.—1 Corintionan 15:3, 4, 12-15.

 Mito: Boso ta stroba boso yiunan di disfruta di e fiestanan di Pasco di Resureccion.

 Realidad: Nos ta stima nos yiunan, y nos ta haci esfuerso pa educa nan y yuda nan pa nan por ta feliz.—Tito 2:4.

•   Pasco di Resureccion no ta basa riba Bijbel.

•   Hesus a instrui nos pa recorda su morto, no su resureccion. Nos ta recorda su morto tur aña riba e fecha cu el a muri segun e calendario lunar di tempo biblico.—Lucas 22:19, 20.

•   Nos ta kere cu e origen di Pasco di Resureccion, cu ta bin di ritonan di fertilidad antiguo, ta hacie inaceptabel pa Dios. E kier pa nos dun’e “devocion exclusivo”, y e ta sintie ofendi si nos adoracion na dje ta inclui practicanan cu e no ta aproba.—Exodo 20:5, New World Translation; 1 Reynan 18:21.

 Nos ta convenci cu nos decision pa no celebra Pasco di Resureccion ta firmemente basa riba Bijbel. E ta anima nos pa uza “sabiduria sano y discrecion” en bes di djis sigui tradicion di hende. (Proverbionan 3:21; Mateo 15:3) Aunke nos ta splica nos opinion tocante Pasco di Resureccion ora hende puntra nos, nos ta respeta cada persona su derecho di dicidi kico e lo kier hasi.—1 Pedro 3:15.