1. Kiko ta e yabi pa haña un bida di famia felis?

YEHOVA DIOS ke pa bo bida di famia ta felis. Su Palabra, Beibel, ta duna guia i instrukshon pa kada miembro di famia, i ta deskribí e papel ku Dios a asigná na kada un di nan. Ora ku miembronan di famia ta kumpli ku nan papel na armonia ku e konseho di Dios, e resultadonan ta duna gran satisfakshon. Hesus a bisa: “Bendishoná ta esnan ku ta tende e palabra di Dios, i ta ward’é.”—Lukas 11:28.

2. Kiko nos mester rekonosé pa nos por tin felisidat den famia?

² Felisidat den famia ta dependé prinsipalmente di si nos ta rekonosé ku e areglo di famia ta originá di Yehova, esun ku Hesus a yama “Nos Tata.” (Mateo 6:9) Tur famia na mundu ta eksistí debí na nos Tata selestial, i e sigur sa kiko ta hasi famianan felis. (Efesionan 3:14, 15) Pues anto, kiko Beibel ta siña tokante e papel di kada miembro di famia?

3. Kon Beibel ta deskribí e komienso di e famia humano, i dikon nos sa ku loke e ta bisa ta bèrdat?

³ Yehova a krea e promé hendenan, Adam ku Eva, i a trese nan huntu komo esposo i esposa. El a pone nan den un kas  bunita, un paradeis riba tera—e hòfi di Edén— i a bisa nan pa haña yu. Yehova a bisa: “Sea fruktífero i multipliká, i yena e tera.” (Génesis 1:26-28; 2:18, 21-24) Esaki no ta djis un kuenta òf fantasia, pasobra Hesus a mustra ku loke Génesis ta bisa tokante e komienso di bida di famia ta bèrdat. (Mateo 19:4, 5) Ounke nos ta konfrontá hopi problema i e bida djawe no ta segun Dios su propósito, laga nos wak dikon felisidat den seno familiar tòg ta posibel.

4. (a) Kon kada miembro di famia por kontribuí na felisidat di e famia? (b) Dikon studia e bida di Hesus ta asina importante pa felisidat di famia?

⁴ Kada miembro di famia por yuda hasi e bida di famia felis dor di imitá Dios den mustra amor. (Efesionan 5:1, 2) Pero kon nos por imitá Dios si ni sikiera nos por mir’é? Nos por sa kon Yehova ta aktua pasobra el a manda su Yu unigénito for di shelu bin na tera. (Juan 1:14, 18) Ora ku e Yu aki, Hesukristu, tabata riba tera, el a imitá su Tata selestial asina bon, ku mira i tende Hesus tabata meskos ku ser den kompania di Yehova i tend’é. (Juan 14:9) P’esei, dor di siña tokante e amor ku Hesus a demostrá i sigui su ehèmpel, kada un di nos por yuda hasi e bida di famia mas felis.

5, 6. (a) Kon e manera ku Hesus ta trata e kongregashon ta un ehèmpel pa esposonan? (b) Kiko nos mester hasi pa haña pordon di piká?

⁵ Beibel ta bisa ku esposonan mester trata nan esposa den e mesun manera ku Hesus ta trata su disipelnan. Konsiderá e siguiente instrukshon aki di Beibel: “Esposonan, stima boso esposa, meskos ku Kristu tambe a stima e iglesia i a entregá su mes p’e . . . Asina esposonan tambe mester stima nan esposa manera nan mes kurpa. Esun ku ta stima su esposa ta stima su mes; pasobra nunka ni un hende no a odia su mes karni, ma ta aliment’é i ta kuid’é, meskos ku Kristu tambe ta hasi ku e iglesia.”—Efesionan 5:23, 25-29.

 ⁶ Hesus su amor pa su iglesia òf kongregashon di disipelnan ta un ehèmpel perfekto pa esposonan. Hesus “a stima nan te na fin,” sakrifikando su bida pa nan, apesar ku nan tabata imperfekto. (Juan 13:1; 15:13) Asina tambe Beibel ta urgi esposonan: “Stima boso esposanan, i no sea amargá kontra nan.” (Kolosensenan 3:19) Kiko lo yuda un esposo apliká e konseho ei, foral si su kasá de bes en kuando no ta aktua prudente? E esposo mester kòrda ku e tambe ta kometé eror i loke e mester hasi pa haña pordon di Dios. Kiko e mester hasi? E mester pordoná hende ku peka kontra dje, i esei ta inkluí su esposa. Klaru ku e esposa lo tin ku hasi meskos. (Mateo 6:12, 14, 15) Bo ta mira dikon algun hende a yega di bisa ku un matrimonio eksitoso ta e union di dos persona ku ta bon den pordoná?

7. Kiko Hesus a tene kuenta kuné, poniendo ki ehèmpel pa esposonan?

⁷ Ta bon tambe pa esposonan tuma nota ku Hesus semper a mustra konsiderashon na su disipelnan. El a tene kuenta ku nan limitashonnan i nesesidatnan físiko. Por ehèmpel, ora nan tabata kansá el a bisa nan: “Ban ku mi, boso so, na un lugá solitario i sosegá un ratu.” (Marko 6:30-32) Esposanan tambe ta meresé konsiderashon atento. Beibel ta deskribí esposa komo “un vaso mas delikado,” i ta manda esposonan pa duna nan “onor.” Dikon? Pasobra tantu esposo komo esposa ta partisipá den e fabor inmeresí òf “grasia di bida.” (1 Pedro 3:7) Esposonan mester kòrda ku loke ta hasi un hende presioso den bista di Dios ta fieldat, i no e echo ku un persona ta hòmber òf muhé.—Salmo 101:6.

8. (a) Den ki sentido un esposo “ku ta stima su esposa ta stima su mes”? (b) Kiko ser “ún karni” ta nifiká pa un esposo i su kasá?

⁸ Beibel ta bisa ku un esposo “ku ta stima su esposa ta stima su mes.” Esei ta asina pasobra manera Hesus a indiká, un hòmber ku su kasá “no ta dos mas, sino ún karni.” (Mateo 19:6) Pues nan interes seksual mester keda limitá entre  nan dos so. (Proverbionan 5:15-21; Hebreonan 13:4) Nan por hasi esaki si nan pone komo nan meta pa satisfasé e nesesidat di otro en bes di solamente nan propio nesesidat. (1 Korintionan 7:3-5) Ta bon pa tuma nota di e rekordatorio: “Nunka ni un hende no a odia su mes karni, ma ta aliment’é i ta kuid’é.” Esposonan tin ku stima nan esposa meskos ku nan ta stima nan mes, kòrdando ku nan tin ku duna kuenta i rason na nan propio kabes, Hesukristu.—Efesionan 5:29; 1 Korintionan 11:3.

9. Filipensenan 1:8 (NW) ta menshoná ki kualidat di Hesus, i dikon esposonan mester desplegá e kualidat aki pa ku nan kasá?

⁹ Apòstel Pablo a papia di e ‘tierno kariño ku Kristu Hesus tin.’ (Filipensenan 1:8, NW) Hesus su ternura tabata un kualidat refreskante, un kualidat atraktivo pa hende muhé ku a bira su disipel. (Juan 20:1, 11-13, 16) I esposanan ta anhelá di haña tierno kariño serka nan esposo.

10. Kon Hesus ta un ehèmpel pa esposanan?

¹⁰ Un famia ta un organisashon, i pa e funshoná suave, e mester tin un kabes. Asta Hesus tin un Persona ku e ta someté na dje komo su Kabes. “Dios ta e kabes di Kristu,” meskos ku “e hòmber ta e kabes di e muhé.” (1 Korintionan 11:3) Hesus su sumishon na Dios su outoridat komo kabes ta un ehèmpel ekselente, ya ku nos tur tin un kabes ku nos mester someté na dje.

11. Ki aktitut un esposa mester tin pa ku su esposo, i ki efekto e esposa su kondukta lo por tin?

¹¹ Hòmbernan imperfekto ta kometé eror i hopi bes nan no ta e kabes ideal di un famia. Pues kiko un esposa mester hasi? E no mester ekspresá menospresio pa loke su esposo ta hasi ni purba tuma e esposo su outoridat komo kabes. Ta bon pa un esposa kòrda ku den bista di Dios, un aktitut òf spiritu suave i ketu ta di gran balor. (1 Pedro 3:4) Dor di desplegá tal aktitut, lo e ripará ku ta bira mas fásil p’e demostrá  sumishon ku ta agradá Dios, asta bou di sirkunstansianan difísil. Ademas, Beibel ta bisa: “E esposa perkurá pa e respetá su esposo.” (Efesionan 5:33) Pero kiko si e esposo no ta aseptá Kristu komo su Kabes? Beibel ta urgi esposanan: “Sea sumiso na boso mes esposonan, pa si algun di nan ta desobedesidu na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso.”—1 Pedro 3:1, 2.

12. Dikon no ta malu pa un esposa ekspresá su opinion ku rèspèt?

¹² Sea ku un esposa su kasá ta un kreyente òf nò, e esposa no ta mustrando falta di rèspèt si e ekspresá ku takto un opinion ku ta distinto for di esun di e esposo. E esposa su punto di bista podisé ta korekto, i henter e famia lo por benefisiá si e esposo skuch’é. Ounke Abraham no tabata di akuerdo ora ku su kasá, Sara, a rekomendá un solushon práktiko pa un sierto problema familiar, Dios a bisa Abraham: “Skuch’é.” (Génesis 21:9-12) Klaru ku ora un esposo tuma un desishon final riba un asuntu ku no ta na konflikto ku e lei di Dios, e esposa ta mustra su sumishon dor di apoyá e desishon.—Echonan 5:29; Efesionan 5:24.

13. (a) Kiko Tito 2:4 i 5 ta urgi muhénan kasá pa hasi? (b) Kiko Beibel ta bisa tokante separashon i divorsio?

¹³ Un esposa por kumpli den hopi manera ku su papel di kuida e famia. Por ehèmpel, Beibel ta mustra ku muhénan kasá mester ‘stima nan esposo, stima nan yunan, ta huisioso, puru, bon ama di kas, kariñoso, siendo sumiso na nan mes esposo.’ (Tito 2:4, 5) Un esposa i mama ku ta aktua den e manera aki lo gana e amor i rèspèt duradero di su famia. (Proverbionan 31:10, 28) Sin embargo, komo ku matrimonio ta un union di dos persona imperfekto, tin algun sirkunstansia ekstremo ku por resultá den separashon òf divorsio. Beibel ta permití separashon bou di sierto sirkunstansia. Sin embargo, separashon ta un asuntu serio, pasobra Beibel ta konsehá: “E esposa no mester bai laga su esposo . . . [i] e esposo no mester manda su esposa bai.”  (1 Korintionan 7:10, 11) Anto e úniko base bíbliko pa divorsio ta si un di e kasánan kometé inmoralidat seksual.—Mateo 19:9.

14. Kon Hesus a trata mucha, i kiko mucha tin mester di nan mayornan?

¹⁴ Hesus a pone un ehèmpel perfekto pa mayornan den e manera ku el a trata mucha. Ora ku otro hende a purba stroba mucha chikí di aserká Hesus, el a bisa: “Laga e muchanan bin serka mi; no stroba nan.” Beibel ta bisa ku e ora ei el “a tuma nan den su brasa i a bendishoná nan, poniendo su mannan riba nan.” (Marko 10:13-16) Siendo ku Hesus a dediká tempu na mucha chikí, abo lo no tin ku hasi meskos ku bo mes yunan? Yunan tin mester di hopi di bo tempu, no djis un poko so de bes en kuando. Bo tin ku tuma tempu pa siña nan, pasobra esei ta loke Yehova ta manda mayornan hasi.—Deuteronomio 6:4-9.

15. Kiko mayornan por hasi pa protehá nan yunan?

¹⁵ Segun ku e mundu aki ta bira mas i mas malbado, muchanan tin mester di mayornan ku lo protehá nan di  hende ku ta trata di perhudiká nan, manera esnan ku ta buska mucha pa abusá di nan seksualmente. Konsiderá kon Hesus a protehá su disipelnan, ku el a yama kariñosamente “mucha chikitunan.” Hesus a hasi un manera pa nan skapa ora ku hende a bin pa arest’é i mirando ku pronto nan lo a mat’é. (Juan 13:33; 18:7-9) Komo mayor, bo mester ta alerta pa e intentonan di Diabel pa perhudiká bo yunan chikí. Bo tin ku spièrta bo yunan di antemano. * (1 Pedro 5:8) Nunka promé nan siguridat físiko, spiritual i moral a kore tantu peliger.

16. Kiko mayornan por siña for di e manera ku Hesus a trata ku e imperfekshonnan di su disipelnan?

 ¹⁶ E anochi promé ku Hesus a muri, su disipelnan tabata diskutí tokante kua di nan a ser konsiderá esun di mas grandi. En bes di rabia ku nan, Hesus amorosamente a sigui hasi un yamada riba nan mediante su palabranan i ehèmpel. (Lukas 22:24-27; Juan 13:3-8) Si bo ta un mayor, bo por mira kon lo bo por imitá Hesus su ehèmpel den e manera ku bo ta korigí bo yunan? Ta bèrdat ku mucha tin mester di disiplina, pero mester duna nan esei “na e midí apropiá” i nunka ku rabia. Lo bo no ke papia sin pensa “manera hinká di spada.” (Jeremias 30:11, NW; Proverbionan 12:18) Bo mester duna disiplina di tal manera ku bo yu despues lo mira kon apropiá e disiplina tabata.—Efesionan 6:4; Hebreonan 12:9-11.

17. Den ki maneranan Hesus a pone un ehèmpel perfekto pa yunan?

¹⁷ Yunan por siña for di Hesus? Sí, nan por! Hesus a demostrá pa medio di su propio ehèmpel kon yunan mester obedesé nan mayornan. El a bisa: “Mi ta papia . . . manera e Tata a siña mi.” Anto el a agregá: “Semper mi ta hasi e kosnan ku ta agrad’é.” (Juan 8:28, 29) Hesus tabata obediente na su Tata selestial, i Beibel ta bisa yunan pa obedesé nan mayornan. (Efesionan 6:1-3) Ounke Hesus tabata un mucha perfekto, el a obedesé su mayornan humano, Hosé i Maria, kendenan tabata imperfekto. Esei sigur a kontribuí na e felisidat di tur miembro di Hesus su famia!—Lukas 2:4, 5, 51, 52.

18. Dikon Hesus semper a obedesé su Tata selestial, i ken ta felis ora ku awe yunan ta obedesé nan mayornan?

¹⁸ Akaso yunan por mira kosnan ku nan por hasi pa nan ta mas manera Hesus i asina hasi nan mayornan felis? Ta bèrdat ku tin biaha hóbennan ta haña ku ta difísil pa nan obedesé nan mayornan, pero esei ta loke Dios ke pa yu  hasi. (Proverbionan 1:8; 6:20) Hesus semper a obedesé su Tata selestial, asta bou di sirkunstansia difísil. Un biaha, ora ku Dios su boluntat tabata pa Hesus hasi un kos hopi difísil, Hesus a bisa: “Kita e kopa aki [un sierto rekisito] for di mi.” Pero tòg, Hesus a hasi loke Dios a pidié pasobra el a realisá ku su Tata tabata sa kiko ta mihó p’e den e situashon ei. (Lukas 22:42) Dor di siña ta obediente, yunan lo hasi nan mayornan i nan Tata selestial hopi felis. *—Proverbionan 23:22-25.

19. (a) Kon Satanas ta pone tentashon pa yunan? (b) Ki efekto mal komportashon di yu por tin riba mayornan?

¹⁹ Diabel a tenta Hesus, i nos por ta sigur ku lo e tenta hóbennan tambe pa hasi loke ta malu. (Mateo 4:1-10) Satanas e Diabel ta usa preshon di otro hóben, lokual por ta un kos duru pa resistí. Ta masha importante anto pa yunan no anda ku hende ku ta hasi malu! (1 Korintionan 15:33) Jakòb su yu muhé Dina a anda ku hende ku no tabata adorá Yehova, i esaki a hiba na hopi problema. (Génesis 34:1, 2) Pensa kon un famia lo sufri si un di su miembronan lo mester hañ’é enbolbí den inmoralidat seksual!—Proverbionan 17:21, 25.

20. Pa gosa di un bida di famia felis, kiko kada miembro tin ku hasi?

²⁰ Ta mas fásil pa enfrentá problemanan di famia ku éksito ora ku ta apliká konseho di Beibel. De echo, aplikashon di tal konseho ta e yabi pa felisidat den famia. Pues esposonan, stima boso esposa, i trat’é manera Hesus ta trata su kongregashon. Esposanan, someté na e outoridat di boso esposo komo e kabes, i sigui e ehèmpel di e esposa kapas deskribí na Proverbionan 31:10-31. Mayornan, instruí boso yunan. (Proverbionan 22:6) Tatanan, ‘manehá boso mes kas bon.’ (1 Timoteo 3:4, 5; 5:8) I yunan, obedesé boso mayornan. (Kolosensenan 3:20) Ningun hende den e famia no ta perfekto, pasobra tur ta kometé eror. P’esei sea humilde i pidi otro pordon.

21. Ki perspektiva maravioso tin nos dilanti, i kon nos por gosa for di awor di un bida di famia felis?

²¹ Beibel en bèrdat ta kontené un abundansia di konseho i instrukshon balioso relashoná ku bida di famia. Ademas, e ta siña nos tokante Dios su mundu nobo i un paradeis riba tera ku lo ta yen di hende felis ku ta adorá Yehova. (Revelashon 21:3, 4) Ki un perspektiva maravioso tin nos dilanti! Pero for di awor, nos por gosa di un bida di famia felis dor di apliká e instrukshonnan di Dios ku tin den su Palabra, Beibel.