BO TA SINTI KU BO TA FELIS? Si ta asina, kiko ta hasi bo felis? Bo famia, bo trabou òf bo religion? Kisas bo ta sperando ansiosamente riba algu ku por hasi bo felis, manera kaba skol, haña un bon trabou òf kumpra un outo nobo.

Hopi hende ta sinti un grado di felisidat ora nan logra un meta òf ora nan haña algu ku nan tabata deseá. Pero pa kuantu tempu e felisidat ei ta dura? Hopi biaha, e sintimentu ei ta dura un poko tempu so i bo no ta keda satisfecho.

Un fuente ta deskribí felisidat komo un estado plasentero di ánimo ku ta relativamente permanente. E ta karakterisá pa emoshonnan ku ta varia entre simplemente un sintimentu di satisfakshon i un goso profundo den bida ku lo bo ke pa keda.

Ademas, komo ku e ta un estado plasentero di ánimo ku ta dura, a deskribí felisidat no komo un destinashon òf meta, sino komo un biahe. Esei ke men ku si un hende bisa, “Lo mi ta felis ora mi haña esaki òf hasi esei,” nunka lo e por ta felis.

Pa nos komprondé e asuntu akí mas mihó, laga nos kompará felisidat ku salú. Kon nos por logra haña un bon salú? Wèl, nos lo tin ku sòru pa kome bon, hasi ehersisio i hiba un estilo di bida saludabel. Asina tambe, bo por logra haña felisidat si bo sigui un bon kaminda, esta, apliká prinsipionan práktiko den bo bida.

Ki prinsipio- òf kualidatnan por yuda bo logra haña felisidat? Aunke algun di nan ta mas importante ku otro, e siguiente lista ta hunga un ròl masha importante:

• KEDA KONTENTU KU LOKE BO TIN I SEA GENEROSO

• KUIDA BO SALÚ I SEA POSITIVO

• AMOR

• PORDONÁ

• PROPÓSITO DEN BIDA

• SPERANSA

Un buki sumamente respetá ta bisa ku “bendishoná [“felis,” BPK] ta esnan ku nan kaminda ta sin mancha.” (Salmo 119:1) Laga nos ban wak ta ki kaminda esei ta.