1. Kiko David a sinti pa Yehova, i kiko esei a motiv’é pa hasi?

REI DAVID a skirbi: “SEÑOR ta grandi, i digno di ser alabá na gran manera.” (Sal. 145:3) David tabata stima Yehova i e amor ei a motiv’é pa alabá Dios “meimei di e asamblea [òf, “kongregashon,” NW].” (Sal. 22:22; 40:5) Sin duda, bo tambe ta stima Yehova i ta di akuerdo ku loke David a bisa: “Bo ta bendishoná, o SEÑOR, Dios di Israel nos tata, pa semper i semper.”​—1 Kró. 29:10-13.

2. (a) Kon nos por alabá Yehova? (b) Ki reto algun ruman ta enfrentá?

² Awe, un manera ku nos por alabá Yehova ta ora nos duna komentario na reunion. Sinembargo, esaki ta un reto pa algun ruman. Nan tin gana di partisipá i duna komentario na reunion, pero nan tin miedu. Kiko un ruman asina por hasi? Ki sugerensia práktiko por yuda nos tur duna komentario animante na reunion? Promé ku nos kontestá e preguntanan ei, laga nos konsiderá kuater motibu importante pa duna komentario na nos reunionnan.

3-5. (a) Segun Hebreonan 13:15, dikon nos ta duna komentario na reunion? (b) Akaso Yehova ta eksigí pa nos tur duna e mesun tipo di komentario? Splika.

³ Yehova a duna nos tur e privilegio di por alab’é. (Sal. 119:108) E komentarionan ku nos ta duna na reunion ta parti di nos “sakrifisio di alabansa,” i ningun hende no por ofresé e sakrifisio ei pa nos. (Lesa Hebreonan 13:15.)  Akaso Yehova ta rekerí pa nos tur ofresé e mesun tipo di sakrifisio, òf komentario? Klaru ku nò!

⁴ Yehova sa ku nos tur tin diferente abilidat i sirkunstansia i e ta apresiá e sakrifisionan ku nos por ofresé na dje. Pensa riba e tipo di sakrifisio ku el a aseptá for di e israelitanan. Algun israelita por a ofresé un lamchi òf kabritu. Pero, si e israelita tabata pober, e por a ofresé “dos tòrteldùif òf dos pichon.” I si un israelita no por a afòrt dos para, Yehova lo a aseptá “e désimo parti di un efa di hariña fini.” (Lev. 5:7, 11) Hariña tabata hopi mas barata, pero asina mes Yehova a aseptá e sakrifisio ei, tanten ku e tabata “hariña fini.”

⁵ Ainda nos bondadoso Dios ta pensa meskos. Ora nos duna komentario, e no ta eksigí pa nos tur ta mes elokuente ku Apolo òf pa nos ta mes konvinsente ku Pablo. (Echo. 18:24; 26:28) E úniko kos ku Yehova ke ta pa nos duna e mihó komentario ku nos por duna segun nos kapasidat. Pensa riba e biuda ku a ofresé dos sèn pretu. E tabata presioso den Yehova su bista pasobra el a duna tur loke e tabata por.​—Luk. 21:1-4.

6. (a) Segun Hebreonan 10:24 i 25, kon e komentarionan di otro hende por laga nos sinti? (b) Kon bo por mustra ku bo ta apresiá nan komentarionan?

⁶ Nos ta animá otro ku nos komentarionan. (Lesa Hebreonan 10:24, 25.) Nos tur ta apresiá e diferente tipo di komentario ku nos ta skucha na nos reunionnan. Nos gusta skucha e komentarionan sinsero di mucha chikitu. I ta animante pa skucha un hende duna komentario riba un bèrdat ku el a kaba di siña. Ademas, nos ta atmirá hende ku ta tímido òf ku a kaba di kuminsá siña nos idioma i tòg ta “tuma un kurashi” pa duna komentario. (1 Tes. 2:2) Kon nos por mustra ku nos ta apresiá nan esfuerso? Despues di reunion nos por gradisí nan pa nan komentario animante. Un otro manera ku nos por mustra nos gratitut ta di duna komentario nos mes. Asina ei, no ta nos so ta risibí animashon pero nos ta yuda animá otronan tambe.—Rom. 1:11, 12.

7. Kon nos ta benefisiá ora nos duna komentario?

⁷ Nos tambe ta benefisiá ora nos duna komentario. (Isa. 48:17) Kon asina? Di promé, si nos tin komo meta pa  duna komentario, nos lo tin un motibu èkstra pa prepará bon pa reunion. Ora nos prepará bon, nos lo komprondé Yehova su palabra mihó. I mas mihó nos komprondé Yehova su palabra, mas fásil lo e ta pa nos apliká loke nos ta siña. Di dos, probablemente nos lo disfrutá mas di e reunionnan pasobra nos tambe ta partisipá. Di tres, komo ku ta rekerí esfuerso pa duna komentario, hopi bes nos ta keda kòrda e komentario ku nos a duna pa basta tempu.

8-9. (a) Manera Malakías 3:16 ta mustra, kon bo ta pensa ku Yehova ta sinti ora nos hasi esfuerso pa duna komentario? (b) Ki miedu algun di nos por tin ainda?

⁸ Nos ta agradá Yehova ora nos papia di nos fe. Nos por tin sigur ku Yehova ta skucha nos i ku e ta apresiá e esfuerso ku nos ta hasi pa duna komentario na reunion. (Lesa Malakías 3:16.) Komo ku Yehova ta apresiá e esfuerso ku nos ta hasi, e ta bendishoná nos.​—Mal. 3:10.

⁹ Pues, ta klaru ku nos tin bon motibu pa duna komentario na reunion. Asina mes, algun di nos por tin miedu pa hisa man. Si abo ta sinti asina, no desanimá. Nos lo konsiderá algun prinsipio i ehèmpel bíbliko, i tambe algun sugerensia práktiko ku por yuda nos tur duna mas komentario na reunion.

10. (a) Kiko ta duna mayoria di nos miedu? (b) Dikon miedu pa duna komentario por ta algu bon?

¹⁰ Bo ta sinti bo kurason bati te den bo garganta ora bo pensa di hisa man pa duna un komentario? Si esei ta e kaso, bo no ta bo so. E bèrdat ta ku mayoria di nos ta haña un tiki miedu ora di duna komentario. Pero, promé ku bo por trata ku e sintimentu di miedu ei, bo mester identifiká kiko eksaktamente ta duna bo miedu. Por ehèmpel, bo tin miedu ku bo ta bai lubidá loke bo ke bisa òf ku lo bo bisa algu robes? Bo ta preokupá ku bo komentario lo no ta mes bon ku e komentarionan di otro ruman? En realidat, e tipo di miedu ei por ta algu bon. E ta indiká ku bo ta un persona  humilde i ku bo ta mira otro hende superior na bo. Yehova ta stima humildat. (Sal. 138:6; Flp. 2:3) Pero, Yehova ke pa bo alab’é i tambe animá bo rumannan na reunion. (1 Tes. 5:11) Yehova ta stima bo i lo e duna bo e kurashi ku bo tin mester.

11. Ki rekordatorio den Beibel por yuda nos?

¹¹ Laga nos konsiderá algun rekordatorio ku nos ta haña den Beibel. Beibel ta bisa ku nos tur ta faya ora di papia. (Sant. 3:2) Yehova no ta ferwagt pa nos ta perfekto i nos rumannan tampoko no ta ferwagt esei. (Sal. 103:12-14) Nan ta nos famia spiritual i nan stima nos. (Mar. 10:29, 30; Huan 13:35) Nan ta komprondé ku no ta semper nos komentario ta sali manera nos ke.

12-13. Kiko nos ta siña for di e ehèmpelnan di Nehemías i Yonas?

¹² Pensa riba algun ehèmpel di Beibel ku por yuda bo vense bo miedu. Bo ta kòrda Nehemías? E tabata traha pa un rei poderoso. Nehemías tabata tristu pasobra el a skucha ku e muraya- i portanan di Herúsalèm tabata tur ruiná. (Neh. 1:1-4) Imaginá bo kon nèrvioso Nehemías lo tabata ora e rei a puntr’é pa splika dikon e tabata asina tristu. Kisas e tabata sinti su kurason ta bati te den su garganta. Mesora el a hasi un orashon den silensio i despues el a duna un kontesta. Komo resultado, e rei a hasi hopi kos pa yuda Dios su pueblo. (Neh. 2:1-8) Pensa tambe riba Yonas. Ora Yehova a pidi Yonas pa bai papia ku e habitantenan di Nínive, Yonas tabatin asina tantu miedu ku el a kore bai den e direkshon kontrali. (Yon. 1:1-3) Pero ku yudansa di Yehova, Yonas a kumpli ku su asignashon. I su palabranan a benefisiá e ninivitanan masha hopi mes. (Yon. 3:5-10) For di e ehèmpel di Nehemías nos ta siña ku ta importante pa nos hasi orashon promé ku nos duna kontesta. I for di e ehèmpel di Yonas nos ta siña ku Yehova por yuda nos sirbié sin importá kuantu miedu nos tin. Pero si bo pens’é bon, akaso tin un kongregashon awe ku ta mes intimidante ku e ninivitanan?

¹³ Ki sugerensia práktiko por yuda bo duna komentario animante na reunion? Ban wak algun sugerensia.

14. Dikon nos tin ku prepará bon pa nos reunionnan, i ki ora nos por hasi esei?

¹⁴ Prepará pa kada reunion. Ora bo plania adelantá i prepará bon, lo bo tin mas konfiansa pa duna komentario. (Pro. 21:5) Ta klaru ku no ta nos tur tin e mesun skèdjel di prepará pa reunion. Por ehèmpel, Eloise, un biuda ku tin mas ku 80 aña ta kuminsá prepará pa e estudio di E Toren di Vigilansia na komienso di siman. E ta bisa: “Mi ta disfrutá mas di e reunionnan si mi studia adelantá.” Joy, kende tin un trabou fultaim, ta saka tempu djasabra pa studia su Toren di Vigilansia. E ta bisa: “Pa ami ta mas fásil pa kòrda loke mi a studia si  mi prepará un tiki promé ku reunion.” Ike, un ansiano hopi drùk i ku ta un pionero regular tambe, ta bisa: “Ami ta haña mas fásil pa studia un tiki tur dia en bes di studia tur kos den un biaha.”

15. Kiko nos tin ku hasi pa prepará bon pa reunion?

¹⁵ Kiko nos tin ku hasi pa prepará bon pa reunion? E promé kos ku nos tin ku hasi ta pidi Yehova pa spiritu santu promé ku nos kuminsá prepará pa reunion. (Luk. 11:13; 1 Huan 5:14) Despues, nos tin ku tuma algun minüt pa analisá e título di e artíkulo, e suptemanan, e plachinan i e kuadronan. Segun ku bo ta studia kada paragraf, lesa mas tantu di e tekstonan menshoná ku ta posibel. Meditá riba e informashon i duna èkstra atenshon na e puntonan ku bo ke komentá riba dje. Mas mihó bo prepará, mas benefisio lo bo saka i lo ta mas fásil pa bo duna komentario.—2 Kor. 9:6.

16. Ki hèrmènt ta disponibel pa bo, i kon bo ta usa nan?

¹⁶ Si ta posibel, usa e hèrmèntnan elektróniko ku ta disponibel den un idioma ku bo konosé. Mediante su organisashon, Yehova a duna nos hèrmènt elektróniko pa yuda nos prepará pa reunion. E JW Library^® app ta duna nos e posibilidat di download publikashon riba nos aparatonan elektróniko. Si nos hasi esei, nos por studia, òf por lo ménos lesa òf skucha, e material ku nos a download ki ora i na unda ku ta. Algun hende ta usa e JW Library^® app pa studia durante nan pousa na trabou òf na skol, òf miéntras ku nan ta riba kaminda. Ta hopi fásil pa nos hasi investigashon riba algun punto den e lès ku nos ta studia si nos hasi uso di Watchtower Library òf BIBLIOTEKA ONLINE Watchtower.

17. (a) Dikon ta importante pa prepará mas ku un komentario? (b) Kiko bo a siña for di e vidio Bira Amigu di Yehova​—Prepará pa Duna Komentario?

¹⁷ Si ta posibel, prepará mas ku un komentario pa kada lès. Dikon? Pasobra no ta semper lo bo haña bùrt ora bo hisa bo man. Probablemente, lo tin otro hende ku ta hisa nan man huntu ku bo i e ruman ku ta dirigí e estudio por skohe un di nan. Ademas, esun ku ta dirigí e estudio tin ku hasi sigur ku e reunion ta kaba na tempu. P’esei, tin ora e mester limitá e kantidat di komentario riba kada pregunta. Pues, no sinti bo ofendí òf desanimá si bo no haña bùrt na komienso di e estudio. Si bo prepará mas ku un komentario, lo bo tin mas oportunidat pa partisipá. Bo por asta prepará pa lesa un di e tekstonan den e lès. Pero, si ta posibel, prepará pa duna un komentario den bo mes palabra. *

18. Dikon ta importante pa duna komentario breve?

 ¹⁸ Duna komentario breve. Mayoria di biaha e komentarionan mas animante ta kòrtiku i simpel. Pues, purba di duna komentario no mas largu ku 30 sekònde. (Pro. 10:19; 15:23) Si bo tin hopi aña ta duna komentario na reunion, ta importante pa bo pone bon ehèmpel i tene bo komentario breve. Si bo duna komentario kompliká i largu, otronan por sinti nan intimidá i nan por pensa ku nan komentario no ta mes bon ku esun di bo. Ademas, komentario breve ta permití mas hende haña bùrt. Si bo ta e promé ku a haña bùrt pa duna kontesta riba un pregunta, duna un komentario simpel i direkto. No purba di kubri tur e puntonan den e paragraf. Unabes ku un persona a kubri e punto prinsipal di e paragraf, bo por komentá riba otro punto adishonal.​—Wak e kuadro “ Ki Komentario Mi Por Duna?”

19. Kon e ruman ku ta dirigí por yuda bo, pero kiko bo tin ku hasi?

¹⁹ Laga e ruman ku ta dirigí sa ku bo ke duna komentario riba un paragraf spesífiko. Si bo disidí di hasi esaki, bo mester bai serka e ruman ku ta dirigí e estudio promé ku reunion kuminsá. Ora e ruman ku ta dirigí hasi e pregunta ku bo ke duna komentario riba dje, hisa bo man lihé i haltu sufisiente pa e por wak bo.

20. Dikon nos por kompará nos reunion ku kuminda ku nos ta kompartí ku bon amigu?

²⁰ Nos por kompará nos reunionnan ku un kuminda ku nos ta kompartí ku algun bon amigu. Imaginá bo ku algun ruman den e kongregashon a organisá un barbekiú i nan a puntra bo pa bo tambe trese algu di kome. Kiko lo bo hasi? Kisas bo ta bira nèrvioso, pero lo bo hasi bo bèst pa trese algu ku tur hende lo gusta. Di mes manera, Yehova a invitá nos na e reunionnan. Ei e ta perkurá un bankete yen di kuminda. (Sal. 23:5; Mat. 24:45) Yehova ta keda hopi kontentu ora nos tambe trese algu, aunke ta algu simpel, basta esei ta lo mihó ku nos por ofresé. Pues, prepará bon i duna mas tantu komentario posibel. E ora ei, lo bo no djis kome na Yehova su mesa, pero lo bo trese algu pa kompartí ku e kongregashon tambe.