Pa hopi siglo, epidemia a kousa morto di miónes di persona pasobra ningun hende tabata sa kon malesa kontagioso ta plama. Ku tempu e sientífikonan a haña sa e bèrdat. Nan a deskubrí ku mikro-organismo manera bakteria i vírùs ta kousa hopi malesa. E deskubrimentu ei a yuda prevení i trata hopi malesa, i míles di miónes di hende por biba mas largu i mas saludabel.

Kiko di otro pregunta importante manera esnan menshoná aki bou? Bo ta kere ku si bo haña sa e bèrdat tokante e preguntanan akí, esei lo tin bon efekto riba bo bida?

• Ken Dios ta?

• Ken Hesukristu ta?

• Kiko e Reino di Dios ta?

• Kiko ta spera nos den futuro?

Miónes di hende a haña kontesta pa e preguntanan ei i nan bida a mehorá. E kontesta pa e preguntanan ei por tin e mesun efekto riba bo bida.

Kisas bo ta puntra bo mes si akaso ta posibel pa haña sa e bèrdat tokante kualke kos awendia. Bon mirá, dia pa dia ta bira mas difísil pa haña sa si algu ta bèrdat òf nò. Dikon?

Wèl, hopi hende no tin konfiansa ku gobièrnu, negoshi òf medio di komunikashon ta papia bèrdat. Nan ta haña ku ta difísil pa saka afó si loke ta ser bisá ta bèrdat, djis un opinion, mitar bèrdat òf si ta mentira. Komo ku hende no ta konfia otro i hopi informashon ta inkorekto, hende no ta di akuerdo ku otro enkuanto kiko realmente ta bèrdat i kiko esei ta nifiká pa nan.

Apesar di e retonan ei, tòg ta posibel pa haña kontesta konfiabel pa e preguntanan di mas importante di bida. Kon? Na e mesun manera ku nos ta buska kontesta pa otro pregunta.

Di un òf otro manera, hende ta buska e bèrdat tokante sierto kos tur dia. Ban wak e ehèmpel di Jessica. El a bisa: “Mi yu muhé no tin mag di kome pinda. Su alergia ta asina severo ku un kantidat masha chikitu di proteina di pinda por mat’é.” P’esei, Jessica mester chèk bon si e kuminda ku e ta kumpra ta safe pa su yu muhé. El a sigui bisa: “E promé kos ku mi ta hasi ta lesa e lista di kontenido di e komestibelnan bon pa wak kiko ta e ingredientenan. Despues mi ta hasi mas investigashon i asta mi ta yama e fábrika pa hasi sigur ku e produkto no a ser kontaminá ku pinda. Ademas, mi ta bolbe chèk ku fuente konfiabel si e manera ku e kompania ta prosesá e alimento ta safe.”

Kisas e preguntanan ku abo ta purba di haña kontesta p’e no ta asina importante manera esnan di Jessica. Pero bo por usa e siguiente método ku Jessica a usa pa haña kontesta pa kualke pregunta ku bo por tin:

• Buska pa sa tur dato.

• Hasi investigashon adishonal.

• Hasi sigur ku bo fuentenan ta konfiabel.

E método akí por yuda bo haña kontesta pa e preguntanan di mas importante di bida. Ban wak kon.

Ora Jessica tabata buskando e bèrdat den Beibel, el a usa e mesun método ku e ta usa pa hasi sigur ku e alimento ku e ta kumpra no ta kontaminá ku pinda. El a bisa: “Mi a lesa i hasi bon investigashon pa mi haña e bèrdat den Beibel.” Miónes di hende a hasi loke Jessica a hasi pa investigá loke Beibel ta siña tokante e siguiente preguntanan:

• Kiko ta e propósito di bida?

• Kiko ta pasa ku nos ora nos muri?

• Dikon nos ta sufri?

• Kiko Dios ta hasiendo pa kaba ku sufrimentu?

• Kon nos por tin un bida di famia felis?

Bo por haña kontesta konfiabel pa e preguntanan ei i pa kualke otro pregunta si bo lesa Beibel i hasi investigashon adishonal online riba www.ps8318.com.