Djárason mainta, dia 5 di sèptèmber 2012, e famia di Bètel di Merka i Canada a haña e notisia ku e Kuerpo Gobernante di Testigunan di Yehova a haña un miembro nobo. Sí, nan a haña sa ku desde 1 di sèptèmber 2012, Mark Sanderson a kuminsá sirbi komo miembro di e Kuerpo Gobernante.

Ruman Sanderson a lanta den e bèrdat huntu ku su famia na San Diego, California, Merka, i el a batisá 9 di febrüari 1975. Dia 1 di sèptèmber 1983, el a kuminsá sirbi komo pionero na Saskatchewan, Canada; na desèmber 1990, el a gradua for di e di shete klas di e Skol di Entrenamentu Ministerial (ku awor yama Skol Bíbliko pa Ruman Hòmber Soltero) na Merka. Na aprel 1991, ruman Sanderson a ser nombrá komo pionero spesial pa sirbi riba e isla di Newfoundland, na Canada. Despues di a sirbi komo superintendente di sirkuito supstituto, na febrüari 1997, el a haña invitashon pa forma parti di e famia di Bètel na Canada. Na novèmber di aña 2000, el a haña asignashon pa bai traha na e sukursal di Merka. Einan, el a traha den e departamento di Servisio di Informashon di Hospital i despues den e Departamento di Sirbishi.

Na sèptèmber 2008, Ruman Sanderson a asistí na e Skol pa Miembro di Komité di Sukursal i despues di esei, el a ser nombrá komo miembro di Komité di Sukursal na Filipinas. Na sèptèmber 2010, el a haña invitashon pa bai Merka bèk, unda el a sirbi komo ayudante di e rumannan den e Komité di Sirbishi di e Kuerpo Gobernante.