Kiko Ta e Propósito di Bida?

DIKON TA IMPORTANTE PA HAÑA E KONTESTA? Un di e kosnan ku mas ta molestia e ser humano ta e pensamentu ku bida no tin propósito. Di otro banda, un persona ku tin un propósito bon kla definí den bida por soportá kosnan desagradabel i rekuperá lihé di nan. Viktor E. Frankl, un neurólogo i un sobrebibiente di Holokousto, a skirbi: “Mi ta tribi di bisa ku no tin nada na mundu ku por yuda un hende perseverá asina bon—asta bou di e kondishonnan di mas difísil—manera e echo ku e persona sa ku su bida tin propósito.”

Sin embargo, tin masha hopi opinion kontradiktorio riba e tópiko aki. Hopi hende ta haña ku ta kada persona tin ku disidí pa su mes kiko ta e propósito di bida. Na kontraste, algun hende ku ta kere den evolushon ta siña otronan ku bida no tin un berdadero propósito.

Pero en realidat, e manera mas lógiko pa haña sa e propósito di bida ta dor di akudí na e Dunadó di Bida, Yehova Dios. Konsiderá loke su Palabra tin di bisa riba e tópiko aki.

Loke Beibel Ta Bisa

Beibel ta siña ku Yehova Dios tabatin un propósito spesífiko pa hende hòmber i muhé ora el a krea nan. Yehova a duna nos promé mayornan e mandamentu aki:

Génesis 1:28. “Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.”

Dios su propósito tabata pa Adam ku Eva i nan yunan hasi henter e tera un paradeis. Su propósito no tabata pa hende bira bieu i muri, ni e no tabata ke pa hende kousa daño na e medio ambiente. Sin embargo, debí ku nos promé mayornan a tuma desishon robes, nos a heredá piká i morto. (Génesis 3:2-6; Romanonan 5:12) Apesar di esei, Yehova su propósito no a kambia. Pronto henter e tera lo bira un paradeis.—Isaias 55:10, 11.

Yehova a krea nos ku tantu e kapasidat físiko komo intelektual pa kumpli ku su propósito. E no a krea nos pa biba independiente di dje. Mira kon e siguiente tekstonan di Beibel ta deskribí Dios su propósito pa nos.

Eklesiastés 12:13. “E konklushon di tur loke ku a wòrdu tendí, ta: teme Dios i warda su mandamentunan, pasobra esaki ta aplikabel na kada persona.”

Mikeas 6:8. “Kiko SEÑOR ta eksigí di bo, si no ta pa hasi hustisia, pa stima miserikòrdia, i pa kana humildemente ku bo Dios?”

Mateo 22:37-39. “‘Stima SEÑOR bo Dios ku henter bo kurason, i ku henter bo alma, i ku henter bo mente.’ Esaki ta e gran mandamentu i e di promé. I e di dos ta semehante: ‘Stima bo próhimo manera bo mes.’”

Kontesta Bíbliko Ta Duna Berdadero Pas Mental

Pa kualke aparato kompliká por funshoná bon, mester us’é na armonia ku su propósito i segun e instrukshon di esun ku a trah’é. Asina tambe, si nos no ke hasi daño na nos  mes—sea ta den sentido spiritual, mental, emoshonal òf físiko—nos mester usa nos bida segun e instrukshon di nos Kreadó. Konsiderá kon e echo ku nos sa kiko ta Dios su propósito por duna nos pas mental den e siguiente aspektonan di bida:

Ora di pone prioridat, hopi hende awe ta dediká nan bida na akumulá rikesa. Sin embargo, Beibel ta spièrta ku “esnan ku kier bira riku ta kai den tentashon i den trampa i den hopi deseonan loko i dañino.”—1 Timoteo 6:9, 10.

Di otro banda, esnan ku siña stima Dios en bes di plaka ta deskubrí kon pa keda satisfecho ku loke nan tin. (1 Timoteo 6:7, 8) Nan ta komprondé ku ta importante pa traha duru, i sa ku nan tin e obligashon pa perkurá pa nan propio nesesidatnan físiko. (Efesionan 4:28) Pero tambe, nan ta tuma Hesus su spièrtamentu na serio: “Ningun hende no por sirbi dos shon; pasobra òf e lo odia esun i stima e otro, òf e lo ta leal na esun i despresiá e otro. Boso no por sirbi Dios i Rikesa.”—Mateo 6:24.

P’esei, en bes di laga trabou i korementu tras di rikesa bira e kos prinsipal den nan bida, hende ku ta stima Dios ta pone hasimentu di su boluntat na promé lugá. Nan sa ku si e boluntat di Dios ta e kos mas importante den nan bida, Yehova Dios lo perkurá pa nan. En realidat, Yehova ta konsiderá esei komo su obligashon.—Mateo 6:25-33.

Ora di trata ku hende, hopi ta esnan ku ta pone nan mes na promé lugá. Awendia, humanidat no tin pas, i e motibu prinsipal ta pasobra hende a bira “stimadó di nan mes, . . . sin amor.” (2 Timoteo 3:2, 3) Ora un hende desepshoná nan òf no ta di akuerdo ku nan punto di bista, nan ta ekspresá nan mes ku “rabia, griteria i kalumnia.” (Efesionan 4:31) Pues, en bes di trese pas mental, ‘ta pleitu’ so falta di dominio propio ta kousa.—Proverbionan 15:18.

Na kontraste, hende ku ta obedesé Dios su mandamentu pa stima nan próhimo manera nan mes ta ‘kariñoso ku otro, miserikòrdioso, i ta pordoná otro.’ (Efesionan 4:32; Kolosensenan 3:13) Asta ora otro hende no ta trata nan bon, nan ta purba imitá Hesus, kende “no a zundra bèk” ora nan a zundr’é. (1 Pedro 2:23) Meskos ku Hesus, nan ta komprondé ku sirbi otro hende ta duna berdadero satisfakshon, asta ora esnan ku nan ta sirbi no ta mustra apresio pa esei. (Mateo 20:25-28; Juan 13:14, 15; Echonan 20:35) Yehova Dios ta duna su spiritu na esnan ku ta imitá su Yu, i e spiritu aki ta produsí berdadero pas mental den nan bida.—Galationan 5:22.

Pero, ki efekto e manera ku bo ta mira futuro por tin riba bo pas mental?

[Komentario na página 6]

Un persona mester tin un propósito bon kla definí den bida

[Plachi na página 7]

Hesus ta siña nos kon pa haña pas mental