E ESKRITORNAN di Evangelio a deskribí vários suseso durante e sirbishi di Hesus kaminda el a hañ’é konfrontá ku polítika. Por ehèmpel, djis despues ku el a batisá na edat di 30 aña, Diabel a ofres’é e puesto di gobernante di mundu. Despues, durante su sirbishi, un multitut kier a hasié rei. Anto mas despues, algun hende a purba di hasié un aktivista polítiko. Kon Hesus a reakshoná? Laga nos analisá e susesonan akí.

Gobernante di mundu. E Evangelionan ta konta ku Diabel a ofresé Hesus poder pa goberná “tur e reinonan di mundu.” Imaginá bo kon bon Hesus lo por a yuda humanidat ku ta sufri si e por a ehersé e poder ei komo gobernante di henter mundu! Pero Hesus a rechasá Satanas su oferta. Un persona ku sinseramente ta pensa ku ta e gobièrnunan por yuda humanidat lo no a para riba un nò manera Hesus a hasi. (Mateo 4:8-11) Siendo ku Hesus a demostrá ku e tabata masha interesá den humanidat, e mester tabatin un bon motibu pa rechasá e oferta ei.

Rei. Hopi hende den tempu di Hesus tabata desesperá pa haña un gobernante ku por a solushoná nan problemanan ekonómiko i polítiko. Nan a keda impreshoná ku loke Hesus por a hasi, i p’esei nan tabata ke pa e drenta den polítika. Kon el a reakshoná? E Evangelio di Huan ta bisa: “Komo ku Hesus tabata sa ku nan tabata serka di bin gar’é pa hasié rei, el a kita for di einan i bolbe bai su so den seru.” (Huan 6:10-15) Klaramente, Hesus no kier a enbolbé su mes den polítika.

Aktivista polítiko. Tuma nota di loke a pasa algun dia promé ku nan a mata Hesus. Disipel di e fariseonan (kendenan tabata na fabor di independensia for di e Imperio Romano) huntu ku partidario di Heródes (pertenesiendo na un partido polítiko na fabor di Roma) a bini serka Hesus. Nan kier a oblig’é duna su opinion tokante polítika, i p’esei nan a puntr’é si hudiu mester paga belasting na gobièrnu di Roma.

E Evangelio di Marko ta bisa nos kiko Hesus a kontestá nan: “‘Pakiko boso ta purba di kue mi den trampa? Mustra mi un denario.’ Nan a trese un p’e. I el a puntra nan: ‘Ta  ken su kara i título esaki ta?’ Nan di kuné: ‘Di Sésar.’ E ora ei Hesus a bisa nan: ‘Duna Sésar loke ta di Sésar, ma Dios loke ta di Dios.’” (Marko 12:13-17) Komentando riba e motibu pakiko Hesus a kontestá asina, e buki na ingles Iglesia i Estado—Historia di Dos Reino a bisa: “El a nenga di hunga e papel di un mesías polítiko i kuidadosamente a establesé e límite entre loke ta pertenesé na Sésar i loke ta pertenesé na Dios.”

Esaki no ke men ku Hesus no tabata interesá den problemanan manera pobresa, korupshon i inhustisia. Al kontrario, Beibel ta mustra ku e kondishon lamentabel di e hendenan rònt di dje a konmov’é profundamente. (Marko 6:33, 34) Pero tòg e no a start ku un kampaña pa kaba ku e inhustisia ku tabata reina den mundu, maske algun hende a purba di enbolb’é den sierto asuntu polítiko kontroversial di e tempu ei.

Pues, manera e ehèmpelnan akí ta mustra bon kla, Hesus a nenga di mete den asuntu polítiko. Pero kiko di kristiannan djawe? Nan mester ta den polítika?