“Abo ta sinti bo bon sin Dios? Miónes di hende ta sinti asina.” Asina tabatin pará riba un bòrchi di propaganda ku un grupo di ateista a spònser. Aparentemente, nan ta haña ku nan no tin mester di Dios.

Di otro banda, hopi hende ku ta bisa ku nan ta kere den Dios ta demostrá nèt lo kontrali den nan akshonnan. Nan ta hasi komo si fuera Dios no ta eksistí mes. Salvatore Fisichella, un arsobispu katóliko, a bisa di e miembronan di su iglesia: “Awendia, ora un hende wak nos, lo e no kere ku nos ta kristian, pasobra nos ta biba meskos ku hende ku no ta kere den Dios.”

Tin hende ta asina drùk ku nan no tin tempu pa pensa riba Dios. Nan ta haña ku e ta muchu alehá pa e nifiká algu pa nan. Ta ora nan ta den problema òf ora nan tin mester di algu so nan ta akudí na dje—komo si fuera ta nan kriá e ta pa ora nan tin mester di dje.

Otronan no ta duna muchu balor na doktrina religioso, òf no ta praktiká loke nan ta siña den nan misa. Por ehèmpel, 76 porshento di katólikonan na Alemania ta haña ku ta normal pa un hòmber ku un muhé biba huntu promé ku nan kasa; esei ta un punto di bista ku ta bai kontra loke tantu nan misa komo Beibel ta siña. (1 Korintionan 6:18; Hebreonan 13:4) Naturalmente, no ta katólikonan so ta realisá ku tin un gran diferensia entre loke nan ta siña ku loke nan ta hasi. Lidernan di hopi otro religion tambe ta lamentá ku nan miembronan ta komportá nan meskos ku ateista.

E ehèmpelnan akí ta hiba na e pregunta: Di bèrdat nos tin mester di Dios? E kuestion akí no ta nada nobo. Nos por hañ’é for di e promé páginanan di Beibel. Pa nos haña kontesta riba e pregunta, laga nos analisá algun kuestion ku Génesis, e promé buki di Beibel, ta trese padilanti.