SI BO ta un mayor, bo por komprondé e sintimentunan ekspresá den e ehèmpelnan ei? Ora bo haña bo mes den situashonnan similar, kisas bo ta puntra bo mes: ‘Mi mester disipliná mi yu? Si ta sí, kon?’ Òf, ‘ta malu pa disipliná yu?’

Den Beibel e palabra “disiplina” no ta djis un otro palabra pa kastigu. Disiplina ta relashoná prinsipalmente ku instrukshon, edukashon i korekshon. E no tin nada di haber ku abusu ni krueldat.—Proverbionan 4:1, 2.

Nos por kompará e disiplina ku un mayor ta duna ku trahamentu den un hardin. Un hardinero ta prepará su tera, muha su matanan i duna nan vitamina. Ademas, e ta protehá nan kontra pèst i mal yerba. Segun ku e matanan ta krese, ratu ratu e hardinero tin ku snui nan pa yuda nan krese den e direkshon korekto. E hardinero sa ku e por usa un kombinashon di vários téknika pa yuda e matanan krese na un manera salú. Asina tambe, mayornan ta eduká nan yunan na diferente manera. Pues, meskos ku un hardinero ta snui mata, asina un mayor ta usa disiplina pa korigí mal kondukta for di trempan pa yuda nan yunan krese den e direkshon korekto. Pero si e hardinero no snui e matanan ku kuidou, nan por sufri daño permanente. Meskos tambe, mayornan mester duna disiplina ku amor.

Yehova, e Dios ku Beibel ta papia di dje, ta un bon ehèmpel pa mayornan den esaki. E disiplina ku Dios ta duna su sirbidónan obediente ta asina efikas i agradabel ku nan ta yega na “stima disiplina.” (Proverbionan 12:1) Nan ‘no ta rechasá e disiplina di SEÑOR, ni aboresé su reprendementu.’ (Proverbionan 3:11) Bo por yuda bo yu reakshoná faborablemente na bo disiplina ora bo imitá e tres maneranan klave ku Dios ta hasié. Dios ta duna disiplina na un manera: (1) amoroso, (2) rasonabel i (3) konsistente.

Dios ta duna disiplina ku amor i motivá pa amor. Beibel ta bisa: “Esun ku SEÑOR ta stima, e ta reprendé, meskos ku un tata ta reprendé e yu ku e tin delisia den dje.” (Proverbionan 3:12) Ademas, Yehova ta ‘yen di kompashon i grasia, i e no ta rabia lihé.’ (Éksodo 34:6) E no ta sin heful ni e no ta duna disiplina na un manera kruel. Tampoko e no ta usa palabra skèrpi i krítika konstante òf hasi chèrchi di hende; e kosnan ei ta hùrt “manera hinká di spada.”—Proverbionan 12:18.

Ta bèrdat ku ningun mayor no por imitá Dios su ehèmpel perfekto di dominio propio kompletamente. Pero asta ora bo pasenshi yega na su límite den momentonan difísil, kòrda semper ku si bo duna kastigu ku rabia, e straf lo ta di mas i lo no duna e resultadonan deseá. Es mas, esei no ta disiplina mes. Al kontrario, e ta un señal di ku bo a pèrdè kabes.

Di otro banda, ora bo ta duna disiplina ku amor i dominio propio, e resultado lo ta mihó. Awor, laga nos wak kon George i Nicole, dos di e mayornan sitá na komienso, a trata nan situashon.

“Ora ku por fin Jordan a yega kas, ami ku mi kasá tabata kunsumí, pero nos a kontrolá nos emoshonnan miéntras nos tabata skucha su splikashon. Ya ku tabata asina lat, nos a disidí di laga e asuntu pa mainta. Nos a hasi orashon huntu i bai drumi. Su manisé, nos tabata den un mihó posishon pa papia riba e asuntu na un manera kalmu, i nos a logra yega na nos yu su kurason. El a rekonosé su fout mesora i no tabatin problema pa aseptá e restrikshonnan ku nos a pone p’e. Nos ta masha kontentu ku nos a realisá ku ora un hende duna un kontesta lihé den su rabia, e no ta haña bon resultado. Si nos tuma tempu pa skucha promé, kasi semper kosnan ta sali mihó.”—George.

“Mi tabata mashá rabiá ora mi a mira ku mi yu hòmber a dal su ruman muhé sin motibu. En bes di reakshoná mesora, mi a mand’é bai den su kamber pasobra mi tabata muchu rabiá pa tuma un desishon rasonabel. Mas despues, ora mi tabata mas trankil, na un manera firme mi a splika mi yu hòmber ku violensia no ta aseptabel i mi a mustr’é kon el a hùrt su ruman muhé. Esaki a duna un bon resultado. El a pidi su ruman muhé despensa i a dun’é un brasa.”—Nicole.

Sí, pa disiplina por ta efikas, asta ora bo tin ku straf bo yu, e mester ta semper motivá pa amor.

Semper Yehova ta duna su disiplina “manera mester ta.” (Yeremías 30:11; 46:28) E ta tene kuenta ku tur sirkunstansia, asta loke no ta asina bisto. Kon mayornan por imit’é? Stephen, kende a ser menshoná na komienso, ta splika: “Nos no por a komprondé dikon Natalie a para ariba ku e no a hòrta e renchi. Maske esei a dal nos duru, nos a purba tòg di tene kuenta ku su edat i su grado di madures.”

Nicole su kasá, Robert, tambe ta purba di tene kuenta ku tur sirkunstansia. Ora e muchanan komportá nan mes malu, bes tras bes e ta puntra su mes: ‘Esaki ta algu ku ta pasa un biaha so òf e ta bai bira un mal kustumber? Ta kansá e muchanan ta? Ta malu nan ta sinti nan? E mal komportashon akí ta un señal di un otro problema?’

Mayornan rasonabel ta kòrda tambe ku mucha no ta adulto chikí. Apòstel Pablo a rekonosé esaki ora el a bisa: “Tempu mi tabata mucha, mi tabata papia manera mucha, pensa manera mucha.” (1 Korintionan 13:11) Robert ta bisa: “Un kos ku ta yuda mi tene un punto di bista balansá i evitá di eksagerá e asuntu ta di kòrda kiko mi mes tabata hasi na chikí.”

Ta masha importante pa bo tin ekspektativanan realístiko i na mes momento no hustifiká òf tolerá kondukta òf aktitut robes. Ora bo tene kuenta ku bo yu su kapasidat-, limitashon- i otro sirkunstansianan, bo por ta sigur ku bo disiplina lo ta balansá i rasonabel.

Malakías 3:6 ta bisa: “Ami, SEÑOR, no ta kambia.” Sirbidónan di Dios ta sinti nan mes sigur pasobra nan tin pleno konfiansa den e palabranan ei. Mucha tambe lo tin e mesun sintimentunan ei ora nan haña disiplina konsistente. Si bo disiplina ta varia segun bo beis, bo yu por keda konfundí òf asta sinti su mes frustrá.

Kòrda ku Hesus a bisa: “Laga boso ‘sí’ ta sí, i boso ‘nò,’ nò.” E palabranan akí ta apliká na kriamentu di yu tambe. (Mateo 5:37) Pensa bon promé ku bo duna bo yu un ultimatum ku bo no tin intenshon di kumpli kuné. Si bo spièrta bo yu ku si e komportá malu, e lo haña disiplina, sòru di kumpli ku bo palabra.

Bon komunikashon entre e mayornan ta esensial pa duna disiplina konsistente. Robert ta splika: “Si mi yunan logra konvensé mi pa laga nan hasi algu ku mi kasá a bisa nan nò kaba, asina mi haña sa, mi ta kambia mi desishon pa mi apoyá mi kasá.” Si mayornan no por yega na un akuerdo tokante kon pa trata un situashon, ta bon pa nan bai papia riba e asuntu nan so promé i yega na un desishon unánime.

Si bo imitá Yehova su disiplina amoroso, rasonabel i konsistente, bo por ta sigur ku bo esfuersonan lo benefisiá bo yunan. Esaki por yuda bo yunan krese i bira adultonan maduro, responsabel i balansá. Manera Beibel ta bisa: “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.”—Proverbionan 22:6.