TÓPIKO PRINSIPAL
Ken Testigunan di Yehova Ta?
“Mi konosé Mike pa hopi tempu kaba. E ta un Testigu di Yehova. Pero mi no tabata sa nada di su religion. Ta ken ta Yehova? Dikon e Testigunan no ta selebrá dianan di fiesta? Akaso Mike tabata den un sekta?”—Becky, California, Merka.
“Ora mi bisiñanan a kuminsá haña kurso di Beibel di Testigunan di Yehova, mi a puntra mi mes: ‘Dikon nan ta yama nan mes Testigunan di Yehova? Esei sí ta un nòmber straño pa un religion.’”—Zenon, Ontario, Canada.
“Ami ku mi esposa tabata pensa ku e Testigunan di Yehova ta bishitá nos djis pa pone nos sinti nos malu ku nos no ta bai misa. I nos tabata haña ku si e religionnan konosí mes no tin loke nos tabata buska, ki mishi un sekta straño manera Testigu di Yehova duna nos loke nos ta buska.”—Kent, Washington, Merka.
“Frankamente, mi no tabata sa ken nan ta ni kiko nan ta kere aden.”—Cecilie, Esbjerg, Dinamarka.
Probablemente bo a yega di mira nan ta prediká di kas pa kas òf na lugánan públiko pa ofresé publikashonnan bíbliko i kurso di Beibel. Kisas un Testigu di Yehova a duna bo e revista akí. I podisé bo ta pensa meskos ku e hendenan ku nos a kaba di menshoná i ta puntra bo mes: ‘Ken Testigunan di Yehova ta realmente?’
Unda bo por bai pa bo haña kontesta pa preguntanan manera: Kiko Testigunan di Yehova ta kere aden? Kon nan ta kubri nan gastunan, manera di e trabou ku nan ta hasi i di nan sentronan di adorashon? Dikon nan ta pasa na bo kas i aserká bo na lugánan públiko?
Cecilie, ku nos a menshoná mas promé, a bisa: “Mi a lesa hopi tokante Testigunan di Yehova riba Internet. Tambe mi a tende algun rumor i a skucha hopi kos malu di nan for di hende ku tin un punto di bista negativo di nan. P’esei mi a kuminsá pensa malu di Testigunan di Yehova.” Pero despues ku Cecilie a papia personalmente ku Testigunan di Yehova, el a haña kontesta satisfaktorio pa su preguntanan.
Abo ke haña kontesta for di un fuente konfiabel pa e preguntanan ku bo tin tokante Testigunan di Yehova? Wèl, nos ta animá bo pa puntra esnan ku ta publiká e revista akí, esta, Testigunan di Yehova. Pasobra serka nan bo ta haña kontesta konfiabel. (Proverbionan 14:15) Nos ta spera ku e siguiente artíkulonan lo yuda bo haña sa ken nos ta, kiko ta nos kreensianan i tambe dikon nos ta hasi e trabou ku nos ta hasi.
