E boluntat di Dios ta pa bo konos’é komo persona, hala serka dje, anto stim’é i sirbié ku henter bo kurason. (Mateo 22:37, 38; Santiago 4:8) Pa bo por siña kon pa hasi e boluntat di Dios, ta bon pa bo analisá e bida i siñansanan di Hesus. (Huan 7:16, 17) Hesus no solamente a papia di e boluntat di Dios, sino el a biba tambe na armonia kuné. De echo, Hesus a bisa ku su propósito den bida no tabata ‘pa hasi su boluntat, ma pa hasi boluntat di esun ku a mand’é.’—Huan 6:38.

Mi mester haña un señal, vishon òf yamada spesial pa sa kiko Dios ke pa mi hasi?

 Nò, pasobra Beibel ta kontené e mensahe ku Dios tin pa humanidat. E tin tur loke bo mester pa bo ta “kompletamente prepará pa tur bon obra.” (2 Timoteo 3:16, 17) Dios ke pa bo usa Beibel huntu ku bo “kapasidat di pensa” pa haña sa kiko e ta ferwagt di bo.—Romanonan 12:1, 2; Efesionan 5:17.

Di bèrdat mi por hasi Dios su boluntat?

 Sí, pasobra Beibel ta bisa di Dios ku “su mandamentunan no ta pisá.” (1 Huan 5:3) Esei no ke men sí ku semper ta fásil pa obedesé Dios su mandamentunan. Pero e benefisionan ku lo bo haña ta muchu mas tantu ku e esfuerso ku bo tin ku hasi. Hesus mes a bisa: “Felis ta esnan ku ta tende e palabra di Dios i ta kumpli kuné!”—Lukas 11:28.