Pordoná ta nifiká despensá un hende ku a ofendé nos òf ku a faya kontra nos. Den Beibel, e palabra griego tradusí komo “pordoná” ta nifiká literalmente “pasa por haltu,” por ehèmpel, ora un persona no ta eksigí e pago pa un debe. Hesus a usa e komparashon ei ora el a siña su siguidónan pa pidi den orashon: “Pordoná nos nos pikánan, pasobra nos tambe ta pordoná tur hende ku debe nos.” (Lukas 11:4) Di igual manera, den e ilustrashon di e esklabo ku no a mustra miserikòrdia, Hesus a splika ku ora bo pordoná un hende, ta manera bo ta kanselá un debe.—Mateo 18:23-35.

 Nos ta pordoná otro ora nos no ta warda renkor i ora nos no ta insistí pa e persona paga nos bèk pa e daño ku el a kousa nos òf pa e pèrdida ku nos a sufri. Beibel ta siña nos ku e base pa pordon ta amor sin egoismo, ya ku amor “no ta keda kòrda e malu ku hende a hasié.”—1 Korintionan 13:4, 5.

Pordoná no ta nifiká:

•   Ignorá òf aprobá loke e persona a hasi. Beibel ta kondená hende ku ta konsiderá loke ta malu inofensivo òf aseptabel.—Isaías 5:20.

•   Hasi manera e persona no a faya. Dios a pordoná Rei David pa e piká serio ku el a kometé, pero e no a protehá David di e konsekuensianan di su akshonnan. Dios a asta laga skirbi e foutnan di David pa awe nos por sa di nan.—2 Samuel 12:9-13.

•   Permití otro hende probechá di bo. Por ehèmpel, suponé ku bo a fia un hende sèn, pero el a malgast’é, i awor e no por paga bo bèk manera el a primintí. E ta sintié masha malu i ta pidi bo pa pordon’é. Bo por skohe pa pordon’é ora bo disidí di no karga renkor, no tir’é na su kara konstantemente i asta kanselá e debe por kompleto. Sinembargo, esei no ta nifiká ku bo mester ta kla i dispuesto pa fi’é sèn e siguiente biaha ku e pidi bo.—Salmo 37:21; Proverbionan 14:15; 22:3; Galationan 6:7.

•   Pordoná sin motibu bálido. Dios no ta pordoná hende ku ta hasi kos pa malu, ta nenga di atmití nan fayo, ta nenga di kambia nan komportashon òf ta nenga di pidi hende ku nan a hùrt pordon. (Proverbionan 28:13; Echonan 26:20; Hebreonan 10:26) E personanan akí ku no ta arepentí ta bira enemigu di Dios, i e no ta ferwagt di nos pa nos pordoná hende ku e mes no a pordoná.—Salmo 139:21, 22.

   Pero, kiko si un hende a trata nos asina kruel i ta nenga di pidi nos pordon òf atmití loke el a hasi? Beibel ta konsehá: “Stòp di rabia i laga furia para.” (Salmo 37:8, Beibel Santu) Aunke nos no ta aprobá loke el a hasi, nos por skohe sí pa no laga rabia dominá nos. Mas bien, nos ta konfia ku Dios lo ten’é responsabel pa loke el a hasi. (Hebreonan 10:30, 31) Ademas, nos por haña konsuelo den e promesa ku pronto Dios lo kaba ku tur herida emoshonal ku aworakí ta kousa nos asina tantu doló.—Isaías 65:17; Revelashon 21:4.

•   “Pordoná” tur kos ku segun nos ta un fayo. Tin biaha, en bes di pordoná un persona ku supuestamente a faya kontra nos, nos tin ku atmití ku nos no tin un bon motibu pa sinti nos mes malu. Beibel ta bisa: “No sea lihé den bo kurason pa rabia, pasobra rabia ta biba den pechu di hende bobo.”—Eklesiástes 7:9, Beibel Santu.

Kon pa pordoná un persona

1.   Kòrda kiko pordon ta enserá. Pordoná no ta nifiká ignorá òf aprobá loke e persona a hasi, ni e no ta nifiká hasi manera e persona no a faya. Simplemente bo ta pasa por haltu di su fayo.

2.   Rekonosé e benefisionan di pordoná. Ora nos no keda rabiá òf karga renkor, nos lo ta mas kalmu, mas salú i mas felis. (Proverbionan 14:30; Mateo 5:9) Mas importante ainda, pa Dios pordoná nos nos pikánan, nos mester pordoná otro hende.—Mateo 6:14, 15.

3.   Mustra komprenshon. Nos tur ta imperfekto. (Santiago 3:2) Meskos ku nos ke pa otro hende pordoná nos, nos tambe mester pordoná e fayonan di otronan.—Mateo 7:12.

4.   Sea rasonabel. Si e fayo no ta dje grave ei, nos por apliká e siguiente prinsipio di Beibel: “Sigui soportá otro.”—Kolosensenan 3:13.

5.   Pordoná lihé. Nos mester trata na pordoná e persona mas pronto posibel en bes di laga e rabia bira pió.—Efesionan 4:26, 27.