A Jesus ulemerk er a klumech er a budech. Me nguaisei, engdi ta el taem e ngdilu er a rechapostol er ngii el kmo: “Lak momdasu el kmo ak uleba budech el mer a beluulchad. Ng dimlak kmei el oba budech, e ak bai mlei el oba saider. Ak mlei ma re ngalek el sechal bo lomtok er a re demerir, ma re ngalek el redil bo lomtok er a re derrir, ma re buchelsechal bo lomtok er a re derrir a re becherir.” (Mt. 10:34, 35) Ngera mle belkul a tekingel?

A Jesus a dimlak el soal el omuchel a klekakeakl er a chelsel a telungalek, engdi ngmle medengei el kmo a osisecheklel a sebechel mekdebechii tia el blekeradel er a chelsel a bebil el telungalek. Me a leuaisei e tirke el sorir el mo disaiplo er a Kristus e mo metecholb a kirir el mo medengei el kmo, a lebebil e a rechedal a telungalek er tir a locha diak el bo ledeu a rengrir el kirel tiang. A lsekum e te mo chobangel a ultok er a becherir el diak el ngar er a klemerang me a lechub a rebebil chedal a telungalek er tir, e ngsebechel el mo meringel er tir el melemolem loba blakerreng el kirel osisecheklel a Kristus.

A Biblia melisiich er a Rekristiano el kmo, “bor a ikel sebechiu el kie el ngar a budech kemiu ma rokui el chad.” (Rom 12:18) Me nguaisei engdi osisecheklel a Jesus a sebechel mo ua “saider” er a chelsel a bebil el telungalek. Tia duubech sel lsekum a ta el chedal a telungalek a kongei osisecheklel a Jesus e a rebebil a otngakl me a lechub e te omtok er ngii. Ngar chouaisei el blekeradel e a rechedal a telungalek el ledak el kiei el ngar er a osisiu el delengchokl, a mo “cherrouel” ngike el mesuub er a klemerang.​—Mt. 10:36.

A redisaiplo er a Kristus el kiei er a delengchokl el kakerous a klaumerang er a rechad er ngii, a lebebil e te mo chobangel a blekeradel el mo melasem er a bltkil a rengrir el mora Jehovah me a Jesus. El ua tiang, a rechederir el diak el ngar er a klemerang a locha mo orrimel er tir el mo celebrate er a holiday er a klechelid. Sel bo lemeasem, e te mo oldeu er a rengul techang? A Jesus a dilu el kmo: “Ngikel betik a rengul era demal malechub e ngdelal el ngaruchei a bltikerreng er ngii el mor tir era mer ngak a diak le redemelek.” (Mt. 10:37, BT) A Jesus a dimlak lolekoi el kmo a redisaiplo er ngii a bo lerredemelel e ngkirir el mo diak el sal betik a rengrir er a rechad er a blirir. E ngbai ullisechakl er tir el mo melilt aike el lmuut el meklou a ultutelel er a klengar. A lsekum a rechedal a telungalek er kid a omtok er a omengull er kid el mora Jehovah, e kede melemolem loubltikerreng el mo er tir engdi ngkired el medengei el kmo a bltkil a rengud el mora Dios a kot er a klengar er kid.

A rechedal a telungalek er kid sel bo lomtok er kid e ngkmal mo mekngit a rengud. Nguaisei engdi a redisaiplo er a Jesus a blechoel el melatk aika el tekingel: “Ngike el diak lekengei el nguu a teluo el kerrekar er ngii e mo oltirakl er ngak a diak lerredemelek.” (Mt. 10:38, NW) A belkul tiang a kmo, a Rekristiano omes a ultok er a telungalek el ta er a ringel el lekengei el mo chobangel a redisaiplo er a Kristus. Osisiu el taem e te oba omelatk el kmo, a ungil blekerdelir a mo ochau a rengrir a rechederir el diak el ngar er a klemerang e mo rulleterir el mo sorir el mo medengei a klumech er a Biblia.​—1 Pe. 3:1, 2.