TIA EL ororem el ua katelengel a diall el ngar chimal a Jordan a ua lak a ultutelel. Engdi ngomes er ngii el kmal mekreos. A Jordan a milsaod el kmo: “A Russell el sechelil a rechad er a blik a ngiluu el meskak er a kdirk kekerei el buik.” Uriul er a lemad a Russell, e a Jordan a mlo medengei el kmo ngkmal mle klou a lerellii er a klengar er a demal rubak me a demal me a delal, el ullengeseu er tir er a chelsel a meringel el taem. Ngmelekoi el kmo: “Chelecha el bla bo kudengelii tiang, e tia el kekerei el sengk a kmal mla mo mekreos er a renguk.”

Me nguaisei, a rechad a kakerous a osengir el kirel a sengk. A chad el kmal oba omereng el saul el kirel a sengk el mlo er ngii a sebechel el omes er ngii el kmal mekreos, el diak a mo mekesiur. A Biblia a mesaod er a lmuut el ngarbab el sengk el ngar er aika el merael a chisel el tekoi el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”​—Johanes 3:16.

Ngar er ngii a sengk el sebechel el mo uchul a diak a ulebengelel el klengar? Alta rebebil a diak lodengelii a kerresel tia el sengk, engdi a remera el Kristiano a omes er ngii el “imis el klou a cheral.” (Psalm 49:8; 1 Petrus 1:18, 19) Engdi ngera uchul me a Dios a tilengetengii a klengar er a Ngelekel el kirel sengk el mo er a beluulechad?

A apostol el Paulus a milsaod er a uchul el kmo: “A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui.” (Rom 5:12) Ngike el kot el chad el Adam a mle durengul el mo er a klengit, e a belsel a klengit a kodall. Me ngokiu ngii, e nguleberk a kodall el mo er a rokui el chad.

 “Ele omeksullel a klengit a kodall, e ngdi diak el ocheraol el sengk er a Dios, a diak a ulebengelel klengar el ngar a Kristus Jesus el Rubak er kid.” (Rom 6:23) A Dios a ulderchii a Ngelekel el Jesus Kristus el mei er a beluulechad el mo tongetengii a cherrungel el klengar er ngii el melubet er a klechad er a kodall. Me ngokiu tia el tenget, el okedongall el ‘olubet’ e a rokui el chad el oumerang er a Jesus a mo nguu a diak a ulebengelel el klengar.​—Rom 3:24, BT.

A Paulus a milsaod el kirel aike el rokui el klengeltengat el Dios a omesterir a remesiungel el okiu a Jesus Kristus el kmo: “Doreng a sulel a Dios er a kmal diak a mekesiur el sengk er ngii el mer kid.” (2 Korinth 9:15) Nguaisei, a olubet a kmal mengasireng me ngdiak el sebechel a chad el mo cherrungel el smodii. Engdi ngera uchul me a olubet a kmal ileakl er a rokui el sengk el mla er a Dios? Ngmekerang e kmal ileakl? * Me ngkirel el mo ua ngera uldesued el kirel? Aki olengit me monguiu a nger er aika el ker el debetik er a Biblia el ngar er aike el ongingil el suobel.