Omenguiu el btuch a sel klaumerang el kmo a btuch, buil, me a planets a ngar ngii a lerellii er a klengar er a rechad. A rechad el menguiu a btuch a kmo, a blechebechel aika el klekedall er a eanged er sel taem er omechell a ochotii el kmo ngmo uangera blekerdelem el chad e mo uangera klengar er kau er a ngar medad.

Alta uchelel omenguiu el btuch ulemuchel er a beluu er a Babilon er a irechar engdi ngkmal dirk popular er chelecha el taem. A doltirakl er a 2012 el survey er a beluu er a Merikel e ngbekord el 33 el basent er tirke el mle survey a kmo omenguiu el btuch a “kora melemalt” e a 10 el basent er tir a kmo, “ngmera el melemalt.” Ngmera el uaisei? Ngdiak. Ikakid a uchul me kede melekoi el uaisei.

• A planets me a btuch a diak a klisichel er a rechad el ua lolekoi a remenguiu a btuch.

• Oumesingd el taem e a prediction er tir a kmal general me ngsebechel melutk el kirel a ngii di el chad.

• A rolel a longuiu a btuch oltirakl er a klaumerang er a ngar er a mong el kmo aika el planets a merael el meliuekl er a beluulechad. Me nguaisei engdi rokui el planets luldimukl er a beluulechad a merael el meliuekl er a sils.

• A prediction er a rekakerous el menguiu a btuch el kirel a chad a diak el lekaisisiu.

• A omenguiu el btuch omii er a rechad el mo 12 el bliongel me a lechub e ng zodiac sign loltirakl er a sils er a cherellir. Me nguaisei engdi a position er a beluulechad a mla mengodech er a chelsel aika el betok el rak, me aika el date er aika el zodiac sign a mla mo diak le chatter er sel taem el sils a mlo engelakl er aike el cheldellel a btuch lulemngakl aika el sign loltirakl er ngii.

Aike el zodiac sign a lolekoi el kmo ngouchais er a blekerdelel a chad. Me nguaisei engdi rechad el osisiu a sils er a cherellir a diak losisiu a blekerdelir. A sils er a cherellel a chad a kmal diak louchais a ngera el kirel a chad. Me a remenguiu a btuch a diak lomes a mera el blekerdelel a chad e bai omes a blekerdelel me a omerellel loltirakl a di assumption. Tia ngdiak le rolel a omengetukel?

A kmal irechar el mei e a rechad osiik er a remengelil. A rebebil er a remengelil ulemes a delechil a charm me a rechad me a lechub e ngrolel a malk a meleches a grain. A rekuk bebil omes a llel a tea me a lechub e ng coffee grounds. Chelecha el taem e tousbech a kat, crystal balls, dice, me a lmuut el bebil el menguiu el kirel a ngar medal a chad el klebesei. Ngmera el sebeched lultuil er a remengelil el mo ouchais el kirel a ngar medad el klebesei? Ngdiak. Ka me dorriter er ngii.

Molatk el kmo, ngdiak el consistent. A prediction er a rechad el mengelil a diak losisiu. Mo lmuut me a lousbech er osisiu el rolel omengelil me ngkakerous a tekingir. El ua tiang a lsekum a chad a mo omes er a reteru el mengelil el kirel omengiuel a kat er ngii, e ngbelkul a kmo a nger er tir a mo osisiu. Nguaisei engdi oumesingd el taem e ngkakerous.

Te dirrek el mla mo oumededenger er a rolel a ongelil lousbech a remengelil me a moktek er tir el mengelil. A remerriter a tekoi a kmo aika el kat me a crystal balls lousbech a di props. A mera er ngii ngika el mengelil a menguiu er a reaction er a chad. El ua tiang, a semmong er omengelil a mo oker a di general el ker e kerekikl el mesuub omerellel me a tekingel a chad el kmo ngera ngouchais er ngii el kirel. E a uriul e ngma credit el kirel a tekoi el ngika el chad a diak lodengei e ouchais er ngii. Me te mla ngmai a betok el udoud er tirka el chad loumerang er tir.

A omenguiu el btuch me a omengelil a ua lolekoi el kmo, ngmla moterekokl a ngar medad. Engdi ngmera el uaisei? A Biblia a kmo ngngar ngii a duch er kid el melilt aike el soad loumerang me a lechub e ngsoad el meruul, e aika ngar ngii a lerellii er a klengar er kid er a ngar medad.​—Josua 24:15.

A remengull er a Dios a ngar ngii a lmuut el ungil luchul e te oltngakl omenguiu el btuch me a omengelil. A Dios ouketui aikang. Ngar er a tekingel Biblia e kede menguiu el kmo: “Ng diak a ngii di le chad er a delongeliu el . . . mengelil, ma diak a omlaoch ma lechub e lolengesakl, ma diak a mo ouuellak, ma lechub e ng olturkechelid, ma lechub e ng ouuelai, ma lechub e ng oltuubladek. A ngii di le chad el meruul a ikal tekoi a olengasech er a rengul a RUBAK.”​—Duteronomi 18:10-12.