Kid el uldidellel a rsechel ngike el kot el chad el Adam a uchul me kede chedal a chimo el telungalek. Me nguaisei, alta rechedal a telungalek a kirir el kaubltikerreng e kakull, engdi chelecha el taem e ngmeringel a debetik er a chouaisei el bltikerreng. A betik a rengul Dios a diak el soal a chouaisei el tekoi.

“Bo le betik a rengum er a re . . . chad el di ua le betik a rengum er kau.”​—LEVITIKUS 19:18.

“Bo le betik a rengmiu er a re cherrouiu.”​—MATEUS 5:44.

Momtab er a rolel a Dios a losaod er a bltikerreng el ngar er a Tekingel er a 1 Korinth 13:4-7, BT el kmo:

“A bltikerreng choba kllourreng ma blekokuii.”

Momtab er tiang: Ngua ngera uldesuem a lsekum a rechad a olecholt er a kllourreng me a blekokuii el mei er kau e diak lengasech a rengrir omrellii a cheleuid?

“A bltikerreng a diak le mechechei.”

Momtab er tiang: Ngua ngera uldesuem a lsekum a rechad a diak loumerang me a lechub e te mechechei er kau?

A bltikerreng a diak “losiik a di klungiolel.”

Momtab er tiang: Ngua ngera uldesuem a lsekum a rechad a mengull a uldesuem e diak di lolemolem er a sorir?

A bltikerreng a “diak lolatk a kngtil a chad.”

Momtab er tiang: A Dios a kongei el ousubes er tirke el riruul a mekngit el mo er ngii. “Ng diak di lolemolem er a ngerrelel; ng diak le kesib a rengul.” (Psalm 103:9) Ngmo ungil a rengud a lsekum a chad el detilemellii a rengul a ousubes er kid. Me ngkired el mo kltmokl el ousubes er tirke el mla tomall a rengud.​—Psalm 86:5.

A bltikerreng a “diak le deu a rengul ra chelebirukel.”

Momtab er tiang: Sel leduubech a mekngit el mei er kid, e ngdiak el soad a loldeu a rengrir a rechad e le kid el chuarm. Me ngdiak el kirel mo dmeu a rengud sel lecharm a rebebil, el uldimukl er tirke el meruul a mekngit el mei er kid.

Me a lsoad el nguu a klengeltengat er a Dios, e ngkirel mo betik a rengud er a rokui el chad. A ta er a rolel a dolecholt a bltikerreng a okiu sel dolengeseu er tirke el ousbech a ngeso.