Molatk er sel kot el kmes el deleuill el sebechel el mo er ngii er a delongelir a rechad, el ngii a deleuill er a rekebtot. Tirka kmal ileakl a deleuill er tir. A Nancy Segal el director er a Twin Studies Center e dirrek el ta er a kebtot a mesaod el kmo “a kebtot a diak a belkul losaod a tekingel e le ngike el tang a kmal ungil medengelii.” A ta el kebtot el redil a mesaod el kirel a deleuill er ngii me a ta er ngii el kmo: “Aki medengei a rokui el tekoi el kirel ngike el kuk tang.”

Ngmekera e uaisei? A omesuub a ochotii el kmo alta delengchokl me a ulekeroul a ngar ngii a lerellii er tiang engdi tir el kmeed el osisiu a genes er tir a uchul me a rekebtot a uaisei.

MUTEBENGII TIANG: Ngike el Ulemeob er kid a kmal ungil medengelkid el ngaruchei er a ngii di el chad. Nguaisei, a ta er a milluches er a Psalm el David a dilu el kmo: “Ke . . . childerderak el mo dmak er a chelsel a delel a delak. Ke miles a chiuesek er a le meruul el ulekedelad el chelderoder . . . er isei el di berrotel. Ke milsekak er uchei er a kmechell. Ma ikel sils el ulebeob el kirek a rokui el di llechukl er a babier er kau.” (Psalm 139:13, 15, 16) Ngdi ta el Dios a ungil medengelii a rellel a bedenged me a dirrek el tekoi el dilubech er a klengar er kid el uchul a blekerdeled. A ileakl el klemedengei er a Dios el kired me a rellel a bedenged oterekeklii a rengud el kmo ngkmal ungil medengelkid el ngar er a bek el rolel.

A David a milluluuch el kmo: “RUBAK, ke mla tirterak me ke medengelkak. Ke medengei a bek el kuruul; ke di ngar cheroid e omtab a rokui el uldesuek. E dirrek el uchei er a kungedecheduch e ke medengei a bo kulekoi.” (Psalm 139:1, 2, 4) Me a lmuut kung a Jehovah a medengei aike el kmal ngar er a chelsel a rengud ngdirrek el “merriter a bek el reng e medengei a bek el uldesuel ma telbilel a reng.” (1 Kronika 28:9; 1 Samuel 16:6, 7) Ngera ngochotii el kirel a Dios aika el bades?

Me alta ngdiak dedu aike el rokui el ngar er a uldesued me a rengud sel doluluuch, engdi Dios a omes aike el doruul e medengelii a uchul me kede meruul aika el tekoi. Ngdirrek el medengei aike el ungil soad el remuul engdi blekeradel a uchul me ngdiak el sebeched el kutmokl. Me a Dios el milebid el meduch loubltikerreng a kmal semeriar el omes e mo medengei a uldesued me a moktek er kid a meruul a tekoi.​—1 Johanes 4:7-10.

 A Bades olterekokl a rengud

• “Rubak a mengkar er a re melemalt e orrenges a nglunguchir.”​—1 PETRUS 3:12.

• A Dios a tibir el kmo: “Ak mo osisecheklau er a rael el kirem el merael er ngii; ak mo osisecheklau e meskau a ngesou er a ungil uldasu.”​—PSALM 32:8.

Ngsebechel ngosukid loutekangel a ringel sel dodengei el kmo a Dios a medengelii a blekeradel el dengar ngii me a uldesued? Molatk er a dilubech el mora Anna el chad er a Nigeria. Ngmelekoi el kmo: “Ak mlo melatk el kmo ngngar ngii a belkul a kulemolem el ngar e le ngkmal mle meringel a klengar. Ak melakl el dil el mlara osbitar lomekerreu er a ngelekek el redil el kmal dirk kekerei el smecher el di mui a fluid er a no er a bdelul. E mocha metik el kmo ngak a smecher el kasinoma a tuk e kirek el mora botk e melai a chemotherapy me a radiotherapy. Ngkmal mle meringel er ngak a ngar er a osbitar er a osisiu el taem el niuing a ngelekek.”

Ngngera ngilsuir a Anna el loutekangel? Ngkmo: “Ak millebedebek a bades el ua Filipi 4:6, 7, el ngii a melekoi el kmo, ‘a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu.’ Sel kdobedebekii tia el bades e ak mo melechesiu er a kmes el deleuill er ngak me a Jehovah, el ngii a lmuut el ungil medengelkak er ngak. Ak dirrek el ngilai a omelisiich er a rudam me a rudos er ngak er a ongdibel.

“Me alta ngdirk ngngar ngii a secherel a bedengek engdi ngmla mo telkib el beot a blekeradel me a ngelekek a mla mo ungil. A Jehovah el obengkemam a uchul me aki mla suubii el mo diak bo el negative a uldesuam sel ki bom chebangel a ringel. A Jakobus 5:11 a ulterekokl a rengmam el kmo: ‘Tirkel dimlak le mesim e uluutekangel, a dolekoi er tir el kmo te ngeltengat. Kom mla rongesii a chisel a kllourreng er a Job, e mesa uldesuel a Rubak el kirel. A Rubak a kmal bekokuii e chubechubchad.’” A Jehovah kmal mle ungil medengelii a blekeradel el lemla er ngii a Job, e kmal sebechel mo ulterekokl a rengud el kmo ngmedengei a ringel el bo dechebangel.