Berrotel el Tekoi 3

Molemolem Lolecholt a Omereng el Saul

NGERA NGOLISECHAKL A BIBLIA? “E moreng a saul era rokuil tekoi.”​—1 Thesalonika 5:18.

NGERANG A OMELSEMAI? Kid a kiei el iliuekl er a rechad el tir a mekedidai a rengrir e diak loreng a saul el sebechel a omerellir el mo mengesuseu er kid el mo meruul a tekoi el uai tir. (2 Timoteus 3:1, 2) Me a lmuut el tang, e ngsebechel el rullid el mo meruul a betok el tekoi el ngii a sebechel el mo oltitech aike el di mla blekerdelel a klengar er kid. Me tiang a sebechel el mo uchul e kede mo chuarm a betok el mondai me a lechub e kede mo meruul a betok el tekoi, el ngii a di soal a rengud me ngmo diak doba omereng el saul el kirel aike el ngar ngii er kid, me a lechub e doreng a sulir a rebebil el kirel a ungil el omerellir el bedul kid.

NGERA SEBECHED EL MERUUL ER NGII? Mocheuekl a taem el mo sebechem el melatk aike el ungil el tekoi el kau a dmeu a rengum el kirel er a chelechang. Nguaisei, alta e ke dirrek el mo meringel a uldesuem el kirel a betok el mondai er kau, engdi ka molatk er a kerebil a King David. Ngmla er ngii a taem el kmal mlo meringel a uldesuel, e dirrek el kmal mlo oberaod a rengul el kirel a omelsemai el lechilebangel. Engdi ngngar aikaikid el taem e ngmilluluuch el mo er a Dios el kmo: “Ak melatk er a ngar a mong, e omdasu a ikel rokui el bla mruul; e melebedebek a rokui el omerellem.” (Psalm 143:3-5) Me ngngar er a chelsel aike el omelsemai er a klengar er ngii, e a David a uleba omereng el saul el kirel a Dios, e dirrek el dileu a rengul er aike el rokui el mla er ngii er ngii.

Molatk aike el tekoi el lurruul a rebebil el lolengeseu er kau, e dirrek el molecholt er a omereng el saul er kau el kirel a ungil el omerellir. A Jesus a ulechotii a kmal ungil el kerebai el kirel tia el omeruul. El ua tiang, sel taem el Maria a ulleitel er a meringel a cheral el cheluch er a bdelul me a ochil a Jesus, e a rebebil a uleker el kmo: “Ngera uchul me nguaisei el melengerenger ra chilt?” * Tirke el chad el uluukerrekeriil er tia el omeruul a millatk el kmo tia el cheluch a mle sebechel el moterau e te remous a cheral el mo er a remechebuul. Engdi a Jesus a dilu el kmo, “Becherei ngiil dil. Ngera me ko mengebechobel er ngii?” E dirrek el dilu el kmo: “Ngmla remuul a ikel sebechel.” (Markus 14:3-8; Johanes 12:3) Me a Jesus a bai uleba omereng el saul el kirel aike el tekoi el lurruul a Maria e bai dimlak lolatk aike el dimlak loruul.

A rebebil a mo oba omereng el saul el kirir a rechederir me a resechelirir me a lmuut el bebil er a klengeltengat er a uriul er a lemad me a lechub e bo ledibus. E tia el omeruul a sebechel el diak el lebo er ngii a lsekum e kede blechoel el melatk aike el ungil el tekoi el kid a oldeu a rengud er ngii er a chelechang! Ngdirrek el kmal ungil el tekoi a dolemolem el melatk me a lechub e kede lmuches aike el soad el tekoi.

Misei a “bek lungil ngat” a mla er a Dios el mei a uchul, me ngkmal kired el olecholt a omereng el saul el mo er ngii el okiu a nglunguched. (Jakobus 1:17) Me sel doruul el uaisei e ngsebechel el ngosukid el melemolem el oba omereng el saul me a ungil el uldasu, e dirrek el mo dmeu a rengud el kiei el ousbech aike el ngar ngii er kid.​—Filipi 4:6, 7.

[Footnote]

[Siasing el ngar er a 6 el llel]

Kau, ke olecholt a omereng el saul el kirel aike el tekoi el loruul a rebebil el kirem?