A UCHUL ME A REBEBIL A MERINGEL ER TIR EL OUMERANG: A rebetok el chad a omdasu el kmo a Dios a omes er a rechad el ngar er a klengit, el diak le klikiid e diak leredemelel a nguu a kengei er ngii. A Kendra el ngii a chillebangel er a secherel a uldasu, a ulemdasu el kmo ngkmal mekngit el chad e le ngdimlak el sebechel el cherrungel el otirakl a llechul a Dios. Me tiang a mlo uchul e ngmillekoi el kmo, “Ak milterob el meluluuch.”

A OSISECHAKL EL NGAR ER A TEKINGEL A DIOS: A Jehovah a omes el engelakl er aike el chelitechetum e ungil medengelkau. A Biblia a melekoi el kmo: “Ng medengei el kmo kede rruul er a ngerang; ng melatk el kmo kid a di chebechab.” Me a lmuut el tang, e ngdiak lomals er kid er “a ikel kmal kirel a kngtid ma telemelled,” e ngbai oba klechubechub el ousubes er kid sel dobult.​—Psalm 103:10, 14.

Ka molatk er a David el king er a rechad er a Israel el dulsaod er ngii el ngar er a kot el suobel. Sera loluluuch el mo er a Dios, e ngdilu el kmo: “Ke milsekak er uchei er a kmechell. . . . Morriter er ngak kau el Dios, e bo modengelii a renguk.” (Psalm 139:16, 23) Ochoi, a David a uluumerang el kmo alta e a lebebil er a taem e ngmlo er a oberaod el klengit, engdi Jehovah a mle sebechel mesang el kmo ngmla obult er a kngtil.

A Jehovah a kmal ungil el medengelkau el kuk ungil er a klemedengei er a ngii di el chad. A Dios a melekoi el kmo: “A chad omes er a ikrel, e ngdi ngak omes er a rengul a chad.” (1 Samuel 16:7) Me ngkmal ungil el medengei el kmo ke uangera el chad, e le ngmedengei aike el tekoi el kau a mludiukes er ngii, okurulem, beluu el omkiei er ngii, me a blekerdelem. Me ngdmeu a rengul el omes er kau el melasem el melodech a blekerdelem, alta e ke mo remuul a cheleuid el tekoi.

Me a leuaisei, ngmekerang a Dios e ousbech er sel klemedengei er ngii er a mera el blekerdelem el mengelaod er kau?