Da Jesus hott faythfeli leit ksayft vann eah sei layva gevva hott fa en ransom sacrifice. (Matthäus 20:28) So, di Bivvel sawkt da Jesus is “da Heiland funn di veld.” (1 Johannes 4:14) Es sawkt aw: “Es is kenn saylichkeit in ennich ebbahm shunsht, veil kenn anrah nohma unnich em Himmel zu di mensha gevva is es miah saylich vadda kenna dideich.”​—Apostelgeschichte 4:12.

 Da Jesus hott ‘da doht ohgnumma fa alli-ebbah’ es glawbt an een. (Hebräer 2:9; Johannes 3:16) Gott hott da Jesus no ‘uf gvekt funn di dohda,’ un eah is viddah en spirit person vadda un zrikk nuff in da Himmel ganga. (Apostelgeschichte 3:15) Da Jesus voah no able fa “selli ayvichlich saylich macha es zu Gott kumma deich een, veil eah immah laybt” un kann shvetza fa si.​—Hebräer 7:25.

Favass braucha miah da Jesus fa shvetza fa uns?

 Miah doon awl sindicha. (Römer 3:23) Di sind is vi en vand zvishich uns un Gott, un fiaht uns zu da doht. (Römer 6:23) Avvah, da Jesus “shvetzt fa” awl selli es glawva an sei ransom sacrifice. (1 Johannes 2:1) Eah frohkt Gott fa iahra gebaydah heahra un es iahra sinda fagevva vadda koss es da Jesus sei layva gevva hott fa si. (Matthäus 1:21; Römer 8:34) Gott dutt vass da Jesus frohkt difoah koss sell is vass Eah du vill. Gott hott da Jesus zu di eaht kshikt so “es di veld deich een saylich vadda kann.”​—Johannes 3:17.

Missa miah yusht glawva an da Jesus fa ksayft sei?

 Nay. Miah missa glawva an da Jesus fa ksayft vadda, avvah miah missa noch may du. (Apostelgeschichte 16:30, 31) Di Bivvel sawkt: “Fa grawt vi’s leib doht is unni da geisht, so is da glawva doht unni verka.” (Jakobus 2:26) Fa ksayft vadda, muss ma:

•   Lanna veyyich da Jesus un sei Faddah, Jehova.​—Johannes 17:3.

•   Em sei glawva shtaudah macha in si.​—Johannes 12:44; 14:1.

•   Veisa vass fa glawva es ma hott bei du vass si sawwa. (Lukas 6:46; 1 Johannes 2:17) Da Jesus hott ksawt nett alli-ebbah es een “Hah” hayst zayld ksayft vadda avvah “yusht dee vo [sei] Faddah im Himmel sei villa doon.”​—Matthäus 7:21.

•   Ohhalda layva bei em sei glawva even vann ma haddi zeida faysa. Da Jesus hott sell kliah gmacht vann eah ksawt hott: “Alli-ebbah es aushald biss an’s end vatt saylich.”​—Matthäus 24:13.