Alli Fasamling Blatz is vo leit in selli area zammah kumma fa Jehova deena. So fa helfa alles sauvah un ufkfixt halda is en privilege fa uns, un en importand part funn Gott deena. Alli-ebbah kann helfa.

Helf butza noch en fasamling. Noch alli fasamling doon di breedah un shveshtra geahn bissel butza fa macha es es viddah sauvah is. Ay moll di voch vatt’s may gans deich gebutzt. En elder adda en ministerial servant organized di eahvet un yoost en checklist fa shuah macha es alles gedu vatt. Dayl funn di sacha sinn, keahra, mabba, shtawb butza, bathrooms butza, fenshtahra un shpikla vesha, shteel ufshtraytna, trash naus nemma, butzes du uf di autseit, hohf mayya un blumma lendah sauvah macha. Ay moll’s yoah nemma ma en dawk fa alles recht goot butza, inseit un autseit. Bei di kinnah greeya fa uns helfa, lanna si fa respekt havva fa da blatz es ma yoosa fa Jehova deena.​—Breddichah 5:1.

Helf vann ebbes kfixt sei muss. Alli yoah is en inspection gedu funn di inseit un autseit funn da Fasamling Blatz. Sellah vayk halda ma uf mitt’s maintenance es gedu sei muss fa alles in goot shape halda, un sell helft so’s ma nett so feel geld shpenda muss shpaydah. (2 Chronik 24:13; 34:10) En Fasamling Blatz es sauvah un ufkalda is bringd honor zu Jehova. Bei helfa mitt dee eahvet veist es miah leevi henn fa Jehova un es miah unsah Fasamling Blatz apreeshayda. (Psalm 122:1) Dess helft es leit in di area goot denka veyyich uns.​—2 Korinther 6:3.

• Favass sedda miah goot acht gevva uf unsah Fasamling Blatz?

• Vi doon miah unsah Fasamling Blatz sauvah halda?