Du best vereist, die jeit daut scheen un du west diene Frind daut weeten loten. Oba woo?

1.   Schrifst du dee eenen Breef?

2.   Schekjst du dee aula een E-Mail?

3.   Deist du diene Bilda em Internet nenn?

 Aus diene Groosmame un diene Groospape soo oolt wieren aus du, kunnen dee secha bloos Breew schriewen.

 Aus diene Elren soo oolt wieren aus du, jeef daut veleicht aul E-Mail.

 Vondoag dän Dach jleichen Jugentliche dolla, Bilda em Internet nentodoonen, wan de Elren äant de Frieheit doatoo jäwen. Jleichst du daut uk? Wan jo, dan woat die dis Artikjel halpen, eenje Jefoaren utem Stich to gonen.

•  Waut haft daut fa goodet?

•  Waut sent de Jefoaren?

•  Fa waut saul eena oppaussen?

•  Waut aundre Jugentliche sajen

 Daut jeit bosich. Melanie sajcht: “Wan ekj wua hanfoa ooda ne scheene Tiet met miene Frind toop hab, dan kaun ekj aundre fuaz oppe Städ miene Bilda wiesen un woo scheen mie daut jeit.”

 Daut’s hendich. Jordan sajcht: “Wan ekj weeten well, woo miene Frind daut jeit, dan es daut väl eefacha, de Bilda notoseenen, waut dee em Internet nenmoaken, aus dee een E-Mail to schriewen.”

 Daut halpt, Frind to bliewen. Karen sajcht: “Eenje von miene Frind un Frintschoft wonen wiet auf. Oba wan dee foaken Bilda em Internet nendoonen un ekj dee nosee, späat sikj mie daut soo, aus wan ekj dee aule Dach wudd seenen!”

 Diene Sechaheit kaun en Jefoa sennen. Wan daut bie dienen Kembre soo enjestalt es, daut opp diene Bilda jewäsen woat, wua dee aufjenomen sent (Geotagging), dan kjennen aundre derch diene Bilda veleicht waut enwoaren, waut du nich wurscht wellen. Woo schauft daut? De Websied Digital Trends sajcht: “Wan eena Bilda ooda aundret oppem Internet stalt, wua jewäsen woat, wua dee sent jemoakt worden, dan kaun irjenteen onopprechtja Mensch met een paussendet Program rutfinjen, wua eena jroz es”.

 Kloa, eenje onopprechtje Menschen intressieet daut dolla, wua du jroz nich best. No eenen Berecht von Digital Trends no kunnen dree Stäla eemol en 18 Hiesa stälen, wiels doa kjeena tus wia. Woo wisten dee daut, daut doa kjeena tus wia? Dee forschten äwa Internet un fungen rut, wua aul dise Menschen jroz wieren. Soo kunnen dee sikj Sachen stälen, waut äwa 100000 stätsche Dola em Wieet wieren.

 Du kaust doa Sachen seenen, waut sikj nich jehieren. Eenje schämen sikj nuscht un doonen aule Sorten Bilda em Internet nenn, daut aulemaun dee seenen kaun. Eene Mejal, waut Sarah heet, sajcht: “Daut es jefäadlich, wan eena sikj Bilda besitt von wäm, waut eena nich kjant. Daut’s een bät soo, aus wan eena sikj onen Launtkoat en eene framde Staut romjeit. Eena kaun dan sea leicht no eene Städ komen, wua eena goanich han wull.”

 Du kaust väl Tiet vekwosen. Eene Mejal, waut Yolanda heet, sajcht: “Eena kaun doa sea leicht faust aun woaren, daut eena sikj emma aulet Nies nositt un daut läst, waut aundre doa bieschriewen. Daut kaun bat doa komen, daut eena jieda Minut opp sien Fon kjikjt, bloos toom noseenen, aus doa waut nieet nenjekomen es.”

 Doa stemt uk Samantha met en. See sajcht: “Ekj mott sea no de Tiet oppaussen, wan ekj mie em Internet aundre äare Bilda besee. Eena mott sikj opp iernst beharschen kjennen, wan eena sikj daut enrecht, daut eena kaun Bilda em Internet nendoonen.”

•   Nemm die daut faust väa, schlajchtet utem Stich to gonen. De Schreft sajcht: “Ekj woa kjeen Beeset fer miene Uage stale” (Psalm 101:3, Reimerbibel).

   Steven sajcht: “Ekj besee mie ieremol dee äare Sieden, wua ekj äwa Internet Frint met sie. Un wan mie doa waut orrajcht sitt, dan lasch ekj dee ut miene List rut.”

•   Jeff die doa nich met soone auf, waut nich soo enjestalt sent aus du, wiels dee kjennen die to waut schlajchtet veuasoaken. De Schreft sajcht: “Lot junt nich aunschmäaren. Schlajchte Jesalschoft vedoaft goode Aunjewanheiten” (1. Korinta 15:33, De Plautdietsche Bibel).

   Jessica sajcht: “Besee die nich Bilda, bloos wiels aundre dee bie dise Tiet besonda jleichen. Opp dee Bilda kjricht eena foaken waut schwienschet ooda dommet to seenen.”

•   Nemm die väa, woo lang du em Internet sennen west un woo foaken du doa Bilda nenmoaken west. De Schreft sajcht: “Siet väasechtich, daut jie derch dit Läwen gonen aus kluake Menschen un nich aus soone, dee nich weeten, waut to de Sach jehieet. Un nuzt de Tiet ut” (Efeesa 5:15-16, De Plautdietsche Bibel).

   Rebekah sajcht: “Met eenje sie ekj nich mea Frint äwa Internet, wiels dee doa emma too väl Bilda nendoonen. Wan dee biejlikj biem Mäa sent, stalen dee doa 20 Bilda von deeselwje Schnigj em Internet nenn. Mott daut? Daut dieet eefach too lang, sikj dee aula to beseenen!”

•   Kjikj doano, daut de Bilda, waut du oppem Internet stalst, nich auntovestonen jäwen, daut sikj aules bloos om die dreit. De Bibelschriewa Paulus sajcht: “Ekj [saj] junt, een jieda eenem, denkjt von junt nich mea aus jie werkjlich sent” (Reema 12:3, De Plautdietsche Bibel). Denkj nich, daut diene Frind emma voll doavon sent, Bilda von die to seenen un waut du soo deist.

   Allison sajcht: “Väl Menschen doonen dän Tiet äwa Bilda von sikj selfst em Internet nenn. Oba wan je wie Frind sent, dan weet ekj doch, woo die lat – doascht mie goanich dän Tiet äwa denkjen halpen!”