ENNE Post, äwa Tellewizhen ooda äwa Rädio kjricht eena sea foaken von Kjrich un aule Sorten beeset to hieren. Veleicht hast du nu jroz uk selfst väl Sorjen em Läwen, biejlikj Trubbel met de Jesuntheit, ooda doa es wäa jestorwen, dän du väl jeräakjent hast. Soont kaun eenem sea toosaten un eena feelt sikj veleicht uk soo aus de gottesferchtja Hiob, dee doa säd, daut hee met “Älent äwaschwommen” wia (Hiob 10:15).

Waut denkjst du:

• Haft Gott daut aules soo aus dit wult?

• Waut kaun ons halpen, met aul daut schwoare foadich to woaren?

• Woat daut oppe Ieed noch mol Fräd jäwen?

Opp dise Froagen kjenn wie en de Schreft de Auntwuaten finjen.

“Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen” (Openboarunk 21:4)

“Dee, dee lom sent, woaren aus een Ree sprinjen” (Jesaja 35:6)

“Dee, dee blint sent, woaren dan met äare Uagen seenen kjennen” (Jesaja 35:5)

 “Aul dee, dee en de Jräwa ligjen, . . . woaren dan verendach komen” (Johanes 5:28-29)

“Kjeena von june Menschen woat sajen: ‘Ekj sie nich jesunt’” (Jesaja 33:24)

“Jie [woaren] goot to äten haben . . ., von daut waut jun Aka junt drajcht” (Jesaja 30:23)

Daut, waut oppe väaje Sieden steit, woat werkjlich en Erfellunk gonen. Doa bruck wie nich aun twiewlen. Gott haft daut vesproaken, un de Schreft sajcht uk, woo hee daut doonen woat.

En de Schreft finj wie oba uk Rot, woo wie nu aul kjennen een tofrädnet Läwen haben. Väle haben daut schwoa, wiels dee daut biejlikj knaup jeit ooda Trubbels enne Famielje haben ooda nich jesunt sent ooda doa wäa jestorwen es. De Schreft kaun ons halpen, met aul soont foadich to woaren. Dee jeft ons uk de Auntwuaten opp soone Froagen aus dit:

• Wuarom motten doa soo väl Menschen lieden?

• Woo kjenn wie met onse Sorjen foadich woaren?

• Woo kaun eenem daut aus Famielje scheen gonen?

• Waut woat met ons, wan wie stoawen?

• Woa wie dee, waut jestorwen sent, noch mol wada seenen?

• Woo kjenn wie ons secha sennen, daut Gott daut hoolen woat, waut hee vesproaken haft?

 Secha west du uk weeten, waut de Schreft lieet, sest wurscht je du dit Buak nich läsen. Dit Buak es eene Help, om mea ut de Schreft to lieren. Opp jieda Sied sent unjen Froagen jeschräwen. De Auntwuaten doatoo kaun eena en de Varzh finjen. Opp dise Wajch haben aul millionende Menschen met Jehova siene Zeijen de Schreft studieet. Veleicht wurscht du daut uk jleichen. Daut es sea intressaunt, wan eena kjanen lieet, waut de Schreft werkjlich lieet. Un wie wenschen die doabie Gott sienen Säajen un väl Freid.