DE MENSCHEN

Waut de Schreft sajcht: Gott haft “de Ieed nich ladich jeloten . . . oba soo daut dee beläft es”. JESAJA 45:18

DE IEEDBAUL

Waut de Schreft sajcht: “De Tieden vegonen un de Tieden komen, oba de Ieed blift emma stonen.” LIERA 1:4

WAUT DAUT BEDIET: No de Bibel no woat de Ieedbaul nienich vestieet woaren un woat fa emma bewont bliewen. Waut bediet daut Enj von de Welt dan?

DENKJ MOL NO: De Bibel vejlikjt daut Enj von dise Welt met daut, waut to Noah siene Tiet passieed. En dän siene Tiet wia de Ieed “voll von äa onbandjet Läwen” (1. Mose 6:13). Noah oba wia jerajcht, doawäajen deed Gott am un siene Famielje raden, oba de äwaje schlajchte Menschen derch eene Äwaschwamunk venichten. Krakjt doavon rät daut en 2. Petrus 3:5. Un daut sajcht doa, daut “Gott de Welt, dee hee derch sien Krauftwuat jemoakt haud, aul eemol derch Wota venicht haft.” Daut wia daut Enj von eene Welt. Oba waut krakjt wort venicht? Nich de Ieedbaul oba de schlajchte Menschen oppe Ieed. Wan de Bibel aulsoo von een Enj von de Welt rät, dan meent dee nich onsen Ieedbaul. Dee meent väl mea daut Enj von de schlajchte Menschen oppe Ieed un aul daut, waut de Menschen hia oppe Ieed oppjestalt haben.

TRUBBELS UN SCHLAJCHTET

Waut de Schreft sajcht: “Daut woat nich mea lang dieren, dan woaren de gottloose nich mea sennen, un wan du no äaren Plauz sieekjen woascht, woascht du an nich finjen. Oba de deemootje woaren daut Launt oawen, un sikj to de groote Fräd freien.” PSALM 37:10-11

WAUT DAUT BEDIET: De Äwaschwamunk en Noah siene Tiet deed daut schlajchte nich eent un fa aulemol utroden. No de Äwaschwamunk muaken de schlajchte Menschen fa aule aundre daut Läwen wada sea schwoa. Oba Gott woat boolt met aulet schlajchte een Enj moaken. Soo aus wie daut en dän Psalm jeläst haben, “woaren de gottloose nich mea sennen.” Gott brukt sien Kjennichrikj toom met aul daut schlajchte een Enj moaken. Daut es eene Rejierunk em Himmel, waut äwa jerajchte Menschen oppe Ieed rejieren woat.

DENKJ MOL NO: Woaren deejanje, waut nu de Welt rejieren, Gott sien Kjennichrikj wellich unjastetten? De Bibel sajcht, dee woaren nich. Dee woaren soo onkluak sennen un sikj jäajen Gott sien Rikj stalen (Psalm 2:2). Woo woat daut utkomen? Gott sien Kjennichrikj woat aule menschelje Rejierungen äwatsied schaufen un “woat selfst opp emma bliewen” (Daniel 2:44). Oba wuarom mott daut opphieren, daut Menschen äwa de Ieed rejieren?

Waut de Schreft sajcht: “De Mensch wält sikj nich sienen Wajch, un hee kaun nich bestemmen, woo daut Läwen utkjemt.” JEREMIA 10:23

WAUT DAUT BEDIET: Menschen sent nich soo jemoakt worden, daut dee sikj selfst rejieren, un doawäajen kjemt daut uk soo schlajcht ut, wan see daut proowen to doonen ooda aundre äare Trubbels to leesen.

DENKJ MOL NO: En daut Buak Britannica Academic steit, daut nich mol eenselne Rejierungen emstaunt sent, “met de Schwierichkjeiten von de Welt foadich to woaren, soo aus Oamoot, Hunga, Krankheiten, Owwadasch un Kjrich ooda aundre Sorten Jewault.” Daut sajcht doa wieda: “Eenje . . . jleewen, wan doa wudd bloos eene Rejierunk oppe gaunze Welt sennen, dan wudd dee aule Trubbels oppe Welt leesen kjennen.” Uk wan de menschelje Rejierungen sikj aula wudden eenich woaren, wudd de Welt doawäajen noch von onvolkomne Menschen rejieet woaren, waut nich emstaunt sent met de Schwierichkjeiten foadich to woaren, wua wie von räden. De eensje Rejierunk, waut de Macht haft aule Trubbels oppe Welt fa emma to leesen, es Gott sien Kjennichrikj.

No de Schreft no es daut Enj von de Welt – onse vondoagsche schlajchte Welt – nich waut, wua goode Menschen sikj fa grulen sellen. Daut es mau rajcht eene goode Norecht, wiels dise oole vebrukte Welt woat met Gott siene wundascheene niee Welt vetuscht!

Wanea woat daut sennen? De näakjsta Artikjel woat daut von ut de Bibel beauntwuaten.