Jesus lieed de Menschen, unjarenaunda Fräd to haben. Oba opp eene Sauz säd hee to siene Apostel: “Jleeft nich daut ekj jekomen sie, Fräd en dise Welt to brinjen. Ekj sie nich jekomen Fräd to brinjen, oba daut Schwieet. Ekj sie jekomen een Maun jäajen sienen Voda to saten un de Dochta jäajen äare Mutta, un de Schwieedochta jäajen äare Schwieemutta” (Mat. 10:34-35). Waut meend Jesus doamet?

Jesus wull nich, daut eene Famielje sikj nich eenich wia, oba hee wist, daut siene Lieren eenje Famieljes uteneenbrinjen wudd. Doawäajen mott soona, waut Jesus nofoljen un sikj deepen loten well, doamet räakjnen, daut de Famielje veleicht nich woat schaftich sennen doaräwa. Wan dee Jäajenstaunt kjricht von soone en de Famielje, waut Jehova nich deenen, dan kaun daut schwoa sennen fa dän, sikj aun Jesus siene Lieren to hoolen.

De Bibel rot ons too, “met aule Menschen Fräd to haben” (Reem. 12:18). Oba Jesus siene Lieren kjennen en eenje Famieljes soo sennen aus een “Schwieet”. Daut passieet eenjemol, wan eena en de Famielje Jesus siene Lieren aunnemt un de aundre doajäajen sent. Wan daut passieet, dan moakt de Famielje sikj selfst to “Fiend” met dänjanjen, waut de Woarheit kjanen lieet (Mat. 10:36).

Jesus siene Nofolja, waut met soone toop en een Hus wonen, waut eenen aundren Gloowen haben, motten entscheiden, wäm see jefaulen wellen – Jehova un Jesus ooda de Famielje. Veleicht well soon Frintschoft, waut Jehova nich deent, dee bemotten, bie eenen Heljedach mettomoaken. Waut woaren dee dan doonen? Jesus säd: “Wäa Voda ooda Mutta mea räakjent aus mie, … es daut nich wieet eena von de mienje to sennen” (Mat. 10:37). Secha wull Jesus doamet nich sajen, daut dee äare Elren nu weinja leewen sullen aus ea. Oba waut hee lieed, wia, daut dee entscheiden musten, waut daut wichtichste en äa Läwen wia. Wan de Famielje doajäajen es, daut wie Jehova deenen, dan woa wie dee doawäajen wieda leewen, oba onse Leew fa Jehova woat daut jratste sennen.

De Jäajenstaunt von de Famielje moakt ons sea truarich. Oba Jesus siene Nofolja motten doawäajen siene Wieed em Denkj hoolen, aus hee säd: “Wäa nich sien Kjriez opp sikj nemt un folcht mie no, dee es daut nich wieet eena von de mienje to sennen” (Mat. 10:38). Daut bediet, daut wie aus Christen daut aunnämen, daut de Famielje woat jäajen ons sennen, wiels daut es Poat von daut Lieden, waut een Christ opp sikj nemt. Oba wie hopen doawäajen, daut de Famielje derch ons goodet Benämen eenen Dach no de biblische Woarheit horchen woat (1. Pet. 3:1-2).