Vondoag dän Dach kaun eena aulawäajen schwiensche Bilda bejäajnen. a Biejlikj en Tietschreften, Films, Bieekja un Tellewizhen, en Video-Gäms, äwa Fon, äwa Internet un mau rajcht uk en Spell es von schwienschet to hieren. Schwiensche Bilda to kjikjen, es vondoag dän Dach enne Welt gaunz jeweenlich jeworden. De Menschen doonen daut dolla aus jeemols ea. (See dän Kausten “ Woo oajch daut es met schwiensche Bilda kjikjen”.)

Waut bie schwiensche Bilda jewäsen woat, haft sikj uk jeendat. De Professa Gail Dines schrift: “Daut, waut opp de Bilda vondoag dän Dach jewäsen woat, es sea oajch jeworden. Soont, waut ea fa sea groff jetalt wort, talt nu aus waut gaunz jeweeneljet.”

Waut denkjst du doaräwa? Baudat daut nuscht, schwiensche Bilda to kjikjen ooda es daut jefäadlich? Jesus säd: “Een gooda Boom [drajcht] goode Frucht un een schlajchta Boom schlajchte Frucht” (Matäus 7:17, PB). Waut vonne Frucht woat daut jäwen, wan eena schwiensche Bilda kjikjt? Well wie ons doatoo mol eenjet unjastonen äwa schwiensche Bilda kjikjen.

WAUT JELIEEDE SAJEN: Eena kaun leicht aufhenjich woaren, von schwiensche Bilda kjikjen. Eenje Jelieede sajen, daut es sea soo aus Droggs brucken.

Brian, b waut aufhenjich wia von schwiensche Bilda äwa Internet kjikjen, sajcht: “Nuscht wudd mie doavon aufhoolen. Mie späad sikj daut soo, aus wan ekj beteibt wia. Ekj feeld mie werkjlich krank, wiels ekj mie soo schuldich feeld. Ekj proowd, doavon loostokomen, oba Joaren lota wia ekj noch emma aufhenjich doavon.”

Menschen, waut schwiensche Bilda kjikjen, doonen daut foaken em plietschen. Doawäajen es daut kjeen Wunda, daut väle sikj auleen feelen, sikj schämen, Angst haben, Narfentrubbel kjrieen ooda sea wuttich sent. Eenje fangen mau rajcht aun doaräwa notodenkjen, sikj daut Läwen to nämen. Serge, waut meist jieda Dach schwiensche Bilda en sien Fon raufloden deed, sajcht: “Ekj docht bloos noch aun mie selfst un wia sea orruich”. Un hee sajcht uk: “Ekj feeld mie nuscht wieet, schuldich, auleen un aus wan ekj doa nich von loos kunn. Ekj schämd mie väl to sea un haud Angst, no Help to sieekjen.”

Wan eena uk mau fa een Stootje schwiensche Bilda kjikjt, kaun eenem daut aul väl Schoden aundoonen. Dokta Judith Reisman haft daut studieet, waut schwiensche Bilda kjikjen aun de Menschen deit. See sajcht, daut soone Bilda sikj soo sea em Vestaunt fausthoolen, daut daut sea schwoa es, dee to vejäten. Susan, waut 19 Joa es un mol schwiensche Bilda sach em Internet, sajcht: “De Bilda sent en mien Vestaunt soo nenjebrent. Eenjemol komen dee haustich opp. Daut späat sikj soo, daut ekj dee niemols woa gaunz vejäten kjennen.”

WAUT ONS DIT WIEST: Schwiensche Bilda kjikjen veskloft dee, waut daut doonen un schot dee (2. Petrus 2:19).

WAUT JELIEEDE SAJEN: “Wäajen schwiensche Bilda kjikjen, gonen Ehepoaren uteneen un Famieljes vebräakjen” (The Porn Trap von Wendy un Larry Maltz).

Schwiensche Bilda kjikjen schot dän Ehestaunt un de Famielje:

• De Ehepoatna vetruen sikj nich mea, feelen sikj nich mea no aun un daut schot uk dee äare Leew (Spricha 2:12-17).

• Wäa schwiensche Bilda kjikjt, denkjt bloos noch aun sikj selfst, woat endoontich, es nich frintlich un woat ontofräd met sienen Ehepoatna (Efeesa 5:28-29).

• Schwiensche Bilda kjikjen kaun orrajchte Lost un schlajchte Jedanken un Wenschen oaja moaken (2. Petrus 2:14).

• Soone, waut schwiensche Bilda kjikjen, woaren veleicht äaren Ehepoatna proowen to bemotten, opp soone Wajch Sex to haben, waut sikj nich jehieet (Efeesa 5:3-4).

• Schwiensche Bilda kjikjen kaun doatoo fieren, daut eena sienen Ehepoatna ontru woat, entwäda en siene Jedanken ooda opp iernst (Matäus 5:28).

De Schreft sajcht, daut de Ehepoatna sellen “nich hinjarigjsch” sennen unjarenaunda (Maleachi 2:16, PB). Ehebruch kaun de Ehe soo väl toosaten, daut dee uteneen gonen ooda sikj scheeden loten. Un daut woat dan uk dee äare Kjinja sea schoden.

Schwiensche Bilda kjikjen kaun Kjinja uk noch aundasch schoden. Brian, von dän wie aul ea räden, sajcht: “Aus ekj rom tieen Joa wia, funk ekj biem Plinza spälen Bieekja von mienen Voda, met schwiensche Bilda doabennen. Ekj funk aun, mie dee plietsch to beseenen, mau rajcht wan ekj uk nich werkjlich vestunt, wuarom mie daut intressieed. Un daut wort bie mie eene schlajchte Jewanheit, waut noch aunhilt bat ekj ieescht lang groot wia.” Forscha haben utjefungen, waut schwiensche Bilda kjikjen aun junge Menschen deit: Daut kaun doatoo fieren, daut dee von sea junk aunfangen, Sex to haben un daut dee met väl veschiedne Poatna Sex haben un daut dee uk hunjsch sent biem Sex haben. Schwiensche Bilda kjikjen, kaun dee uk em Vestaunt un aun äare Jefeelen baudren.

WAUT ONS DIT WIEST: Schwiensche Bilda kjikjen es soo aus Jeft fa eene leeftolje Famielje un daut woat bloos väl Schoden un Lieden veuasoaken (Spricha 6:27).

GOTT SIEN WUAT SAJCHT: “Doawäajen moakt aules en junt doot waut von june sintliche Natua kjemt, de Huararie, Orreinichkjeit, sintelje Liedenschoften, beese Lost un Jiez. Jiez es krakjt soo aus Jetta deenen” (Kolossa 3:5, PB).

Eefach jesajcht: Jehova c Gott haust daut, wan wäa schwiensche Bilda kjikjt. Daut es nich, daut hee waut jäajen Sex haft. Hee haft ons soo jemoakt un hee wull, daut de Ehepoatna sikj soo kjennen äare Leew wiesen, sikj no aun feelen un de Freid haben, Kjinja to haben (Jakobus 1:17).

Woo weet wie daut dan, daut Jehova daut soo jäajenaun es, wan wäa schwiensche Bilda kjikjt? Well wie mol een poa Jrind doatoo seenen.

• Hee weet daut, daut schwiensche Bilda kjikjen eenem kaun enne Grunt brinjen (Efeesa 4:17-19).

• Hee leeft ons un well ons fa Schoden beschitzen (Jesaja 48:17-18).

• Jehova well de Famieljes un dän Ehestaunt beschitzen (Matäus 19:4-6).

• Hee well haben, daut wie een reinet Läwen sellen fieren un aundre äa Rajcht sellen achten (1. Tessalonicha 4:3; 4:4-5, NW; 4:6).

• Hee well haben, daut Sex saul rein un natieedlich sennen (Hebräa 13:4).

• Jehova weet daut, daut schwiensche Bilda kjikjen jäajen de Natua es un daut wäa soont deit, bloos aun sikj selfst denkjt un wiest, daut dee soo äwa Sex denkjt aus de Soton (1. Mose 6:2; Judas 6-7).

WAUT ONS DIT WIEST: Schwiensche Bilda kjikjen brinjt eenem von Gott wiet auf (Reema 1:24).

Jehova well dee werkjlich halpen, waut proowen, opptohieren met schwiensche Bilda kjikjen. De Schreft sajcht: “De HAR es voll Jnod un Metleet, jeduldich un truhoatich leeftolich. Hee weet von waut wie jemoakt sent; hee denkjt doaraun, daut wie bloos Stoff sent” (Psalm 103:8, 14, PB). Hee sajcht to de Deemootje, daut dee no am komen sellen un daut dee woaren “Metleet kjrieen un Jnod finjen to de rajchte Tiet” (Hebräa 4:16, PB; see dän Kausten “ Woo eena von schwiensche Bilda kjikjen looskomen kaun”).

Väl Menschen haben aul Gott siene Help aunjenomen. Woo es daut utjekomen? See mol, waut de Schreft äwa soone sajcht, waut haben kunt met schlajchte Jewanheiten opphieren: “Oba nu sent jie rein jewoschen, jie sent jeheilicht, jie sent jerajcht jeworden derch dän Nomen von onsem Harn Jesus Christus un derch dän Jeist von onsem Gott” (1. Korinta 6:11, PB). Krakjt soo aus de Apostel Paulus, sajen deejanje uk: “Ekj kaun aules derch däm, dee mie stoakj moakt” (Filippa 4:13, JHF).

Susan, waut doavon looskjeem, schwiensche Bilda to kjikjen, sajcht: “Jehova es de eensja, waut eenem halpen kaun, doavon loostokomen. Wan du am no Help un Rot frajchst, woascht du daut kjennen soo wiet brinjen, daut du ver am rein stonen kaust. Hee woat die kjeenmol em Stäakj loten.”