Jieda Joa jeft daut dusende Ieedbäbens. Wan de mieeschte uk mau kjlien sent, jeft daut oba groote Ieedbäbens, waut een deel Schoden, Lieden un Doot aunrechten. Eenjemol jeft daut derch soone groote Ieedbäbens uk Tsunamis (Ieedbäbens em Mäa, waut derch groote Walen Äwaschwamungen veuasoakt).Dee brinjen dan een deel Schoden no soone Städen, waut dicht bie daut Mäa sent. Derch dise Äwaschwamungen komen väle todood, waut doa dicht bie wonen. Waut sajcht de Schreft äwa groote Ieedbäbens verut?

Waut wie en disen Artikjel seenen woaren

•  Rät de Schreft em verut äwa Ieedbäbens?

•  Erfelt de Profezeiunk äwa Ieedbäbens sikj vondoag?

•  Waut bediet dise biblische Profezeiunk äwa Ieedbäbens fa ons?

•  Waut eenje jleewen äwa biblische Profezeiungen un Ieedbäbens

 Jesus rät en eene Profezeiunk äwa Ieedbäbens. Hia kjenn wie läsen, waut dee sajcht:

 “Wiels een Volkj woat jäajen daut aundre oppstonen, un een Kjennichrikj jäajen daut aundre. Un doa woaren opp veschiedne Städen Pestilenz, Hungaschnoot un Ieedbäben sennen” (Matäus 24:7, PB, von ons dunkel jemoakt).

 “Een Volkj woat jäajen daut aundre oppstonen un een Kjennichrikj jäajen daut aundre. Doa woat opp veschiedne Städen Ieedbäben sennen. Doa woat Hungaschnoot . . . sennen” (Markus 13:8, PB, von ons dunkel jemoakt).

 “Un doa woat opp veschiedne Städen grootet Ieedbäben un Hungaschnoot un Pestilenz sennen” (Lukas 21:11, PB, von ons dunkel jemoakt).

 Jesus säd verut, daut et “grootet Ieedbäben” jäwen wudd “opp veschiedne Städen”. To deeselwje Tiet wudden doa uk Kjrich, Hungaschnoot un Pestilenz sennen. Wan aul dit en deeselwje Tiet passieet, bewiest daut kloa, daut “dise Tiet aufschluten woat” ooda daut wie en “de latste Doag” läwen (Matäus 24:3, PB; 2. Timotäus 3:1, PB). Wan wie daut en de Schreft unjasieekjen, kjenn wie seenen, daut “de latste Doag” aune 1914 aunjefongen haben un daut dee noch nich to Enj sent.

 Jo. Jesus siene Profezeiunk un daut, waut hee äwa Ieedbäbens säd, stemt krakjt met daut, waut wie vondoag seenen. Von daut Joa 1914 aun sent doa mea aus 1 950 groote Ieedbäbens jewast, un doaderch sent aul mea aus twee Millionen Menschen a todood jekomen. See wie mol waut Biespels.

 2004 em Indischen Mäa. Een Ieedbäben, waut 9.1 stoakj wia, veuasoakt em Mäa eenen Tsunami en väl Lenda, wua 225 000 Menschen todood kjeemen.

 2008 en China. Een Ieedbäben, waut 7.9 stoakj wia, venicht Darpa un Städa. Ojjefäa 90 000 Menschen kjeemen todood, rom 375 000 worden velatst un millionende hauden äare Hiesa veloaren.

 2010 en Haiti. Een Ieedbäben, waut 7.0 stoakj wia, recht noch een poa miere kjlandre Ieedbäbens aun, wuaderch mea aus 300 000 Menschen todood kjeemen un äwa eene Million hauden äare Hiesa veloaren.

 2011 en Jaupaun. Een Ieedbäben, waut 9.0 stoakj wia, brocht Tsunamis, wuaderch rom 18 500 Menschen todood kjeemen un dusende von äa Tus veloten musten. De groote Fia-Plent en de Staut Fukushima haud Schoden jekjräajen un daut jeef een grootet Ojjlekj. Daut jeftje Mell, waut doa rutkjeem, deed met de Tiet aules doarom vejeften. Tieen Joa lota kunnen rom 40 000 Menschen noch nich trigj no äare Hiesa trakjen doa dicht bie de groote Fia-Plent, wäajen daut doa noch emma soo sea vejeft wia.

 De biblische Profezeiunk woarnt ons fa Ieedbäbens un fa daut, waut boolt passieren woat. Jesus säd: “Wan jie dit aula passieren seenen, räakjent doamet, daut daut Gottesrikj dicht bie es” (Lukas 21:31, PB).

 De Schreft erkjläat, daut Gott sien Kjennichrikj eene Rejierunk em Himmel es, wua Jesus Christus de Kjennich es. Jesus lieed siene Nofolja, daut dee sullen om dit Kjennichrikj bäden (Matäus 6:10).

 Wan Gott sien Kjennichrikj woat äwa de Ieed rejieren, woat Gott daut nich tooloten, daut de Menschen woaren Schoden kjrieen von Owwada ooda Ieedbäbens (Jesaja 32:18). Hee woat uk dän Schoden fiksen, waut Menschen wäajen Ieedbäbens jekjräajen haben, aus kjarpalich ooda aun de Jefeelen (Jesaja 65:17; Openboarunk 21:3-4) Toom mea nosieekjen, läs dän Artikjel “Waut woat Gott sien Kjennichrikj aules doonen?”