یسوع مسیح دی قربانی دے ذریعے خدا انساناں نُوں موت تے گناہ دی غلامی توں آزاد کردا اے۔ پاک کلام چ دَسیا گیا اے کہ یسوع مسیح نے فدیے دی قیمت اپنا خون بہا کے ادا کیتی۔ (‏افسیوں 1:‏7؛‏ 1-‏پطرس 1:‏18، 19‏)‏ ایسے لئی یسوع مسیح نے کہیا کہ اوہ ایس لئی آیا تاکہ بوہت سارے لوکاں لئی اپنی جان فدیہ دے طور تے دَوے۔—‏متی 20:‏28‏۔‏

فدیے دی ضرورت کیوں سی‏؟‏

 پہلے انسان آدم نُوں خدا نے بے عیب بنایا سی یعنی اوہ گناہ توں پاک سی۔ اوہ ہمیشاں تک زندہ رہ سکدا سی پر اوہنے خدا دی نافرمانی کیتی جدی وجہ توں اوہنے ایہہ موقع گنوا دِتا۔ (‏پیدایش3:‏17-‏19)‏ آدم گُناہ‌گار بن گیا جدی وجہ توں اوہدی اولاد نُوں وی ایہہ گناہ ورثے چ ملیاِ۔ (‏رومیوں 5:‏12‏)‏ ایسے لئی پاک کلام چ کہیا گیا اے کہ آدم نے اپنے آپ نُوں تے اپنی اولاد نُوں گناہ تے موت دا غلام بنن لئی ویچ دِتا۔ (‏رومیوں 7:‏14‏)‏ گُناہ‌گار ہون دی وجہ توں کوئی وی انسان اپنے آپ اوہ سب کجھ حاصل نئیں کر سکدا سی جیہڑا آدم نے گنوا دِتا سی۔—‏زبور 49:‏7، 8‏۔‏

 خدا نُوں آدم دی اولاد تے بڑا ترس آیا۔ (‏ یوحنا 3:‏16‏)‏ پر خدا انصاف پسند اے ایس لئی اوہ انساناں دے گناہواں نُوں بِلاوجہ نظرانداز نئیں کر سکدا سی۔ (‏زبور 89:‏14؛‏ رومیوں 3:‏23-‏26‏)‏ خدا انساناں نُوں بوہت پیار کردا اے ایسے لئی اوہنے اپنے انصاف دے معیاراں دے مطابق اوہناں لئی اِک ایہو جیہا بندوبست کیتا جدی وجہ توں انساناں دے گناہ نہ صرف معاف ہو جان سگوں مِٹ جان۔ (‏رومیوں 5:‏6-‏8‏)‏ اوہ بندوبست فدیہ اے۔‏

فدیہ کیہہ کردا اے؟‏

 پاک کلام دے مطابق:‏

1.   فدیہ اِک قیمت اے۔—‏گنتی 3:‏46، 47‏۔‏

2.   فدیے دے ذریعے رہائی یاں آزادی مِلدی اے۔—‏احبار 21:‏30۔‏

3.   فدیہ اوہ برابر دی قیمت اے جیہڑی کسے نقصان نُوں بھرن لئی ادا کیتی جاندی اے۔‏ a

 آو ویکھئے ایہہ تِن گلاں اوس فدیے تے کیویں لاگو ہوندیاں نیں جیہڑا یسوع مسیح نے دِتا۔‏

1.   قیمت۔‏ پاک کلام چ دَسیا گیا اے کہ مسیحیاں نُوں قیمت ادا کر کے خریدیا گیا اے۔ (‏1-‏کُرنتھیوں 6:‏20؛‏ 7:‏23‏)‏ ایہہ قیمت یسوع مسیح دا خون اے جدے ذریعے اوہنے ہر قبیلے، زبان، نسل تے قوم وچوں لوکاں نُوں خرید لیا اے۔—‏مکاشفہ 5:‏8، 9‏۔‏

2.   رہائی‏۔ یسوع دے فدیے توں انساناں نُوں رہائی یعنی گناہواں دی معافی مِلدی اے۔—‏1-‏کُرنتھیوں 1:‏30؛‏ کلسیوں 1:‏14؛‏ عبرانیوں 9:‏15‏۔‏

3.   برابر دی قیمت‏۔ یسوع مسیح دی جان آدم دی بے عیب جان دے برابر سی جنہوں آدم نے گنوا دِتا۔ (‏1-‏کُرنتھیوں 15:‏21، 22،‏ 45، 46‏)‏ پاک کلام چ لکھیا اے کہ جیس طرحاں اِک آدمی یعنی آدم دی نافرمانی دی وجہ توں بوہت سارے لوک گُناہ‌گار بن گئے اوسے طرحاں اِک آدمی یعنی یسوع مسیح دی فرمابنرداری دی وجہ توں بوہت سارے لوک نیک ٹھہرائے جان گے۔ (‏رومیوں 5:‏19‏)‏ ایہدے توں واضح ہو جاندا اے کہ اِک انسان دی موت دی وجہ توں سارے گُناہ‌گار انساناں لئی فدیہ کیویں دِتا جا سکدا اے۔ دراصل یسوع مسیح دی قربانی نے اوہناں سارے لوکاں دی رہائی لئی فدیہ ادا کیتا جیہڑے ایہدے توں فائدہ حاصل کرن لئی ضروری قدم چُکدے نیں۔—‏1-‏تیمُتھیُس 2:‏5، 6‏۔‏