Wiewia 20:1-38
20 Ni ahnsou me moromoro meleileidi, Pohl ahpw eker tohnpadahk ko, oh mwurin eh kangoange irail oh rahnmwahwihirailla, e tapiada eh seiloak ong Masedonia.
2 Mwurin eh seiloakih sahpw pwuko oh kin kangoangehki tohnpadahk en wasao lokaiahn kangoang tohto, e ahpw lella Krihs.
3 E ahpw mihmihki wasao sounpwong siluh, ahpw ni eh pahn sereklahng Siria, e ahpw diarada me mehn Suhs ako pwungkipenehr ren kemehla, ih eri koasoanehdi en pwurala keid Masedonia.
4 Sopater nein Pirus sang Peria iangada, oh pil Aristarkus oh Sekundus sang Deselonika, Kaius sang Derpe, Timoty, oh sang wehin Eisia Dikikus oh Tropimus.
5 Ohl pwukat tiengla oh awiawih kiht nan Troas;
6 ahpw se sereksang Pilipai mwurin kasarawien Pilawa me Sohte Doal Ihs, oh nan erein rahn limau, se ahpw leledo rehrail Troas oh mihmihki mwo rahn isuh.
7 Ni keieun rahn en wihko, ni at pokonpene pwe sen mwenge, Pohl ahpw tepida padahkih irail pwehki eh pahn mwesel mandahn rahno; oh e koasoakoasoi lao lel ni lukepen pwong.
8 Eri lamp tohto mi nan perehn powe, wasa me se pokonpene ie.
9 Mwahnakapw men me ede Eutikus me wie mwomwohd ni wenihmwtoko ahpw meir kelikla ni Pohl eh wie koasoakoasoi, oh pwehki e meirla, e pwupwudihsang nan poasoake kesiluh oh ni ahnsou me irail pwekada, e melahr.
10 Pohl ahpw doudihla pah oh lukupoardiong powe oh pwoalehdi, oh nda: “Kumwail dehr nsensuwed, pwe e momour.”*
11 E ahpw pwuradahla poweo oh pilitikihpeseng pilawao oh tepida mwenge. Ih eri pousehlahte koasoakoasoi ahnsou reirei, lao eh rahnpeseng, e ahpw kohkohla.
12 Eri, irail kahrehda pwutako oh uhdahn nsenamwahula pwe e mourdahr.
13 Se ahpw tiengla ni sohpo oh sereklahng Assos, wasa me se pahn ale Pohl pwehn iangada sohpo, pwe mwurin eh ndaiong kiht sen wia met, e pahn sapal kohla wasao.
14 Eri ni ahnsou me e leledo reht nan Assos, se ahpw wahda ih oh kohla Mitilihne.
15 Oh mandahn rahno, se sereksang wasao oh lella Kios, ahpw rahn ehu mwurin mwo, se uhdi Samos erein ahnsou kis, oh pweidi sohngada, se ahpw lella Mailihdus.
16 Pohl koasoanedier en serek daulih Episos pwe en dehr mihmi nan wehin Eisia, pwe e karuwaruhki en lel Serusalem ni rahnen Kasarawien Pendekos ma e kak.
17 Ahpw, e ileklahng Episos sang Mailihdus oh ekerodo sounapwalih kan* en mwomwohdisowo.
18 Ni arail kohdo reh, e ahpw ndaiong irail: “Kumwail uhdahn ese duwen ei wiewia kan rehmwail sang ni keieun rahn me I kohdo nan wehin Eisia,
19 ei kin liduwih Kauno ni aktikitik* oh ni sengiseng oh kahpwal akan me kin lelohng ie pwehki mehn Suhs akan koasoanehdi en kemeiehla.
20 Kumwail pil ese me I sohte kin pweieksang padahkihong kumwail mehkot me pahn wia kamwahupamwail oh padahkih kumwail nan wehipokon oh sang ihmw lel ihmw.
21 Ahpw I kin kadehdehiong mehn Suhs oh mehn Krihs kan ni unsek me re anahne koluhla oh sohpeiong Koht oh pwoson atail Kaun Sises.
22 Eri kilang! pwehki sapwellimen Koht manaman* kin kamwakid ie, I seiseiloaklahng Serusalem mendahki ei sehse dahme pahn wiawihong ie wasao,
23 ahpw sang kahnimw lel kahnimw, sapwellimen Koht manaman* kin pwurepwurehng kadehdehiong ie, ndinda me selidi oh kahpwal kan kin awiawih ie.
24 Ahpw I sohte medewe me ei mour* kesempwal ong ie,* ihte ma I pahn kanekehla weirentang wet oh doadoahk me I alehdi sang Kaun Sises, pwe I en kadehdehda ni unsek rongamwahu duwen sapwellimen Koht kadek sapan.
25 “Eri kilang! I ese me sohte emen rehmwail me I kalohkihong duwen Wehio me pahn pwurehng kilang ie.
26 Eri I eker kumwail pwe rahnwet kumwail en kadehde me I mwakelekel sang ntahn aramas koaros,
27 pwe I sohte kin pweieksang padahkihong kumwail sapwellimen Koht kaweid koaros*.
28 Kumwail mwasamwasahn pein kumwail oh pelin sihpwo pwon me sapwellimen Koht manaman* idihada kumwail nin duwen sounapwalih kei pwe kumwail en wia silepen mwomwohdisohn Koht, me e ketin pwainkihda ntahn sapwellime Ohl.
29 I ese me mwurin ei pahn kohkohla, kidien wel kommwad kan pahn kohdo nanpwungamwail oh re sohte pahn apwalih pelin sihpwo ni kadek,
30 oh aramas pahn pwarada sang nanpwungamwail oh pahn koasoia soahng kan me kin kapirekihala me mehlelo pwe en kihsang tohnpadahk kan pwe ren idawehnirailla.
31 “Ihme kahrehda kumwail pepehd oh tamataman me erein sounpar siluh, ni rahn oh nipwong, I sohte kin uhdihsang ei padapadahkih emenemen kumwail ni ei sengiseng.
32 Oh met I likihong kumwail Koht oh pil sapwellime mahsen en kadek sapan, mahsen me kak kaukumwailda oh kihong kumwail sohsowo me kohieng koaros me sarawi kan.
33 I sohte kin noahroke nein emen silper de kohl de likou.
34 Pein kumwail ese me pein pehi kat me kin kihda ei anahn oh en iengei kan ar anahn.
35 Ni mehkoaros, I kasalehiongkumwailehr sang ni ei wiewia kan duwen amwail anahne sewese irail akan me luwet oh kumwail pil anahne tamataman mahsen en Kaun Sises ni eh pein mahsanih: ‘Kihwei kin kaperen sang ale.’”
36 Oh ni ahnsou me e ndahlahr mepwukat, e ahpw kelepwikihdi iangahki irail koaros oh kapakap.
37 Ni mehlel, irail koaros ahpw sengiseng laud oh re pwoalehdi Pohl* oh metik,
38 pwe re inenen medengkihla eh koasoi me dene re sohte pahn pwurehng kilang ih. Irail eri iangala ih lel ni sohpo.
Footnote kan
^ De “eh mour [LK, psy·kheʹ] mi reh.” Kilang KLL.
^ LK, “ohl mah kan.”
^ De “madamadau karakarahk.”
^ LK, pneuʹma. Kilang KLL.
^ LK, pneuʹma. Kilang KLL.
^ LK, psy·kheʹ. Kilang KLL.
^ De “sohte mwahn katapankin ei mour.”
^ De “koasoandi koaros.”
^ LK, pneuʹma. Kilang KLL.
^ LK, “pengidiong ni tepinweren Pohl.”
