“RAHKET me laud, ahpw tohndoadoahk kan me malaulau. Ihme kahrehda, kumwail peki rehn Soumas en rahket en ketin poaronehdo tohndoadoahk kan ong sapwellime rahk.” (Luk 10:2) Mahsen pwukat me Sises mahsanih mpen sounpar 2,000 samwalahro kawehwehda mwahu duwen irairo nan Myanmar rahnwet. Dahme kahrehda? Nan Myanmar, mpen sounkalohk 4,200 te me kin lohki duwen rongamwahwo nanpwungen aramas limedep limerar (55,000,000).

“Soumas en rahket,” Siohwa, ketin kamwakid mohngiong en riatail Kristian tohto sang sahpw teikan, oh re keseudo sahpw wet nan Palieir en Eisia pwehn iang sewese doadoahk en kalohk. Dahme kamwakid irail en keseusang sapwarail? Dahme sewese irail en wia keseu wet? Oh kapai dah kan me re ahneki? Kitail pahn kilang.

Sounpar kei samwalahro, Kazuhiro, pioneer men nan Sapan, lelohng soumwahu en rerrer, lipwongmas, oh wisikla ni imwen wini. Toahkteo ndaiong ih me e sohte kak diraip erein sounpar riau. Kazuhiro pwuriamweikihla met. E pein idek reh, ‘Ia duwen ei kak pousehlahte wiewia dahme I kin perenki—me iei pioneer?’ E kapakap ni ngidingid oh peki rehn Siohwa en ketin ritingadahng ih ahl ehu pwehn pousehlahte papah nin duwen pioneer men.

Kazuhiro nda: “Sounpwong ehu mwuri, kompoakepahi men me kin papah nan Myanmar rongada duwen ei irairo. E eker ie nan delepwohn oh nda: ‘Nan Myanmar me tohto kin kalapw dake bus. Ma ke keseudo, ke kak pousehlahte kalohk oh sohte anahne sidohsa!’ I idek rehn ei toahkteo ma e medewe ma I kak kousoan Myanmar mendahki ei soumwahwo. I pwuriamweikihla ni eh nda: ‘Mie toahktehn mwahliel men sang Myanmar me mwemweit Sapan ahnsou wet. I pahn ndaiong ih duwen kowe. Ma ke pwurehng lelohng omw soumwahu en rerrer, e kak apwalih iuk.’ Ong ie, dahme toahkteo nda wia pasapeng ehu sang Siohwa.”

Kazuhiro mwadangete kadarala e-mail ehu ong ohpis en Sounkadehdehn Siohwa kan nan Myanmar oh kasalehda me ih oh eh pwoudo men papah nan sahpwo nin duwen pioneer kei. Rahnte limau mwurin mwo, ohpiso sapengala nda, “Kohdo, se anahne pioneer kan!” Kazuhiro oh eh pwoudo, Mari, netikihla werera sidohsa ko, ale neira doaropwehn kousoan wasao (visa), oh pwainda ticket en sompihr. Rahnwet, ira kin ni peren iang pwihn me kin lokaiahki pehrail nan Mandalay. Kazuhiro nda: “Erein dahme wiawi, se pehm me at pwoson sapwellimen Koht inou  me dierek nan Melkahka 37:5 kin kehlailda, me mahsanih: ‘Mweidohng KAUN-O pein kowe; likih, e ahpw pahn seweseiuk.’”

Nan pahr 2014, Sounkadehdehn Siohwa kan nan Myanmar ahneki pwais kaselel en wia mihting tohrohr laud ehu. Riatail Kristian tohto sang sahpw teikan iang towehda mihting tohrohr wet. Emen rehrail, Monique, sister men me sounpar 34 me kohsang Wehin Amerika, nda: “Mwurin ei pwurasang mihting tohrohro, I kapakapohng Siohwa duwen kahk dahieu me I anahne wia mwuhr nan ei mour. I pil koasoiaiong ei pahpa nohno duwen ei mehn akadei kan me pid papah Siohwa. Kiht koaros medewe me e mwahu I en pwurala Myanmar, ahpw I anahne ahnsou oh I anahne kapakap pak tohto mwohn ei wiahda ei pilipilo.” Monique kawehwehda dahme kahrehda.

“Sises kangoange sapwellime tohnpadahk kan en ‘kapatahda uwen pweine.’ Eri I pein idek rehi: ‘Itar nei mwohni en wia keseu wet? I pahn kak apwalih pein ngehi nan sahpwo ni ei sohte doadoahngki pali laud en ahnsou wia doadoahk en mwohni?’” Ih eri nda: “I mwadangete esehda me sohte itar nei mwohni pwehn keseula sahpw ehu me mi apali sampah.” Eri, ia duwen eh kak keseula?—Luk 14:28.

Monique nda: “Ehu rahno ei kaunen doadoahko ndaiong ie me e men tuhwong ie. I salohda oh medewe me e pahn ndaiong ie me I anahne sohla doadoahk. Ahpw, ei kauno kalahngankihong ie ei doadoahk mwahu. Ih eri ndaiong ie me e koasoanehdier pwe ien alehdi kisakis en mwohni, oh met iei uwen mwohni me I anahne pwehn apwalihala ei kahpwal en mwohnio!”

Monique papahier nan Myanmar sangete December 2014. Ia eh pepehm ong doadoahk en kalohk nin duwen emen me kin toukihda pein ih en papah wasa me anahn laud mie ong sounkalohk? E nda: “I uhdahn perenki ei mi wasaht. I kin onop Paipel rehn aramas silimen. Emen nei tohnsukuhl ko sounpar 67. Ahnsou koaros me e kin rahnmwahwih ie, e kin sirei oh pwoaleiehdi. Ni eh sukuhlki me mwaren Koht iei Siohwa, e uhdahn mwekidkihda oh sengiseng. E nda: ‘Ih ehdin ei rong me mwaren Koht iei Siohwa. Ke uhdahn pwulopwul sang ie, ahpw ke padahkihong ie mehkot me keieu kesempwal me I kak sukuhlki.’ Met pil kahrehiong ie en sengiseng. Soahng kan me wiawihong ie me duwehte met kin kahrehiong ei papah wasa me anahn laud mie ong sounkalohk en uhdahn mie katepe.” Me keren, Monique ahneki pai kaselel en iang towehda Sukuhl ong Sounkalohki Wehio kan.

Ehu kahrepe me kamwakid ekei en keseula Myanmar iei dahme ntingdi nan neitail pwuhken pahr (2013 Yearbook of Jehovah’s Witnesses) me pid duwen sahpw wet. Sister men me sounpar 30 samwa me adaneki Li, kin kousoanehr ni Palieir en Eisia. Mieier eh doadoahk en mwohni, ahpw dahme ntingdi nan pwuhken pahro kamwakid ih en medewe ma e kak papah nan Myanmar. E nda: “Nan pahr 2014 ni ei towehda mihting tohrohr ehu nan Yangon, I tuhwong pwopwoud ehu me toukihda pein ira en papah wasa me anahn laud mie ong sounkalohk nan wasahn kalohk kan me mehn China kan kin mie nan Myanmar. Pwehki I ese lokaiahn China, I pilada en keseula Myanmar pwehn iang sewese pwihn en kalohk me kin kalohk ong mehn China kan wasao. I wiahla iengen Monique pioneer, oh se keseula Mandalay. Siohwa ketin sewese kiht en diar at doadoahk en sounpadahk ong lepin ahnsou ni imwen sukuhl ehu, oh se diarada wasa me se kak rent me karanih sukuhlo. Mendahki e kin karakar oh sohte itar soahng kan me se anahne, I kin perenki ei papah wasaht. Aramas akan nan Myanmar sohte ahneki soahng tohto nan arail mour, ahpw re kin kadek oh men doadoahngki arail ahnsou en rong duwen rongamwahwo. E uhdahn kaperen en kilang ia duwen Siohwa eh kin ketin kamwadangihala doadoahk wet. I uhdahn kamehlele me Siohwa kupwurki ien mi Mandalay.”

Me tohto me kin toukihda pein irail en papah wasa me anahn laud mie ong sounkalohk eseier duwen manaman en kapakap. Ih met me wiawihong Jumpei, me sounpar 37, oh eh pwoudo, Nao, me sounpar 35. Ira kin papah  nan mwomwohdiso ehu nan Sapan me kin lokaiahki pehrail. Dahme kahrehda ira keseula Myanmar? Jumpei nda: “Ngehi oh ei pwoudo kin ahnsou koaros ahneki mehn akadei en papah wasa me anahn laud mie ong sounkalohk nan sahpw tohrohr ehu. Brother men sang aht mwomwohdiso me kin lokaiahki pehrail nan Sapan keseudo Myanmar. Mendahki malaulau nait mwohni me se nekidala, nan May 2010 se pil keseula. Riat Kristian kan nan Myanmar kasamwo kiht ni kadek!” Ia eh pepehm ong pwihn en kalohk me kin lokaiahki pehrail nan Myanmar? E nda: “Me tohto wasao kin men rong duwen rongamwahwo. Ni at kin kasalehda kasdo me aramas kin lokaiahki pehrail, tohnihmw salengepon kan kin pwuriamweila. Se uhdahn kalahnganki me se wiahda pilipil en kohdo papah Siohwa wasaht!”

Dahme wiawihong ahn Jumpei oh Nao ara kahpwal en mwohni? “Mwurin sounpar siluh, se doadoahngkihla pali laud en nait mwohni me se nekidala oh sohte itar nait mwohni sen pwainkihla at rent ong sounparo mwuri. Ngehi oh ei pwoudo kin kapakap ni ngidingid pak tohto. Ni soh kasikpe, se alehdi kisinlikou ehu sang ohpis en Sounkadehdehn Siohwa kan, re lukei kiht en wiahla pioneer tohrohr kei erein ahnsou kis! Se likih Siohwa, oh kehn eh sohte ketin likidmeliehla kiht. E kin ketin apwahpwalih kiht ni ahl tohto.” Me keren, Jumpei oh Nao pil iang towehda Sukuhl ong Sounkalohki Wehio kan.

Dahme kamwakid Simone, brother men me sounpar 43, me uhdahn kohsang Italy, oh eh pwoudo, Anna, sister men me sounpar 37, me uhdahn kohsang New Zealand, en keseula Myanmar? Anna sapeng nda: “Dahme ntingdi nan pwuhken pahro (2013 Yearbook) me pid Myanmar me kamwakid kiht!” Simone nda: “E wia pwais kaselel ehu en kousoan nan Myanmar. Mour wasaht uhdahn mengei, oh I kak doadoahngki pali laud en ei ahnsou nan sapwellimen Siohwa doadoahk. E uhdahn kaperen en ese duwen nsenoh me Siohwa kin ketin kasalehiong kiht ni at papah wasa ehu me anahn laud mie ong sounkalohk.” (Mel. 121:5) Anna nda: “I uhdahn peren laudsang mahso. At mour sohte kin kedirepwki soahng kan me sohte uhdahn kesempwal. I kin doadoahngki pali laud en ei ahnsou rehn ei pwoudo, oh at karanih emenemen laudla. Se pil diarada kompoakepaht mwahu kan. Aramas akan sohte kin lipilipilki Sounkadehde kan, oh ar kin perenki rong duwen rongamwahwo uhdahn kapwuriamwei!” Ni ahl dah kan?

Anna nda: “Ehu rahno, I kalohk ni wasahn netineto ong serepein men me kin iang sukuhl laud oh koasoanehdi en pwurehng tuhwong ih. Ni at tuhpene, e kahre emen ienge. Keriapak en at pwurehng tuhpene, e kahrehdo pil ekei ienge. Mwurin mwo, e pil kahrehdo ekei. Met I kin onop rehn irail meh limmen.” Simone nda: “Aramas akan me se kin kalohk ong kin kadek oh men ese dahme se wiewia. Me tohto kin men rong. Ni mehlel, sohte itar at ahnsou en apwalihala koaros me men rong kan.”

Ahpw kahk mwahu dah kan me pidada arail en wiahda pilipil en keseula Myanmar? Mizuho, sang Sapan, nda: “Ngehi oh ei pwoudo, Sachio, kin ahnsou koaros men papah nan sahpw ehu me anahn laud mie ong sounkalohk​—ahpw ia wasa? Mwurin at wadek pwuhken pahr (2013 Yearbook) duwen Myanmar, se uhdahn mwekidki  duwen rohng kan sang riat kan me kahrehda sen tepida medemedewe ma se pahn kak papah nan Myanmar.” Sachio nda: “Se pilada en mwemweitla Yangon, kahnimw laud en Myanmar, erein wihk ehu, pwehn kilang sahpwo. At seiloako kamehlelehiong kiht me se anahne keseula wasao.”

Rodney oh eh pwoudo, Jane, sang Australia, me sounpar 50 samwa, oh neira pwutako, Jordan, oh serepeino, Danica, papahier nan Myanmar sangete pahr 2010 nin duwen sounkalohk kei me kin toukihda pein irail en papah nan sahpw me anahn laud mie ong sounkalohk. Rodney nda: “Se uhdahn mwekidki ia uwen aramas ar men esehla duwen Koht. I uhdahn men ndaiong peneinei teikan ren song papah wasa ehu me duwehte Myanmar.” Dahme kahrehda? “E uhdahn kaperen en kilang ia duwen met eh kahrehiong kiht en karanihala Siohwa! Me pwulopwul tohto kin kedirepwkihla neirail cellphone kan, sidohsa, doadoahk, oh pil soahng teikan. Nait seri kan kin soupisengki sukuhlki lepin lokaia kapw kan ira en doadoahngki nan kalohk. Ira kin song en sukuhlki ia duwen ara pahn sewese irail kan me sohte ese duwen Paipel oh ia duwen ara pahn pasapeng erein mihting kan nan at mwomwohdiso. Ira pil kin soupisengki soahng tohto teikan me pid at kaudok.”

Oliver, brother men me sounpar 37 me kohsang Wehin Amerika, kawehwehda dahme kahrehda e men ndaiong meteikan duwen soangen doadoahk wet, e nda: “En papah Siohwa wasa me I sahn kin wahdo kapai tohto. Ei keseusang sapweio sewese ien kalaudehla ei kamehlele oh likih Siohwa sohte lipilipil irair dah me I lelohng. Ei kin papah rehn irail kan me I sohte ese mwoweo ahpw kin kamehlele soahng kante me I kamehlele uhdahn sewese ie en kilang me sohte mehkot nan sampah wet pahrekiong kesempwalpen Wehin Koht.” Rahnwet, Oliver oh eh pwoudo, Anna, kin pousehlahte papah ni ngoang rehn pwihn me kin apwalih wasahn kalohk me aramas akan kin lokaiahn China.

Trazel, sister men me sounpar 52 sang Australia, kin papah nan Myanmar sangete pahr 2004. E nda: “Ong irail kan me kak, I uhdahn men ndaiong ren papah wasa me anahn laud mie ong sounkalohk. I esehlahr me ma ke kin men papah Siohwa, e pahn ketin kapaiahda omw kin nanti. I sohte douluhl kasik me I pahn ahneki soangen mour wet. E wia mour ehu me keieu kansenamwahu oh diren kapai tohto me laudsang dahme I kak medewehda.”

Se koapworopworki me dahme riatail pwukat nan Myanmar koasoia en kamwakid uhk en medewe duwen omw pahn sewese irail kan me ahneki mohngiong mwahu ni wasa kan me rongamwahwo saikinte lella ie. Ei, irail kan me kin toukihda pein irail en papah wasa kan me anahn laud mie ong sounkalohk wie liklikwer ndinda, “Menlau, kohdo Myanmar oh sewesei kiht!”