Kasalehda Kalahngan Ahnsou Koaros
Ewen Kahk Kesiluh
Kasalehda Kalahngan Ahnsou Koaros
DAHME PAIPEL KIN PADAHNGKI? “Kumwail kasapahlkalahngan ong Koht ni mehkoaros.”—1 Deselonika 5:18.
IA KAHPWAL EN? Kitail kin mi nanpwungen aramas me kin aklapalap oh sohte kin kasalehda kalahngan oh met kak kahrehda kitail en alasang irail. (2 Timoty 3:1, 2) Patehng met, mwein kitail kin wia soahng tohto me kin kedirepwehla atail mour. Mwein kitail kin mihla nan kahpwal de kin wiewia dahme pein kitail kin perenki me kahrehda kitail en sohla kalahnganki dahme kitail ahneki de dahme meteikan kin wiahiong kitail.
DAHME KE KAK WIA? Wiahda ahnsou pwehn doudouloale soahng mwahu kan me ke kin ahneki ahnsou wet. Mwein ke kin mihla nan kahpwal. Ahpw medewe duwen mehn kahlemeng en Nanmwarki Depit. Ekei pak e kin inenen nsensuwedkihla kahpwal kan me e kin lelohng. Mendahki met, e kapakapohng Koht nda: “I medemedewe duwen soahng koaros me komw ketin wiadahr, oh katamandohng ie wiepen nin limomwi kan koaros.” (Melkahka 143:3-5) Mendahki kahpwal pwukat, Depit kin kasalehda kalahngan ahnsou koaros oh kin itarki dahme mie.
Medewe duwen soahng kan me meteikan kin sewesehkin uhk oh kasalehda omw kalahnganki dahme re wiahda. Sises ketikihdi mehn kahlemeng me keieu kaselel me pid duwen met. Karasepe, ni ahnsou me kompoakepah Mery kieldiong leho pohn tapwi oh aluweluwe ko, ekei aramas ako ahpw idek: “Dahme mehn kei pwohmwahu wet ohkihlahr mwahl?” * Irail me kauwe ko kin pehm me leho anahne netila oh kohwong me semwehmwe ko. Sises ketin sapengki: “Kumwail piseksang! Kumwail dehr direpwki lihet! Tiahk kaselel ehu me e wiahiong ie.” E pil mahsanih: “E wiadahr uwen me e kak.” (Mark 14:3-8; Sohn 12:3) Sises ketin kalahnganki dahme Mery wiahda ahpw e sohte ketin tetehk dahme e sohte wia.
Ekei sohte kin kalahnganki ar peneinei, kompoakparail kan, de soangen kapai teikan me irail ahneki lao re mehla de sohla mie. Ke kak soikala soahng kansensuwed pwukat ni omw pahn kin medemedewe duwen soahng mwahu kan me ke ahneki met! Ke sou medewe ekei soahng kan me wiawiher nan omw mour me ke kalahnganki de ke ntingihedi?
Pwehki “kisakis mwahu koaros” kin kohsang rehn Koht, e konehng kitail en kasalehda atail kalahngan ni atail kapakap ong ih. (Seims 1:17) Atail kaukaule wia met kak sewese kitail en ahnsou koaros kasalehda kalahngan oh kakairada atail kin itarki dahme mie.—Pilipai 4:6, 7.
[Nting tikitik me mi pah]
^ Ni mwehin tepin Kristian ako, kieldi leh pohn moangen emen me re kin kasamwohdo kin kasalehda kadek; a kieldi leh pohn neh kin kasalehda karakarahk.
[Kilel nan pali 6]
Ke kin kasalehda kalahnganki dahme meteikan kin wiahiong uhk?