Bibliapi “kausarimuy” palabraqa, griego parlaypi anástasis palabramanta jamun. Chay palabrataj, niyta munan “watejmanta sayarimuy” chayri “jatarimuy”. Uj wañusqa runa kausarichisqa kajtenqa, watejmantapis sayarikunman jina. Payqa manaraj wañupushaspa imayna runachus karqa, kikisitullantaj kausarimun (1 Corintios 15:12, 13).

 Bibliapi Ñaupa Testamentoqa, wañusqas kausarimunankumanta parlan. Uj cheqapi, Jehová Diosqa profeta Oseasnejta kay jinata nerqa: “Noqa kacharichisqaykichej Sepulturaj makinmanta. Noqa mañakapusqaykichej wañuypa makinmanta”, nispa (Oseas 13:14; Job 14:13-15; Isaías 26:19; Daniel 12:2, 13).

 ¿Maypitaj wañusqas kausarimonqanku? Wakin runasqa cielopi kausarimonqanku Cristowan khuska reyes kanankupaj (2 Corintios 5:1; Apocalipsis 5:9, 10). Bibliaqa chaymanta parlaspa nin, paykunaqa ‘wañusqas ukhumanta ñaupajta kausarimojkuna kasqankuta’ chayri ‘ñaupaj kaj kausarimuypi’ sayarimusqankuta (Apocalipsis 20:6; Filipenses 3:11). Chaytaj rikuchiwanchej, paykunamanta qhepata wajkuna kausarimunallankutataj. Chay runastaj ñaupajta kausarimojkunamanta nisqaqa aswan ashkha kanku, kay jallpʼapitaj wiñaypaj kusisqa kausakonqanku (Salmo 37:29).

 ¿Imaynatá wañusqas kausarimonqanku? Jehová Diosqa Jesusman atiyta qorqa wañusqasta kausarichimunanpaj (Juan 11:25). Jesustaj chay atiywan ‘sepulturaspi tukuy kajkunata kausarichimonqa’. Paykunataj kikin yuyayniyoj kausarimonqanku, manaraj wañupushaspa imaynachus karqanku, kikisitun kanqanku (Juan 5:28, 29). Kay jallpʼapi kausarimojkunaqa sano cuerpoyoj sayarimonqanku, ni ima nanayniyojtaj (Isaías 33:24; 35:5, 6). Cielopi kausarimojkunarí ‘mana rikukoj cuerpoyoj’ kausarimonqanku, nisunman cielopaj cuerpoyoj (1 Corintios 15:42-44, 50).

 ¿Pikunataj kausarimonqanku? Bibliaqa nin “cheqan runasta, mana cheqan runastapis Dios kausarichimunanta” (Hechos 24:15). Cheqan runas ukhupi kashanku, Diosta tukuy sonqo yupaychajkuna. Paykunamanta wakin kanku: Noé, Abrahán, Sara ima (Génesis 6:9; Hebreos 11:11; Santiago 2:21). Mana cheqan runas ukhupitaj kashanku, Diosta mana rejsisqankurayku sajra kajta ruwajkuna.

 Jinapis Diosta mana kasukuyta munajkunaqa, nitaj sajra kausayninkuta cambiayta munajkunaqa, ni jaykʼaj kausarimonqankuchu. Chay runasqa wiñay wiñaypaj wañunku (Mateo 23:33; Hebreos 10:26, 27).

 ¿Maykʼajtaj wañusqas kausarimonqanku? Bibliaqa nerqa cielopi kausarimojkunaqa, Cristoj kutimunan tiempopi kausarimunankuta. Chay tiempotaj 1914 watapi qallarerqa (1 Corintios 15:21-23). Kay jallpʼapi kausarimojkunarí, Jesucristo waranqa watasta kamachimushajtin kausarimonqanku. Chay wataspitaj enteron mundo uj kʼachitu paraisoman tukonqa (Lucas 23:43; Apocalipsis 20:6, 12, 13).

 ¿Wañusqas kausarimunankuta creesunmanpunichu? Arí. Bibliaqa jisqʼon runas kausarimusqankumanta parlan, chaytataj ashkha runas rikorqanku (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Chay kausarimojkunamanta ujqa, Lázaro sutiyoj runa karqa. Jesusqa chay runata tawa días wañusqa kasqanmanta kausarichimorqa, ashkha runas rikushajtinkutaj (Juan 11:39, 42). Jesuspa enemigosninpis, mana niyta aterqankuchu Lázaro mana kausarimusqanta. Chayrayku Jesustawan Lazarotawan wañuchinankupaj yachachinakorqanku (Juan 11:47, 53; 12:9-11).

 Bibliaqa nin Diosqa runasta kausarichimunanpaj atiyniyoj kasqanta, maytataj chayta ruwayta munasqanta. Payqa tukuy imitata yuyarikun. Chayrayku wañupoj runas imaynachus kasqankuta sumajta yuyarikun. Tukuy atiyniyoj kasqanraykutaj paykunata kausarichenqapuni (Job 37:23; Mateo 10:30; Lucas 20:37, 38). Mana chayllachu, Diosninchejqa wañusqasta maytapuni kausarichimuyta munashan. Bibliaqa chaymanta parlaspa nin: “Makiykiwan ruwasqayki runataqa imata jina rikukapuyta munanki”, nispa (Job 14:15).

Wañusqas kausarimunankumanta pantasqa yuyaykuna

 Wakin runas ninku: “Diosqa uj runata kausarichinanpaj, almanta watejmanta cuerponman churaykaponqa”, nispa.

 ¿Jinapunichu? Mana. Bibliaqa mana ninchu, almaqa cuerponchejmanta waj kasqanta, nitaj ninchu wañupojtinchej noqanchejmanta llojsipusqanta. Astawanpis nin almaqa noqallanchejtaj kasqanchejta (Génesis 2:7, sutʼinchaynin; Ezequiel 18:4, sutʼinchaynin). Diosqa uj runata kausarichimunanpaj, watejmanta kikisitunta payta ruwanqa.

 Wakin runas ninku: “Wakenqa chay rato wañuchisqa kanallankupaj kausarimonqanku”, nispa.

 ¿Jinapunichu? Mana. Bibliaqa nin, ‘sajra imasta ruwajkunaqa juzgasqa kanankupaj kausarimunankuta’ (Juan 5:29). Jinapis chay runasqa, kausarimuytawan imastachus ruwasqankumanta juzgasqa kanqanku, manataj ñaupa kausayninkumantachu. Jesús nerqa: “Wañusqasqa Diospa Wawanpa parlasqanta uyarenqanku, kasukojkunataj kausanqanku”, nispa (Juan 5:25). Sichus kausarimoj runas Jesuspa yachachisqanta uyarenqanku, kasukonqankutaj chayqa, sutisninkoqa “kausay kʼuyuna libropi” qhelqasqa kanqa (Apocalipsis 20:12, 13).

 Wakin runas ninku: “Kausarimojkunaqa ñaupa cuerponkupi kausarichisqa kanqanku”, nispa.

 ¿Jinapunichu? Mana. Uj runa wañupojtin cuerponqa ismuykapun, jallpʼamantaj tukupun (Eclesiastés 3:19, 20).