Jesusqa Galilea qochaj chimpapi kaj Decapolisman chayarqa. Chaypitaj may chhika runas payman rerqanku. Paykunaqa yachachisqanta uyariyta, onqoyninkumanta sanoyapuyta munarqanku. Mikhunatapis jatuchaj canastaspi apakorqanku.

Mikhunanku tukukojtintaj, Jesús yachachisqasninta nerqa: “Kay runasmanta llakikuni, kinsa diastaña noqawan khuska kashanku, nitaj mikhunankupaj imankupis kanchu. Mana mikhusqasta wasisninkuman kachapusaj chayqa, ñanpi llauchhiyaranqanku, wakenqa karumanta jamunku”, nispa. Yachachisqasnintaj nerqanku: “¿Maypitaj kay chʼinnejpi tʼantata tarisunchej kay chhika runasta sajsachinapajri?”, nispa (Marcos 8:2-4).

Jesustaj nerqa: “¿Mashkha tʼantastaj tiyapusunkichej?”, nispa. Paykunataj “qanchis tʼantawan, uj mashkha pescaditosllawan” nerqanku (Mateo 15:34). Chantá Jesusqa runasta nerqa pampapi tiyaranankuta. Tʼantasta, pescadostawan japʼispataj Diosman graciasta qorqa. Chantá partiraspa yachachisqasninwan runasman jaywacherqa. Tukuyninkutaj sajsakunankukama mikhorqanku. Puchojtataj qanchis jatuchaj canastas juntʼata tantarqanku. Mikhojkunaqa 4.000 qharis karqanku, mana yupaspa warmista, nitaj wawasta.

Jesusqa chay runasta kachapuytawan, yachachisqasninwan Magadán cheqanejman canoapi Galilea qochata chimparqa. Chaypitaj fariseoswan saduceoswan Jesusta pantachiyta munaspa, cielomanta uj señalta mañarqanku.

Jesusqa chayrayku paykunaman nerqa: “Qankunaqa chʼisiyaykushajtin ninkichej: ‘Qʼayaqa sumaj pʼunchay kanqa, cielo pukayarimushan’, nispa. Tutamantataj ninkichej: ‘Kunanqa chirimonqa, paramonqataj. Cieloqa pukayarimushan, phuyusqataj kashan’, nispa. Qankunaqa cielota qhawarispa reparayta yachankichej imayna pʼunchaychus kananta, tiempospa señalesnintataj mana reparayta yachankichejchu”, nispa (Mateo 16:2, 3). Chantapis Jesusqa nillarqataj, Jonaspa señalnillanta rikunankuta.

Chay qhepata, Jesusqa yachachisqasninwan canoaman wichariytawan Betsaida llajtaman purirerqanku. Rishajtinkutaj yachachisqasnenqa repararqanku uj tʼantallata apashasqankuta. Ajinallapitaj, Jesusqa Herodesman kʼaskasqa fariseosmanta, saduceosmantawan parlarqa. Pay nerqa: “Allinta qhawakuychej fariseospa levadurankumanta, Herodespa levaduranmantapis”, nispa. Yachachisqasnintajrí chayta mana entiendespa tʼantata mana apasqankumanta siminakorqanku. Chayrayku Jesusqa nerqa: “¿Tʼantaykichej mana kajtinchu siminakushankichej?”, nispa (Marcos 8:15-17).

Jesuspa yachachisqasnenqa, yuyarinanku karqa Jesús uj milagrota ruwaspa ashkha  runasman mikhuchisqanta, tʼantanku pisejtintaj milagrota ruwayta atisqanta. Chayrayku Jesús nerqa: “¿Yuyarikunkichejchu phishqa tʼantasta partispa phishqa waranqa qharista mikhuchisqayta? Chaypacha, ¿mashkha canastas juntʼatataj tantarqankichej puchoj parti tʼantasta?”, nispa. Paykunataj kuticherqanku: “Chunka iskayniyoj canastasta”, nispa. Chantá Jesús tapullarqataj: “Qanchis tʼantasta partispa tawa waranqa qharista mikhuchillarqanitaj. Chaypachapis, ¿mashkha jatuchaj canastas juntʼatataj tantarqankichej puchoj parti tʼantasta?”, nispa. Paykunataj “qanchis canastasta” nerqanku (Marcos 8:18-20).

Jesustaj nerqa: “Mana tʼantamantachu parlasharqani. ¿Imaraykutaj chayta mana entiendenkichejchu? Astawanqa fariseospa, saduceospa levadurankumanta allinta qhawakunaykichejmanta parlasharqani”, nispa (Mateo 16:11).

Yachachisqasqa chaymantaraj entienderqanku mana levaduramantapunichu parlashasqanta. Jesusqa “nisharqa fariseospa, saduceospa yachachiyninkumanta allinta qhawakunankuta” (Mateo 16:12). Payqa levadurata kikinchasharqa juchawan, ismoj imaswantaj. Chayrayku nerqa fariseospa, saduceospa yachachiyninku mana allinchu kasqanta.