Ñaupa tiempopi Habacuc sutiyoj runa nerqa: “Tata Dios, maykʼajkamataj qanta qhaparikamuspa, yanapata mañakusaj, mana uyarichikuspa? Maykʼajkamataj qhaparikamusqayki kallpaman atienekuspa sajrata ruwaykuna kasqanrayku, manataj qan jamunkichu kacharichinawaykupaj?”, nispa (Habacuc 1:2, 3). Habacucqa mana pisi creeyniyoj kasqanraykuchu Diosman chayta nerqa. Payqa cheqan runa karqa, Diospis payta allinpaj qhawarqa. Chayrayku Diosqa maykʼajchus ñakʼariykunata tukuchinanta willarqa (Habacuc 2:2, 3).

Llakiypi kashajtinchej chayri familianchejmanta pillapis ñakʼarejtin, ichá ninchej: “¿Maykʼajtaj Dios kay llakiyta tukuchenqari?”, nispa. Bibliatajrí niwanchej: “Jehová Diosqa imatachus nisqanta juntʼananpaj mana latʼuchu, imaynatachus wakin runas yuyanku ajina. Astawanpis payqa qankunawan pacienciakun. Imaraykuchus mana munanchu ni pi chinkachisqa kananta. Astawanqa munan tukuy pesachikunankuta”, nispa (2 Pedro 3:9).

Diosqa pisimantawan tukuy llakiykunata chinkachenqa. ¿Imaraykú chayta ninchej? Jesusqa “kay mundoj” tukukuyninpi imaschus kananta willarqa. Chay señalestataj uj chhika runas rikunanku karqa (Mateo 24:3-42). Jesús nisqanqa, kay tiempopi juntʼakushan. Chaytaj rikuchiwanchej, Diosninchej llakiykunata chinkachinantapuni. *

Jehová Diosqa llakiykunata chinkachinanpaj atiyniyoj. Jesustaj kay jallpʼapi kashaspa chayta rikucherqa. Imastachus Jesús ruwasqanmanta parlarina.

Jatuchaj llakiykuna. Uj pacha, Jesuswan yachachisqasninwan Galilea qochanta rishajtinku, sinchʼi loco wayra oqharikorqa. Canoankutaj yakuman chinkaykusharqaña. Jesusrí wayrata kʼamerqa, qochatapis nerqa: “¡Chʼin kay! ¡Ama qhollchoqeyaychu!”, nispa. “Wayrataj tiyaykorqa, may chʼintaj karqa” (Marcos 4:35-39). ¿Imatá Jesuspa ruwasqan rikuchiwanchej? Paypis Jehovapis atiyniyoj kasqankuta, sinchʼi wayrasta, loco parasta, terremotosta, waj jatuchaj llakiykunata ima chinkachinankupaj (Colosenses 1:15, 16).

Onqoykuna. Jesusqa ciegosta, suchusta, tʼuku onqoyniyojkunata, lepra onqoyniyojkunata, waj onqoyniyojkunatawan sanoyacherqa. Chaytataj ashkha runas rikorqanku. Bibliaqa Jesusmanta nin: “Tukuy onqosqastapis sanoyacherqa”, nispa (Mateo 4:23, 24; 8:16; 11:2-5).

Yarqhay. Jesusqa iskay kutispi may chhika runasman mikhucherqa. Dios payman atiyta qosqanrayku, pisi mikhunata ashkhaman miracherqa (Mateo 14:14-21; 15:32-38).

Wañuy. Jesusqa Diospa atiyninwan kinsa runasta wañuymanta kausaricherqa. Chaykunamanta ujtaj, tawa diastaña wañusqa kasharqa (Marcos 5:35-42; Lucas 7:11-16; Juan 11:3-44).